Yona 1 - ALLALA KUMƐ

Mari Sɔsɔ-Koe Yona Bolo

¹ Lunyɛ do, Mari kumara Amitayila den Nɛbi Yona ye ko,

² “I lasɔ, i ni ta Ninɛfa so-karantan rɔ ka nyɔ-mɔgɛnu makuma. Mɔgɛ wonuna ko-yogomɛ ara n tabɔ.”

³ Kɔnɔ hali wo, Yona ya Mari sɔsɔ. Mari ko a ni ta tele-bɔɛ kɔnɔ ale tara a ye tele-yigi. Yapa soe min bi kɔgɔ-yi kɔnkɔn-dɛ la, a tara a ye nyɔ. A ya kulun-belebele-wɛ do wulinɛ taran min bi tala Sipeni nyamanɛ rɔ. A ya kulun-sarɛ di ka ta. Ale miri le ko a si ke le a burila Mari kɔrɔ.

⁴ Mari ya banda-fin-fɔn-belebele-wɛ latugu anu kun na. Fɔnyɔ wo nara fanka rɔ, a tora doni, a ni kulɔn wo tinya.

⁵ Kulun-tawɔli-kɛlɛ wonu kilanta dɔgɔma-ma-de! Bɛɛ donta ata bɛsi-madiyɛ rɔ. Anu donta dunɛnu nabuiyi rɔ kɔgɔ-yi rɔ alako kulɔn ni fɛya. Anu bi kɛ dama rɔ tumɛ min, wo ya a taran, Yona ye kinɔgɔla kulɔn wo kan tinɛ do rɔ a dan na.

⁶ Kulun-kun-tigi ya a sanɛ taran. A ya a lakunden ka a fɔ a ye ko, “I ye kinɔgɔla kama kɛ la? I lasɔ, i ni ita bɛsɛ madiya fɔ a si ma dɛnbɛ. Tumado, a si kinikini ma ma. A si a ma, ma ti faga.”

⁷ Kulun-tawɔli-kɛlɛnu ya a fɔ ko, “Ma ni korɔn lakɛ ma nyɔgɔn tɛma wona ka a lɔn ni min gbɛ le tɔrɔyɛ kɛ la.” Anu ya korɔn lakɛ min kɛ, a ya Nɛbi Yona bira.

⁸ Anu ya a fɔ Nɛbi Yona ye ko, “Tonyɛ fɔ ma ye, i gbɛ le kɛ la, wa? Ile ye nfen sufa wɔlɛ la? I bɔra nyamanɛ nyamintan tɔ? Ile sibole ye kama?”

⁹ Nɛbi Yona ko, “Hiburu le nde la. Mari Alla min bi san-kole rɔ pon, nde si wo le kelan madiya. Ale le ya dugu-kole anubɛ kɔgɔ-yi kɛ dan.”

¹⁰ A ya a buri Mari kɔrɔ nya min, a ya wo rakaran anu ye. Kulun-tawɔli-kɛlɛnu kilanta, anu ko, “I wara ko-yogomɛ le ma kɛ la.”

¹¹ Fɔnyɔ tora kulɔn latonko-tankala anu na. Anu ya a fɔ tun ko, “Ma si nfen ma min si a ma, tɔn ni sigi fɔnyɔ kɛ la?”

¹² Nɛbi Yona ya anu yabi ko, “Ni wo ko tɔn ni sigi fɔnyɔ kɛ la, wo ni n nakɛ yi rɔ. Tɔrɔyɛ min bɛɛsi ara sigi wo ma kɛ la, wo ni wo tɛgɛ sigi nde, Yona ma. N gbɛ le.”

¹³ Hali wo, a ma di anu ye, anu ni foo Nɛbi Yona la, woletɔ anu bi anu natiriyala ka ke yi-kɔnkɔn ma. Kɔnɔ hali wo, fɔnyɔ tora anu yakɔrɔ-mamɔla ka tenbi a fɔlɔtɛ la. Kɔnɔ anu ma ke tala kan-bo-kan.

¹⁴ Anu dira Nɛbi Yonata Mari dala, anu ko, “E, Mari, ni ma ya kei kɛ lakɛ yi rɔ, i kana ma faga a niyi-bɔ-koe la. Ile Mari kelan gbɛ le kɛ dama la.”

¹⁵ Anu kɛra Nɛbi Yona ma ka a lakɛ yi rɔ. A ma mɛ lefan, fɔnyɔ ratora.

¹⁶ Anu ya a yen min kɛ, fɔnyɔ ra ara to, anu kilanta Nɛbi Yonata Mari la dɔgɔma-ma-de! Anu ya sarakɛ bɔ ka lanyiri kiri Mari ye a matara koe la.

¹⁷ Mari ya yɛgɛ-belebele do sɔ ka Nɛbi Yona lakunu. A ye a burɔ su sawa, tele sawa.