Yobu 4 - ALLALA KUMƐ

Kuma Ratantan Fɔlɔtɛ Yobu anubɛ A Diyana-Mɔgɛnu Tɛma Ɛlifasita Kumɛnu

^1-2 Ni n kumara i ye, i si i tole masɔ n na, wa? N ti ke kumɛ wonu birala n tɔ.

³ Ile nyɛrɛ-nyɛrɛ ara mɔgɔ-siyaman karan nya min, i miri wo ma tun! I taranta mɔgɔ-tɔrɔni-siyaman dɛnbɛna nun.

⁴ Minnu bara bɔ Allata kilɛ fɛ, ado sɛnbɛ sa anu bolo ka sɛgi, ita kɔntɔ-diya-kumɛnu ya a ma, wonu ya anu nasɔ tun.

⁵ Kɔnɔ kaka, tɔrɔyɛ ara na ile kuma, yaga, ile ti ke i munna wo kɔrɔ.

⁶ I ya Alla bato, ado fɛɛ sa i la, woletɔ yili-madiyɛ anubɛ yigi ni taran i bolo kɛ rɔ.

⁷ I miri tun! Ha bi, i wara mɔgɔ-telennɛ yen tɔrɔya sufa kɛ rɔ? Fɛɛ sa min na, kasarɛ si na wo ma, wa?

⁸ Ni ndetɛ le, ni min ya hakɛ wɔrɔ ka karagbɛlɛyɛ fui a rɔ, anu ti fenfen tɛgɛ nyɔ fɔ karagbɛlɛyɛ.

⁹ Alla wa anu fɛ, anu si halaki. Ni Alla fonde bɔra, anu si kasara.

¹⁰ Karagbɛlɛnu bi hirendi-hirendila ka kurun iko yarɛ kɔnɔ Alla si tɔn sigi wo la anu bolo ka anu nyin keri gbasu!

¹¹ Ni yarɛ ma soge sɔrɔn a si min dɔn fɔ a wa faga, ala dannu ta si nyɛnsɛn a ma. A si ma karagbɛlɛnu na wo nya na le fanan.

¹² Kumɛ fɔra nde, Ɛlifasi ye dogon rɔ. A manɛ iko anu bi wɛwɛ-kumɛ le fɔla n tolo tɔ.

¹³ Wonu fɔra n ye kiyo-makilannɛ rɔ bi. Wo mara n na wo tumɛ kinɔgɔ tenbira n ma peru!

¹⁴ N fɛrɛ mumɛ bɛɛ tora yɛrɛyɛrɛnna kumakɔɛ bolo. Hali n kolenu bi yɛrɛyɛrɛnna.

¹⁵ Fan do fɔnyɔ gbesira n yakɔrɛ la milomilo iko nyinɛ ha n kun-sigi tagamanta n kuma.

¹⁶ N ya fan do sɔnɛ yen n yakɔrɔ. N ya a mafɛlɛn sin, kɔnɔ n ma ban a ragbɛla. A sigira a la yen, wati-kundu-ni kɔrɔ, wo kɔma, n ya kuman-kan lamɔɛn.

¹⁷ Kuman-kan wo ko, “Ka a fɔ mɔgɛ si telen Alla yala, wo si ke mala le, wa?” A ko, “Mɔgɔ si to, fɛɛ sa a la a Dannɛ yala?

^18-19 Allata wɔli-kɛlɛ minnu bi san-kole rɔ, ni a ma la wonu na, nfenna gbɛ, hadama-dan minnu bɔra gbangban rɔ, a si la wonu na? Hali melikanu, ni a si fɛɛ yen wonu na, nfenna gbɛ, Alla si la hadama-dan la min tatɛn-koe ma gbɛlɛ iko kondokonde?

²⁰ Ka a bi sɔgɔmɛ ma ka a sigi wurɛ la, mɔgɛ wo wara-koe si ka-a-la. Anu na si to dogbe! Mɔgɔ-wo-mɔgɔ ti sui anu bara-koe la.

²¹ Fan min bɛɛsi ye anu bolo, anu si wonu to anu kɔma. Anu ba faga tumɛ min, Alla wara-koe ti gbɛ anu ye.”