Yobu 3 - ALLALA KUMƐ

Yobu Nimisa-Koe A Sɔrɔn La

¹ Tele wɔrɔnfilɛ wo banta tumɛ min, kumɛ bɔra Yobu dɛ rɔ. A ya a sɔrɔn-tele danka.

Yobuta Kumɛnu

^2-3 E, Alla, alamɛ n sɔrɔn-tele ya dankɛ sɔrɔn. Min kolo wo ko, n na ya n buyi bi suyi min tɔ, alamɛ wo fanan halakira.

⁴ Alamɛ wulɔn mara tele-finyɛ la. Ile Allata ko kana taran wulɔn-telela ko rɔ. Alamɛ wan-takɛ kana ke a ma.

⁵ Alamɛ ila pinpi-makilanni-bɛ ya ale tele wo yamatogon. Alamɛ banda-fin-digidigi-wɛ burunta wulɔn-tele ya ma bɛff! Suyi wo, pinpi-mɔlɔkɔn-bɛ ni wo lakunu.

⁶ Alamɛ wulɔn-suyi kana taran karɛ-wo-karɛ rɔ tun! Alamɛ wulɔn kana taran san rɔ tun!

⁷ Alamɛ musu-wo-musu kana buyi bi wulɔn tun! Alamɛ wulɔn-suyi kana ma sewa-tumɛ la suyi doinu tɛma san la.

⁸ Mɔgɛ minnu bi dankalɛ kɛla, alamɛ wonuna dankalɛ ya tele wo lakunu. Duri min si a ma, ninkinankɛ ni tele latunu, alamɛ wonu ya a ma, ninkinankɛ wo ni tele wo latunu.

⁹ Alamɛ wulɔn-banda-ka-dama-lole tununta yen! Alamɛ wulɔn-suyi kana yili-madiya fenfen sɔrɔn ko bandɛ ye kala.

¹⁰ I ni wulɔn-suyi danka bawo a ma n na buyi dan lakiri n ma alako n kana kɛ sufa tɔrɔyɛ rayen.

¹¹ Alako nun, n niyi bɔra n na burɔ nun. Ni wo ma, n sɔrɔnta nya min nun, n pulan ni bɔ n na bolo nun.

¹² Alako nun, anu kana n pulan sa n na kian kuma. Alako nun, n na ma n susun.

¹³ Ni n dennɛ le fagara nun, n bi n fanbolo nun kaka. N bi n sulen tinɛ le gbɛ!

¹⁴ Ni n fagara le nun, n si taran n fanbolo mansɛ anubɛ mɔgɔ-banu fɛ lakira minnu ya bon-hakikɛnu sɔ duninya rɔ nun. Ado nfan, anuna mansaya-bɔn wonu bara tenbi, bi ma!

¹⁵ N si ma nun iko kun-tigi-tenbinɛ minnu kanbɛnu nafara sɛnɛ anubɛ wodi-gbɛ la nun.

¹⁶ Alako nun, n suyi bɔra n na burɔ. Alako nun, n yɛ la ma ka.

¹⁷ Karagbɛlɛnu si fara anuna karagbɛlɛyɛ la lakira. Tɔ-a-la, lakira le wɔli-kɛla-bandannɛnu sulen tinɛ la.

¹⁸ Hali yɔɔn-biranɛnu, wonu si taran anu diya yisi-kimɛ rɔ lakira bawo mɔgɔ-wo-mɔgɔ sa nyɔ min si nyɛɛ anu ma wɔli-kɛ-koe rɔ.

¹⁹ A mara mɔgɔ-ba la wo, a mara mɔgɔ nɛ la wo, bɛɛ ara ta ma dama ta tinɛ, ado yɔɔnya-ko sa nyɔ.

²⁰ Minnu bi tɔrɔyɛ rɔ, nfenna wo si to tɔrɔyɛ kun na? Nfenna yisi-lafin-tiginu si to anu niyi la?

²¹ Saya-sɔgɛ ye anu na kɔnɔ anu ti faga. Anu si kanbɛ keni nɔnfuli ko.

²² Anu ti sewa muk, fɔ mɔgɛnu ba anu togon.

²³ Yigi-wo-yigi sa min bolo yarɔ ma, nfenna wo mɔgɔ si to a niyi la? Ka tenbi wo la, Alla ara wo tigi niyi ragbɛrɛn.

²⁴ Fɔ ka to yɛlɛla a ma fekufeku, nta dɔn-fan ye wo le dɔrɔn na. Fɔ kurɔn, wo le mara nta min-kɛ-yi la.

²⁵ N kilanta koe min bɛɛsi la, wo damasi ara n masɔrɔn. Koe min bɛɛsi hɔnya ye n kan la, wo bɛɛ ara sa n kuma terr!

²⁶ Sulan anubɛ yisi-kima sa n bolo muk! Nta kɔndɔfili ti ban dɛɛ!