Yobu 26 - ALLALA KUMƐ

Yobuta Kumɛnu

^1-2 N dɛnbɛna-bɛrɛ le wole la, nyɛ? Ninko, wo ya a lɔn ko sɛnbɛ sa n na, nyɛ?

³ Wo rɔ, wo ara nde min makawandi, kun-takolɔn le nde la. N ya a lɔn ko wo ya ko lɔn n ko.

⁴ Yon ya wo labila hɛnkilimaya-kumɛ kɛnu fɔla? Yon ya wo labila kɛwuya-kumɛ kɛnu fɔɛ la?

⁵ Furinɛ minnu bi lakira tungban kɔrɔ wonu bi yɛrɛyɛrɛnna kaka Alla yakɔrɔ nyɔ.

⁶ Furinu bi kan tinɛ min tɔ, Alla kolan ye anu na. Yamatogon-tina-wo-tina ti a ma, a ti anu yen.

⁷ Alla le ya san-kole rafulen kan-tina-rakolɔn rɔ san ma. A ma dugu-kole dun fenfen na.

⁸ Alla le ye banda-finyɛ lafala banda-yi la. Ale le ye a mala fanan, banda-finyɛ wo sa rafarala yi wo la gbiliyɛ bolo.

⁹ A kɛnɛna banda finyɛ sala karɛ gbɛ ya ma. A si a yamatogon wo la.

¹⁰ Pinpi anubɛ waan ye bɛnna kɔgɔ-yi kuma kan min, a ya dan tɛgɛ anu tɛma nyɔ.

¹¹ Alla wa a kara tamaga, kɔnkɛ minnu manɛ sɛnbɛrɛn-kɔn la san-kole kɔrɔ, wonu si yɛrɛyɛrɛn.

¹² Ata sɛnbɛ ye kɔgɔ-yi kuma. Hali ninkinankɛ min bi kɔgɔ-yi rɔ, a ya wo lato dogbe!

¹³ Alla wa banda-finyɛ fɛ, san ma si tɛgɛ tonsen! Fen-makilannɛ min bi yi rɔ, a ya wo rasɔgɔ a kɔɛn la.

¹⁴ N bara koe min bɛɛsi rakaran kɛ, a dɔgɔmɛ le wonu na. Allata fanka-wɛwɛ le wonu na. Nba, yon si ke ata fanka kuma-yɛlɛnɛ nya-yenna worɔ?