Yobu 35 - ALLALA KUMƐ

^1-2 N fa Yobu, a ma bɛn, ile ni a fɔ ko fɛɛ sa ile la Alla yala.

³ I ye a fɔla Alla ye ko, “Nfenna nta hakɛ ye n tɔrɔla?” I ye a fɔla tun ko ni ile ya i fara hakɛ la, tɔnɔ-nyamintan bi wo rɔ ile ye.

⁴ Nba, n bi nala wobɛ i diyana-mɔgɛ kɛnu yabila.

⁵ I yɛ layɛlɛ san-kole ma. I ni a yen banda-finyɛ fɛ-yan ma la nya min.

⁶ A fɔra i ye le ko ni i ya hakɛ kɛ, wo si a gba sa Alla ma? Hali i ya hakɛ lawara, wo ti Alla yakɔrɔ-mamɔ mumɛ!

⁷ Hali i mara telenbagɛ la, Alla si tɔnɔ-nyamintan sɔrɔn wo rɔ? Alla sa nyinina fenfen ma i bolo.

⁸ I hakɛ ye i hadama-den-nyɔgɛnu denu tɔrɔla dɔrɔn. I ya ko-nyima wo ko-nyima ma, wo tɔnɛ si to wonu denu ye.

⁹ Mɔgɛnu ba tɔrɔyɛ sɔrɔn, anu si to gbɛngbɛrɛnna. Anu si di mɔgɔ-gbɛrɛnu dala alako wonu ni anu nakisi fankalamɛnu ma.

¹⁰ Alla min ya anu dan, anu ti anu ya-lamunun wo la, ado ale le si ke anu yili-madiyala tɔrɔya-wati rɔ.

¹¹ Alla min bi hɛnkili dila mɔgɔ ma, anu ti anu ya-lamunun wo la, ado a kɛnɛna hɛnkili dila mɔgɔ ma ka tenbi soge anubɛ konanu na.

¹² Mɔgɛnu kɛnɛna dila anu dɛnbɛn-koe rɔ kɔnɔ Alla ti anu mafɛlɛn ka a tɛgɛ anuna wasinteyɛ ma.

¹³ Anu di-kɛ-kunya sa nyɔ bawo Alla Sɛnbɛ-Bɛɛ-Tigi ti anu mafɛlɛn hali ka anu kan lamɔɛn.

¹⁴ Yobu, ile ye a fɔla ko i sa Alla yenna. Kɔnɔ ile ni a makɔni tun. Ita kiti wo ye Alla bolo.

¹⁵ Ile ya a fɔ nun ko Alla ti mɔgɔ tɔrɔ. I ye a fɔla fanan tun ko Allata sa hadama-dan hakɛ wara-koe rɔ.

¹⁶ A gbɛnɛ n ye feu, ko ile Yobu ya kumɛ min bɛɛsi fɔ, kun-takolonya-kumɛ le wonu na. I ye fenfen fɔla, i sa wo kalama.