Yobu 37 - ALLALA KUMƐ

¹ Banda-fin-fɔnyɔ si a ma, n yisi ni to yɛrɛyɛrɛnna kilan bolo.

² Wo dama ni wo tole masɔ Allata kumɛ la min bi bɔla a karɛ rɔ san-sɛran rɔ.

³ A si banda-nyin-masɔgɛ lakɛ ka a bi duninya dan doi la ha ka ta a sigi a dan doi ma.

⁴ Wo kɔma, san min bi sɛrɛnna wo la, Alla kuman-kan-makilanni-bɛ le wo la min bi bɔla a karɛ rɔ. Wo bɛɛ rɔ, banda-nyin-masɔgɛ ye kɛla.

⁵ Alla tenbi kumala, kabana-ko-wɛnu bi mala, ma ti ke minnu nya-yenna, ado male hadama-dannu ti ke wonu dan lɔnna.

⁶ A si a fɔ banda-kole ye ko a ni bui dugi ma. Wo kɔma, a si a fɔ bandɛ ye ko a ni na bɛrɛbɛrɛ-wɛ-kɛ.

⁷ Wo bɛɛ si tɔn sigi hadama-dannuta wɔlɛ la alako mɔgɛ bɛɛ ni Allata ko-ladan-bole yen anu yɛ la.

⁸ Banda-belebele wo le si a ma, sogenu ni don denkɛ anubɛ farannu na.

⁹ Alla si a ma, fɔnyɔ ni bɔ a lamara tinɛ, kimɛ fanan ni bɔ a bɔ tinɛ.

¹⁰ Alla ye fɔnyɔ min nabɔla a karɛ rɔ, wo si a ma, yi ni gbɛlɛya iko banda-kole.

¹¹ Bandɛ si a nyin masɔgɔ banda-finyɛ rɔ

¹² iko a di Alla ye nya min. Banda-finyɛ ye tala kan tinɛ bɛɛ rɔ duninya rɔ iko a di ale Alla ye nya min.

¹³ Alla si bandɛ lana ka dugu-yi sa. A si a lana mɔgɛnu tɔrɔ-koe la, ni wo ma, a si ala keninteyɛ yira mɔgɛnu na.

¹⁴ Nba Yobu, i wɔlɔ matɔlɔ fɔlɔn, Alla ye kabana-koe minnu mala, i miri wonu ma.

¹⁵ Ile ya a lɔn Alla ye wonu mala nya min? San-nyin-masɔgɛ ye bɔla banda-finyɛ rɔ nya min, ile ya wo lɔn?

¹⁶ Alla ya kabana-ko-wɔlɛ min kɛ ka banda-finyɛ kɛ dun san ma, i ya wo lɔn?

¹⁷ Ile si wusi tirindi tele kɔrɔ dɔrɔn. Dugula-fɔnyɔ si a ma, nyamanɛ ni kaliya kodokodo!

¹⁸ Ile si ke Alla dɛnbɛna san-kole rafulen tinɛ ka a manunku iko nyɛrɛ-mafɛlan min manunkunɛ pinapina?

¹⁹ Nba Yobu, ma si min fɔ Alla ye, ma labila wo la bawo ma ye pinpi le tɔ kɛ la. Ma sa ko-wo-ko kalama.

²⁰ Kɔnɔ ni nde le, kuma-wo-kuma sa n bolo tun n si min fɔ Alla ye alako n kana n kasara-kilɛ yira a la.

²¹ Fɔnyɔ wa banda-finyɛ firan tele ya ma, mɔgɔ-wo-mɔgɔ ti ke a yɛ gbangbanna tele la.

²² Allata wan-gbiliyanɛ si bɔ kantɔ-wara la. Ata kabana-ko-wɛ ye ma rakilanna.

²³ Ma ti ke ma gbɛrɛnna Alla Sɛnbɛ-Bɛɛ-Tigi ma ka a tɛgɛ ata kabana-koe wonu ma. A telennɛ mɔgɛnu ye tede!

²⁴ Mɔgɛ bɛɛ ye kawala a ma. Ni mɔgɛ min miri ko a hɛnkili kolo, Alla ti a wɔlɔ matɔlɔ wo tigi la.