Yobu 39 - ALLALA KUMƐ

¹ Ile ya sensɛ den-sɔrɔn-tumɛ lɔn? Woyan tenbi den sɔrɔnna, ile ara wo ragbɛ?

² A buyi ye karɛ min nyɔgɔn yatɛ bɔla, i si ke wo lɔnna? I ya a lɔn ni anu si dan sɔrɔn samɛ, ka, telemɛ rɔ?

³ A ye wolonna wati min ka ala dan labɔ fɔnyɔ la, i si wo wati lɔn?

⁴ Ala dannu ta si gbɛlɛya binyɛ rɔ gbon! Kɔnɔ tɔ-a-la, anu si anu na boloka ka ta anu kun fɛ.

⁵ Yon ya firala-baanu kan bɔ ka anu kun naka?

⁶ N ya wula-da-rakolɔn ma anu barɛ la. N ya a ma, anu sigira kan-tina-yogomɛ rɔ.

⁷ Baa wonu ti anu gbɛrɛn soe ma bawo sɔnkɛ ma di anu ye. Anu sa anu nagbengben-kannu namɔɛnna binyɛ rɔ.

⁸ Baa wonu de-nyini tinɛ ye kɔnkɛnu tɛma. Anu si anu yɛ lakalan yanba-kun-kuran ma nyɔ le.

⁹ Sigi si ke wɔlila mɔgɔ ye, wa? A si sɔn kila wɔrɛ rɔ?

¹⁰ Ile si ke wo yili birala, a ni dugi rasin i ye? Ile si ke a mala, a ni sara-dɛɛ sagan i ye?

¹¹ Ile si ke i yigi sala sigi wo sɛnbɛ-wɛ kuma alako a ni ila wɔli-gbɛlɛmɛnu kɛ i ye?

¹² I lara a la ko a si ke ila fui-fen-tɛgɛnɛ madununa i ye gbere-kole ma?

¹³ Selekona si a kanban ragbesi sewɛ bolo kɔnɔ a kanban ma ke yɛgɛ-faga-kankotɛ rɔ.

¹⁴ Selekona kɛnɛna a kɛwɔli dogonna kɛn-kalamɛ rɔ,

¹⁵ a sa a mirila lefan ko fan do si na a kian sɔ a rɔ.

¹⁶ A si ala dan wonu bira boloko-yogomɛ-kɛ iko ale ma wonu sɔrɔn. A manɛ iko ale le gbuyɛ ma tɔrɔ a kɛwɔli wonu sa tinɛ.

¹⁷ Nde, Mari ma hɛnkili-kɛndɛ di a ma fɔ ka a ma kun-takolɔn la

¹⁸ kɔnɔ a tenbi a burila, a si belen soee anubɛ a laburilɛ la.

¹⁹ Yobu, ile le ya kɛlɛ-kɛ-soee ragbɛlɛya? Ile le ya a kan-kolema-siyi ladan ko a ni to magala?

²⁰ Ile le ye a mala, a kinta-kan ye sɔnkɔla iko kondɔn-biriti-wɛ? Ile le ye a mala, a sun-tafɛ-kan ye mɔgɛnu mabanna?

²¹ A ye dugi wɔnsɛnna a sɛbɛ-kuna-wɛ la alako a burumatoe ni ta a lagbesi kɛlɛ rɔ.

²² Hali kilan, a tamayi sa a rɔ. Faan fenfen ti a ma, a ni sɛgi.

²³ Kɛlɛ-kɛ-fan minnu bi a laburilɛ tɔnkɔn rɔ, wonu bi tala gbesila anu nyɔgɔn na, ado a malan ye tiila tanbɛ ma tele kɔrɔ.

²⁴ A makinɛ ye kɛlɛ magbenna, a ye a burila a sɛbɛ-kuna-wɛ la. A wa kɛlɛ-kɛ-buru-kan lamɔɛn, a ti ke a sɔla a gba kelen tɔ.

²⁵ Buru-fɛ-kan anubɛ sun-tafɛ-kan ye bɔla anu nyɔgɔn fɛ le. A ye tola wula-yan le la, a ni kɛlɛ-sumɛ mabira ka kɛlɛ-kurugbɛ sɛrɛn-kan lamɔɛn.

²⁶ Tanbakɔrɔmanɛ ye a kanban rafulan min kɛla dugula wara la, ile le ya a labila wo la?

²⁷ Kokɛ ti ta a nyagan sa san ma, fɔ a wa i makɔni, i ni a fɔ a ye, wa?

²⁸ A warɛ le fara kɔnkɔ-layan-bɛ-kumɛ la bawo nyɔ le a latanka tinɛ la.

²⁹ A tenbi nyɔ, a si a yɛ lakalan a tɔgɔ fɛ anubɛ wula-yan la ka a dɔntɛ nyini.

³⁰ I si a yen sogo-suyi fɛ. Ala dan ye a yele minna.