Yobu 36 - ALLALA KUMƐ

^1-2 I mun n kɔrɔ doni. I ni i wɔlɔ matɔlɔ n na. N ni Allata sarakanɛ fɔ i ye.

³ N si hɛnkili-siyaman nabɔ ka a yira wo la ko Alla min ya n dan, wo telenni de!

⁴ N bi nala min bɛɛsi fɔla, foninya ma wo do-wo-do la. Wo si a lɔn yati, ko hɛnkili-bɔrɔ-tigi-bɛrɛbɛrɛ le wara sɔ wo yakɔrɔ kɛ la.

⁵ Alla makawara kɔnɔ mɔgɔ-wo-mɔgɔ ma gbo a ye. Ko-wo-ko sa nyɔ a ma min lɔn.

⁶ A ti sɔn hakɛ-tiginu ni to anu niyi la. A ye ko-telennɛ mala bolo-kolɔnnu ye tuma-wo-tuma.

⁷ A ye mɔgɔ-latelennɛnu kumafunfanna. Alla wa mɔgɔ ma mansɛ la, ni mansɛ wo wasira ala mɔgɛnu kuma,

⁸ a si a ma, yɔlɔkɛ ni kɛ mansɛ wo ma.

⁹ Anuna karagbɛlɛyɛ ye nya min, Alla si wo yira anu na. Anu wasinɛ nya min hakɛ kɛ rɔ, a si wo fanan yira anu na.

¹⁰ A si anu makawandi bɛrɛbɛrɛkɛ alako anu ni anu fara anuna karagbɛlɛyɛ la.

¹¹ Ni anu ya Allata kumɛ bira ka ata wɔlɛ kɛ, a si a ma, anu ni taran anu diya yisi-kimɛ rɔ.

¹² Kɔnɔ ni anu ti anu tole masɔ a la, a si a ma, anu ni faga kun-takolonyɛ rɔ ka lakira-salan tɛgɛ.

¹³ Mɔgɛ minna ko sa Alla wara-koe rɔ, wonu bi tola yisi-magboyɛ le kun na. Hali anu ba tɔrɔyɛ sɔrɔn, anu ti Alla madiya.

¹⁴ Anu pose le tɛgɛla a ma bawo anu tora kisimiriya-koe le ladanna.

¹⁵ Alla si tɔrɔyɛ ma anu karan-fan la. A si anu yɛ laka yakɔrɔ-mamɔɛ la.

¹⁶ Nba, n fa Yobu, a sɔgɛ ye Alla la ka karɛ bɔ i ma. A ye i kelela i lafɛrɛ tinɛ. Alla ya dɔn-fen-sufa bɛɛ raka ila tebulu kuma

¹⁷ kɔnɔ kaka, tɔrɔyɛ min bɛnta karagbɛlɛnu ma, wo ara ma itɛ la.

¹⁸ A ma i fɛrɛma, nɔnfuli kana i bɔ Allata kilɛ fɛ, ita fen-tigiyɛ kana i yɛlɛma.

¹⁹ Ila nɔnfuli anubɛ ila sɛnbɛ si i bɔ tɔrɔyɛ kɛ rɔ, wa?

²⁰ I kana gbaran suyila ke la bawo mɔgɛnu sagan-wati le wo la anuna bɔn la fɔrɔsɛ la.

²¹ I kana don karagbɛlɛyɛ rɔ tun bawo wo le ya i ladon tɔrɔyɛ kɛ rɔ.

²² I miri Allata sɛnbɛ kolo nya min. Karan-mɔgɛ bɛɛ kun-tigi le ale la.

²³ Yon si ke kilɛ sala Alla kɔrɔ? Yon si ke a fɔla Alla ye ko a ara ko-yogomɛ ma?

²⁴ Mɔgɛnu bi a tantola ata kabana-ko-wɔlɛnuna ko la. A bɛnta, i ni to a tanto-bɛtinu bɔla wo rɔ.

²⁵ A ye kabana-koe minnu nadanna, ma si to wula-yan la ka wonu yen ma yɛ la tuma-wo-tuma.

²⁶ Mɔgɛ ti ke Allata kabana-koenu nya-yenna muk! Alla ara san min nyɔgɔn bɔ, ma ti ke wo yatɛ lɔnna.

²⁷ Alla le ye yi labɔla dugi rɔ ka a yɛlɛma bandɛ la.

²⁸ A ye a mala, bandɛ ye nala alako mɔgɛ bɛɛ ni yi sɔrɔn.

²⁹ Banda-finyɛ ye tala nya-wo-nya, mɔgɔ ma wo lɔn. San-gbalamɛ ye seren-serenna nya-wo-nya Alla warɛ san ma, mɔgɔ-wo-mɔgɔ ma wo lɔn.

³⁰ A si a ma, bandɛ ni a nyin masɔgɔ kan tinɛ bɛɛ rɔ san-kole rɔ. Wo si waan raka hali kɔgɔ-yi-dumɛ rɔ.

³¹ Alla si bandɛ lana ka le ka mɔgɛnuna beli-fannu yi sa.

³² Alla si banda-nyin-masɔgɛ bira a kɔɛn-nyɛrɛ rɔ ka a lata kan tinɛ rɔ a miri ye min ma.

³³ San-sɛran ye nala fɔnyɔ la a bolo. Hali kolo-fannu, wonu si kala sɔrɔn fɔnyɔ wo na-koe ma.