Yobu 28 - ALLALA KUMƐ

Hɛnkilimayɛ Matɔgɔ-Koe

¹ Denkɛnu bi nyɔ, mɔgɛnu bi wodi-gbɛ sɔrɔnna kan min. Kan-tinɛnu bi nyɔ, anu si sɛnɛ layigi kan min.

² Mɔgɛnu bi nɛgɛ bɔla dugi kɔrɔ. Anu bi kurinu kɛla tɛ rɔ ka silɛɛ bɔ wonu tɔ.

³ Hali pinpi burunnɛ dugu-kɔrɔ bɛff, anu bi nɔnfuli nyinina nyɔ rɔ. Anu bi kuru-da-gbɛlɛ wonu sinna pinpi rɔ.

⁴ Mɔgɛnu bi sinni kɛla denka-rayan-bɛnu burɔ minnu fɛ-yan kila-kole anubɛ mɔgɛnu sigi tinɛ la. Anu kirinɛ yili-kole la ka kelengbɛya-wɔlɛ kɛ wandan burɔ.

⁵ Mɔgɛnu bi dɔn-fan sɔrɔnna dugi min tɔ, anu si sɛgi wo le sinna tun ka kurinu tatii tɛ la dugu-kɔrɔ nyɔ.

⁶ Kuru-da-gbɛlɛnu si bɔ kuri wonu tɔ. Sɛnɛ si bɔ a bɔnkɛ wonu tɔ.

⁷ Bibi fenfen ti dugu-kɔrɔ-kilɛ wo yen. Dogɛ-wo-dogɛ ti ke kilɛ wo lɔnna.

⁸ A yara wo, a sogo-ferema-gbɛrɛkɛ wo, wo do-wo-do ti tagama dugu-kɔrɔ-kilɛ wo fɛ.

⁹ Farɛ min gbɛlɛ gben, mɔgɛnu bi wo sinna. Anu bi kɔnkɛnu kɔrɔbɔla.

¹⁰ Anu tenbi farɛ wo punsɔgɔla, anu bi dugu-kɔrɔ-nɔnfulinu sɔrɔnna a rɔ.

¹¹ Anu si yi-kunyɛnu balan alako fan minnu yamatogonnɛ si bɔ gbɛ ma.

¹² Kɔnɔ mɔgɛ si hɛnkilimayɛ yen mintɔ? Mɔgɛ si ko-kɔrɔ-lɔn sɔrɔn mintɔ?

¹³ Mɔgɔ ti hɛnkilimayɛ taran mɔgɛnu tɛma. Mɔgɔ-wo-mɔgɔ ma hɛnkilimaya-mɔlɔn-dan lɔn.

¹⁴ Kɔgɔ-yi ye a fɔla ko, “Hɛnkilimaya sa nde bolo de!” Hali a dumɛ ko, “Hɛnkilimaya sa nde fanan bolo de!”

¹⁵ Mɔgɔ ti ko-kɔrɔ-lɔn san sɛnɛ la. Mɔgɔ ti hɛnkilimayɛ san wodi-gbɛ la.

¹⁶ Hali sɛnɛ-bɛrɛ anubɛ kuri minnu dɛ gbɛlɛ ha ka a dan-natenbi, wonu mɔlɔn ti ke hɛnkilimayɛtɛ rɔ.

¹⁷ Mɔlɔn wo tenbira sɛnɛ-miran anubɛ kuru-da-gbɛlɛnu bi fan minnu tɔ pirr!

¹⁸ Hɛnkilimayɛ tenbira yi-kɔrɔ kuru-da-gbɛlɛnu na.

¹⁹ A tenbira kuru anubɛ Itiyopiya sɛnɛ anubɛ dugu-kɔrɔ-nɔnfulu-su bɛɛ la.

²⁰ Hɛnkilimayɛ sɔrɔn tinɛ ye mintɔ worɔ? Ma si ko-kɔrɔ-lɔn taran mintɔ?

²¹ Nima-fen wo nima-fen ti nyɔ yen a yɛ la. Hali kona tenbi san ma, wo ti ke a yenna.

²² Hali lakira anubɛ sayɛ ye a fɔla ko anu denu fanan bara a wara-koe lamɔɛn dɔrɔn!

²³ Alla kelen pe le ya a tina lɔn. Ale le kelen pe ya a lɔn a si yen kan min.

²⁴ A ya a lɔn bawo ale le kelen pe si ke dugu-dankun filɛ yenna a kolan la. Fan min bɛɛsi ye san-kole kɔrɔ, ale le si wonu tagbɛ.

²⁵ Alla ya fanka don fɔnyɔ bolo nya min wo, a ya kɔgɔ-yi dan tɛgɛ nya min wo,

²⁶ a ya banda-yi bu tinɛ dan tɛgɛ nya min wo, a ya kilɛ tɛgɛ san-gbalamɛ ye nya min wo,

²⁷ a nara to hɛnkilimayɛ lakɔrɔsila ka a mɔlɔn tɛgɛ. A ya a mɔlɔn lawanka.

²⁸ Alla ya a fɔ hadama-dan ye ko, “Ni mɔgɛ ko a ni hɛnkilimayɛ sɔrɔn, fɔ a ni nde a tigi fɔlɔn gbiliya. Ni a sɔgɛ ye a la ka ko-kɔrɛ lɔn, fɔ a ni fara ko-yogoma-kɛ la.”