Yobu 8 - ALLALA KUMƐ

Bilidadita Kumɛnu

^1-2 Ha bi, i ma ban bɛ ila kuma-pɔrɔtɔ-paratɛ wo la? I darɔ-kumɛ manɛ fɔn gbansan la.

³ Koe min telennɛ, Alla ti wo radu mumɛ! Koe min bɛnnɛ, fɔ Alla Sɛnbɛ-Bɛɛ-Tigi wa wo ma le serr!

⁴ Tumado, ni ila dannu bara hakɛ kɛ Alla la, a fɛrɛ sa fɔ anu ba anuna hakɛ-sarɛ sɔrɔn.

⁵ Nba, min fisa, i ya-lamunun Alla Sɛnbɛ-Bɛɛ-Tigi la. I ni a madiya.

⁶ Ni ile latelennɛ le ka sɛninya, fɔ Alla wa i dɛnbɛ serr! A si duwa i ye ka i wara-koe lata yarɔ iko a ye nya min fɔlɔ nun.

⁷ Alla ye nala min dila i ma yarɔ, i foora min bɛɛ la, a si tenbi wo la pirr!

⁸ Ma benba donu manyinika tun alako ma ni a lɔn anu denu benbanu bara anu karan min ma

⁹ bawo male sɔrɔn-san le, ado ma hɛnkili dafani ma. Maleta wati manɛ tele-dande la duninya kɛ rɔ iko ninɛ si tenbi nya min.

¹⁰ Woletɔ ma ni hɛnkili nyini ma benbanu bolo. Kebi fɔlɔ, bɛɛ ya a lɔn ko hakɛ-tiginu si tɔrɔ. Anu bi nala ma hɛnkili kɔla anuta lɔnnɛ min na, ma ni wo lamɔɛn.

¹¹ Kebi fɔlɔ, ma benbanu si nyinikali kɛ, “Sɔnfɔn si bɔ gbele ma, wa? Ade, mɔgɛ si anu taran fuyi le tɔ.

¹² Ni yi gbalata tumɛ min, sɔnfɔn fɔlɔfɔlɔn ma si fɔsɔ. Yanni a ni koloya, a yanbɛ ara ban gbalala.

¹³ Alla-lɔnbɛlɛnu mani de iko sɔnfɔn-mafɔsɔnɛ wo bawo anu bara nyina Alla ko min kɛ, woletɔ yigi sa anu bolo tun!

¹⁴ Anu miri ko anu bara anu yigi sa yesekari kuma kɔnɔ yaga, yalanyalan-yili le wo la.

¹⁵ Mɔgɛ wa a lɛngbɛn yalanyalan-yili wo rɔ, wo si a sɛnbɛ bira, wa? Mɔgɛ wa a dun yesekara-kolo kelan la, wo si a dɛnbɛ a lasɔla?”

¹⁶ Karagbɛlɛnu si ma iko lofolafɛ min bi fɛrɛnna tele kɔrɔ ka to a matiila ki-fannu kɔrɔ nakɔɛ rɔ.

¹⁷ A si a sulinu mini kurinu ma ka nɔrɔn dandan ma.

¹⁸ Kɔnɔ ni mɔgɛ ya a kuri wurun, mɔgɔ-wo-mɔgɔ ti ke a lɔnna a kuri ye kan min nun fɔlɔ.

¹⁹ Karagbɛlɛnu fananta sewɛ mani de iko lofolafɛ kɛ. Tɔ-a-la, mɔgɔ-gbɛrɛkɛ si na anu gbɛ bi.

²⁰ Mɔgɛ minnu telennɛ Alla ye, a ti wonu boloka, ado minnu telenni ma a ye, a ti wonu dɛnbɛ.

²¹ Kɛ bɛɛ wa ka-a-la, a si i da-burɛ lafa yɛlɛn la tun! A si a ma, sewɛ anubɛ yerelen-tɛgɛ si taran ile Yobu da la.

²² Ila ko-gboyanɛ minnu ye, a si wonu nayarabi. Kɔnɔ karagbɛlɛnuna bɔnnu si kasara pɔ!