Yobu 40 - ALLALA KUMƐ

Marita Kumɛnu

^1-2 Yobu, ile min sɔnɛ nde, Alla Sɛnbɛ-Bɛɛ-Tigi kan ma, fɔ i wa nde yabi le, ni wo ma, ka i wasa don.

Yobuta Kumɛnu

^3-4 Mari, n ya kun-takolonya-kumɛ le fɔ. N si nfen fɔ gbɛ? N dɛ ra ara gbɔngbɔn. Kuma-wo-kuma sa n bolo tun n si min fɔ.

⁵ N bara kumɛ minnu fɔ, wonu kolo nde nyɛrɛ ko.

⁶ Mari kumara Yobu ye fɔn-digidigi-wɛ rɔ tun.

Marita Kumɛnu

⁷ Yobu, i sɔ gben, ka i butɛ kiri iko kei. I ni nna kumɛnu yabi.

⁸ I ye a fɔla ko nna koenu ma telen, wa? A sɔgɛ ye i la, ile ni yo sɔrɔn nde ma?

⁹ I ragbɛlɛ iko nde? I kuman-kan si ma san-sɛran la iko ndetɛ, wa?

¹⁰ Nba, ni ile si ke wonu mala le, i nyɛrɛ makiri gbiliyɛ anubɛ sɛnbɛ la. Fanka anubɛ bonya bila i kan na.

¹¹ Ila diminyɛ labɔ gbɛ rɔ alako mɔgɔ-wasinɛnu ni anu famayigi i sɛnbɛ la.

¹² Ni minnu ya anu nyɛrɛ lɔn fen na, i ni anu nayarabi. Karagbɛlɛnu sɔnɛ kan min, i ni anu gbesi a rɔ nyɔ.

¹³ Anu dama togon anu nyɔgɔn fɛ. I ni anu nadon lakira anu nyɔgɔn fɛ.

¹⁴ Ni i si ke wo damasi mala, nde le fɔlɔn si ma i matɔgɔlɛ la ko i si ke le i nyɛrɛ lakananna.

¹⁵ I miri sogo-ba ma. Nde le ya wobɛ wo dan. A ye binyɛ dɔnna iko ninki.

¹⁶ A sɛnbɛ ye a lenkan rɔ. A fasɛnu tabalannɛ kɛtɛn!

¹⁷ A kɔɛ kankarantan iko kɔlɔma. A woro-fasɛnu tabalannɛ iko serema-yilinu.

¹⁸ A kolenu tagbɛlɛ iko silɛɛ, ado anu tagbɛlɛ fanan iko nɛgɛ.

¹⁹ A makawara nima-fan bɛɛ ko, ado fɔ a dannɛ, wo le si a nɔ.

²⁰ Sogo-feremɛnu bi tolonna kɔnkɛ minnu ma, ale si a de-nyini-fannu sɔrɔn nyɔnu denu tɔ.

²¹ A si a sulen wɔnɔ-firɛ kɔrɔ. A si a dogon sɔnfɔn rɔ fuyi tɛma.

²² Yi-dala-kɔlɔmanu ninɛ si ma a sa tinɛ la. A lafoonɛ tolan la.

²³ Hali bɛ tenbi yanbɛ gbesila, a ti kilan wo la. Hali a yigira Yorodan ba-fanɛ rɔ, wo ni a bira a dɛ ma, wo bɔrɔ sa a ye.

²⁴ Yon si ke a yɛ lafinna, a ni a bira? Yon si a sunyɛ sɔgɔ lunyɛ la?