Yobu 32 - ALLALA KUMƐ

Ɛlihu Wara-Koe

¹ Yobu lara a la min kɛ ko a yilikini ma, a ta-nyɔgɔ mɔgɔ sawɛ wonu ya anu fara a yabila ka anu tade.

² Kɔnɔ mɔgɛ do ye nyɔ nun min tɔgɛ Ɛlihu. A tole masɔnɛ anu na. A ma ke a yisi birala tun bawo a ye a yenna ko Yobu ye a nyɛrɛ latelenna ka a tɛgɛ sigi Alla ma. Rama bɔnsɔn-mɔgɛ do le Ɛlihu kɛ la. A benba tɔgɛ le Busi. A fa tɔgɛ le Barakɛli.

³ Wo kɔma, ale Ɛlihu diminyara Yobu diyana-mɔgɔ sawɛ wonu ma bawo anu ma ke Yobu yabila a kilɛ fɛ. Woletɔ a manɛ iko Alla le wara ko-yogomɛ ma Yobu la.

⁴ Ɛlihu ya a rade ha anu dama banta kumala bawo anu kina ale ko.

⁵ A ya a yen min kɛ ko mɔgɔ sawɛ wonu ma ke Yobu yabila a kilɛ fɛ, a diminyara.

⁶ Nba, Ɛlihu ya kumɛ dabira. Bawo dennɛ le nde la, kina le wole la, woletɔ n ma sisi kumala ka nta tonyɛ fɔ wo ye.

Ɛlihuta Kumɛnu

⁷ N ya n miri n nyɛrɛ ma ko wole ni hɛnkilimaya-kumɛ fɔ bawo kina le wole la.

⁸ Kɔnɔ Alla Sɛnbɛ-Bɛɛ-Tigita niyi min bi mɔgɛ rɔ, wo le si hɛnkili di mɔgɔ ma.

⁹ Ka a fɔ kinayɛ si hɛnkilimayɛ di mɔgɛ ma ka ko-latelennɛ lɔn, wo dɔrɔn ma de!

¹⁰ Woletɔ wo ni wo tole masɔ n na. Min bi nde yili ma, n ni wo fɔ wo ye.

¹¹ Wole ye kumala wati min, n ya n tole masɔ wo la. Wo ye hɛnkilimaya-kumɛnu fɔ-koe rɔ, n ya a bira n tɔ.

¹² N tole masɔnɛ wo la a kin na! N ya a yen, wo ma Yobu nɔ muk! Wo ma ke Yobu sɔn yirala a la.

¹³ Wo si ke a fɔla wo rɔ kama ko wo ara hɛnkilimayɛ sɔrɔn? Fɔ Alla wa Yobu yabi bawo wole ara foo fɛlɛlɛ!

¹⁴ Wolebɛ Yobu le ye kumɛ ratantanna wo nyɔgɔn tɛma nun, nde ma de! Ni malebɛ Yobu le ye kumɛ ratantanna ma nyɔgɔn tɛma nun, n ti a yabi nun iko wole ya a yabi nya min.

¹⁵ Nba, n fa Yobu, i yabi-bolo-wo-bolo sa anu bolo. Anu hɛnkili ya ara basan pirikali!

¹⁶ Anu sa kumala min kɛ, nba, n ni n tade wo rɔ, wa? I yɛ lata anu sɔnɛ ma, kuma-wo-kuma sa anu da rɔ tun.

¹⁷ Nba, nde si i yabi gbɛ! Min bi n burɔ, n si wo fɔ i ye.

¹⁸ Ka a fɔ n ni a bira n tɔ doni bɛrɛni, wo ti kun n tɔ.

¹⁹ Ni n ma fɛrɛ sɔrɔn ka kuma, n si tii pɔ iko baan-feremɛ kɛnɛ barɛ min tɔ.

²⁰ A fɛrɛ-wo-fɛrɛ sa, fɔ n ba kuma.

²¹ N ti lafisayalɛ kɛ hali ka sɔ wole do fɛ kumɛ kɛ rɔ. N sa kuma-teleka-teleka fɔla mɔgɔ-wo-mɔgɔ ye.

²² Ka tenbi wo la, n ma kusan wo la lefan! Ni n ya wo ma, n Dannɛ Alla si n tɔrɔ tiriya!