Yobu 42 - ALLALA KUMƐ

Yobuta Kumɛnu

^1-2 E, Mari, n ya a lɔn ko ile si ke le koe bɛɛ mala. Mɔgɔ-wo-mɔgɔ ti ke ila miriyanu tinyana.

³ Mari, ile le ya nyinikalɛ sa ko, “Yon bi kun-takolɔn kɛ la min bi ila hɛnkilimayɛ manyinikala?” Nde ko-nya-yenbɛlɛ le ya wo ma bawo n ma kabana-koe wonu nya-lɔn.

⁴ I ya a fɔ n ye nun ko i tenbi kumala n ye tumɛ min, n ni n tole masɔ i la. I ya a fɔ fanan ko i si nna nyinikalɛnu yabi.

⁵ Fɔlɔ nun, n bi i wara-koe lamɔɛnna mɔgɔ-dogbɛrɛnu bolo kɔnɔ kaka, n bara i yen n nyɛrɛ yɛ la.

⁶ N darɔ-kannu bara a ma, n bara miliya. Wola ko la, n bara tubi ka n sa sundu-kunyɛ ma i kɔrɔ.

Kuma-Kundon

⁷ Mari ban kumala Yobu ye, a ya a fɔ Ɛlifasi fanan ye ko, “N bara diminya wobɛ i diyana-mɔgɔ filɛ ma bawo wo ma kuma-telennɛ fɔ iko nna wɔli-kɛla Yobu.

⁸ Wo ni ta tura wɔrɔnfila anubɛ saga-yigi wɔrɔnfila la Yobu ma alako wo ni anu ma sarakɛ la wo nyɛrɛ ye. Yobu si madiyali kɛ wo ye. N si ata madiyalɛ lamɔɛn alako n kana wo layarabi iko a bɛnta, wo ni yarabi nya min. Wo ma tonya fɔ n bara-koe rɔ iko ale Yobu ya tonyɛ fɔ n bara-koe rɔ nya min.”

⁹ Ɛlifasi wo, Bilidadi wo, anubɛ Sofari ya a ma iko Alla ya a fɔ anu ye nya min. Mari ya Yobuta madiyali-kan lamɔɛn.

¹⁰ Yobu ban madiyali kɛla a diyana-mɔgɔ sawɛ wonuna ko la, Mari ya a ma, ale Yobu mara-a-la tun. Ala nɔnfuli min tinyanta a bolo nun, a ya wo nyɔgɔn sigi tina fila sɔrɔn.

¹¹ Yobu tirisan-musu wo, a na-kelen-nyɔgɔ wo, wonubɛ a diyana-mɔgɛnu nara a kɔndɔn tinɛ. Anu ya fen-dɔn-kɛ ala bɔn la. Anu ya a wui bɔ ka a tɛgɛ tɔrɔyɛ wo ma Mari ya min sigi a ma. Wo kɔma, wonu kelen-kelennamɛ-bɛɛ ya sɛnɛ anubɛ wodi-gbɛ-dɛɛn-kɔlɔnɛ di a ma.

¹² A ya Marita duwɛ min sɔrɔn tɔɛ kɛ la, wo tenbira a fɔlɔtɛ la. A ya saga waga tan-ni-nani (14,000) sɔrɔn tun. Wo kɔma, a ya nyomo waga wɔrɔ (6,000) sɔrɔn tun. A ya sara-ninki waga fila (2,000) sɔrɔn tun. Wo kɔma, a ya sofɛlɛ waga kelen (1,000) sɔrɔn.

¹³ Wo kɔma, a ya den-kei mɔgɔ wɔrɔnfila gbɛrɛ ani dunmusu mɔgɔ sawa sɔrɔn.

¹⁴ A ya ala dunmusu-sirɛ tɔgɔ sa Yɛmaima. Ala dunmusi fila nyɔgɛ, a ya wo tɔgɔ sa Kɛsaya. Ala dunmusi sawa nyɔgɛ, a ya wo tɔgɔ sa Kɛrɛnhapuka.

¹⁵ Musu-wo-musu sa duninya rɔ min kin ka ke ala dunmusu sawɛ kɛnu tɔ. Anu fa ya anu denu fanan kɔ a kɛɛ rɔ ala den-keinu tɛma.

¹⁶ Yobula tɔrɔyɛ kɛ mumɛ bɛɛ kɔma, a ya san kɛmɛ ani san bi-nani (140) bɔ. Hali a mamanɛnu anubɛ a tolo-birɛnu, a ya wonu yen a yɛ la.

¹⁷ A kɔrɔyanɛ kɔbɔkɔbɔ, a nara to so-sɛgi-kɛla.