Yobu 5 - ALLALA KUMƐ

¹ Yobu, i ni kelelɛ kɛ, tumado mɔgɛ do ye nyɔ min si a labira. Melika do ye nyɔ min si i dɛnbɛ kɛ rɔ, wa?

² Sɔgɔ-labɔɛ le si kun-takolɔn faga. Keliya-diminyɛ si a ma, mɔgɛ ni faga iko yuwɛ.

³ N bara kun-takolɔn do yen nun min wara-koe ara ta yarɔ kɔnɔ a ma mɛ, mɔgɛ do ya anubɛ ala denbayɛ danka.

⁴ Ala dannu ti lafɛrɛ sɔrɔn. Mɔgɔ-wo-mɔgɔ ti sɔ anu fɛ kiti rɔ.

⁵ Kɔnkɔtoenu si kun-takolɔn wola sɛnita-fannu kankan ka a dɔn, hali min bi wɔnɛnu tɛma. Mɔgɛnu sokesoke si to ala nɔnfulila ko la iko mɔgɔ kan-nagbalanɛ sokesoke si to yila ko la nya min.

⁶ Gbɛlɛyɛ ti fɛrɛn dugi ma. Tɔrɔyɛ fanan ti nanfa dugu-kole ma.

⁷ Fɔnyɔ si ta-lole ranyɛnsɛn san ma nya min, mɔgɔ si tɔrɔyɛ lana a nyɛrɛ kuma wo nya na le.

⁸ Ni nde le ile Yobu la, n si n ya-lamunun Alla la ka nna kɔndɔfili kɛ bɛɛ yira a la.

⁹ Male ti Allata ko-makawanɛ-dan lɔn, ado ala kabana-koenu dan sa.

¹⁰ A ye bandɛ lanala dugi ma. A ye sɛnɛnu yi sala.

¹¹ Alla le si sɔ tinɛ di mɔgɔ-famayiginɛ ma. Minnu bi dila, a si wonu nanyagalen,

¹² A si yanfantenuna ko-rabɛn tinya alako anu kana na ta yarɔ anuna kɛwuyɛ la.

¹³ A si a ma, karagbɛlɛnu ni bira anu nyɛrɛta yili-lasiginɛ la. Minnu si anu nyɛrɛ ma hɛnkilimɛ la, Alla si wonuna ko-rabɛn yɛlɛma fufafuyi la.

¹⁴ Tele si ma pinpi la anu bolo. Anu si to anu bole mɛmɛla tele rɔ iko fiyɔn.

¹⁵ Alla si a ma, bolo-kolɔnnu ni tanka fen-tiginuna masibɛ ma. A si fugarɛnu tanka fankamɛnuna masibɛ ma.

¹⁶ A si bolo-kolɔnnu yili-madiya ka a ma, karagbɛlɛnu ni sigi-a-la don!

¹⁷ Mɔgɔ-sewanɛ le wo mɔgɛ la Alla ye min natelenna. Alla Sɛnbɛ-Bɛɛ-Tigi tenbi mɔgɛ kolola, a yisi ka bɔ Alla kan ma.

¹⁸ Alla min bi mɔgɛ tanbanna, Alla le si ala tɛlɛ dandan. Alla ye i rafɛrɛnna a kɔɛn min na, a kɔɛn kelan wo ye i lakɛndɛyala le tun.

¹⁹ Mɔgɔ wa gbalo sɔrɔn tumɛ min, Alla si to a kunyɛ bɔla wo rɔ.

²⁰ A si kɔnkɔ-fitinɛ latenbi i kun na. A si i lakisi kɛlɛ rɔ.

²¹ A si i latanka nafiginu nagankuri ma. Kasarɛ tenbi i magbenna tumɛ min, hali i ma kilan.

²² Alla si a ma, i ni yɛlɛn karagbɛlɛyɛ anubɛ kɔnkɛ ma kedekede! Hali sogo-nyɛɛnɛnu, i ti kilan wonu na.

²³ Hali kuri, i ti a taran ila wɔli-kɛ-tinɛ rɔ. Sogo-feremɛnu ti i kɛlɛ.

²⁴ I si to i fanbolo ila bɔn la. I wa ila sagɛnu dan tuma-wo-tuma, hali kelen, i ti a taran a tonɛ-a-rɔ.

²⁵ I si yiri bui! Ila dannu si siyaya iko binyɛ!

²⁶ I kɔrɔyanɛ kɔbɔkɔbɔ, i ragbɛlɛyanɛ iko kemini-mɛsɛ. I gbilikinnɛ si to iko fui-fan min bi tɛgɛla a wati rɔ.

²⁷ N bara min fɔ i ye kɛ la, ma ya kɛ lɔn karan-belebele le fɛ. Woletɔ, Yobu, kɛ bira i bolo filɛ la.