Yobu 22 - ALLALA KUMƐ

Kuma Ratantan Sawa Nyɔgɛ Yobu anubɛ A Diyana-Mɔgɛnu Tɛma Ɛlifasita Kumɛnu

^1-2 Mɔgɔ-wo-mɔgɔ sa nyɔ min si ko-nyinya Alla ma. Hali hɛnkilimaya sa nyɔ Alla makoe si taran min na.

³ Ila ko-nyima-kɛ, wo fenfen si Alla Sɛnbɛ-Bɛɛ-Tigi munanfaga, wa? Ila telenbagayɛ fanan si ko-wo-ko ma a la?

⁴ Alla ti ile tɔrɔ bawo i ye ale gbiliyala. A ti i kiti wola ko la.

⁵ A ye wo mala bawo i ya hakɛ-siyaman kɛ! Dan sa ila hakɛnu na!

⁶ Ila yili ye i na-kelen-nyɔgɛ la min kɛ, i wara ala kurɛ bɔ a ma ka a gbu-makolonya.

⁷ E, Yobu, i ya mɔgɔ-bandannɛnu bɛn yi la. I ya i ban dɔn-fan dila kɔnkɔtoenu ma.

⁸ I ya nyamanɛ kɛ bi i sɛnbɛ anubɛ ila sɔ tinɛ la.

⁹ I ya i ban kɛɛ-musinu dɛnbɛn-koe ma. Wo kɔma, i ya kelennɛnu kankan ka anu bira boloko-yogomɛ-kɛ.

¹⁰ Wo le ya a to, gbɛrɛ lasiginɛ ila foolɛ bɛɛ rɔ, ado gbalo si i kumakɔ!

¹¹ Woletɔ pinpi ara don i kuma bɛff! I ti fenfen yen! Woletɔ fanan, tɔrɔyɛ ara tugu i kun na.

¹² Alla min siginɛ san-kole rɔ pon, male ye lole minnu yenna san ma, ale ye a kolan layigila lole wonu ma.

¹³ Kɔnɔ hali wo, ile Yobu ye a fɔla ko, “Alla ya nfen lɔn? Banda-finyɛ ye mabɛ Alla tɛma. A si ke ma kitila kama?”

¹⁴ Ile miri ko, “Alla ti fenfen yen ka a tɛgɛ banda-finyɛ wola ko ma, ado a ye tagamana san-kole kun tɛma pon!”

¹⁵ Karagbɛlɛnu bi tagamana kilɛ min fɛ tuma-wo-tuma, ile ara a latɛgɛ ka tagama kilɛ wo fɛ.

¹⁶ Yanni anuta wati ni ke, wo ya a taran, Alla ara yi latugu anu kun na ka anu firan dugi kɛ kuma yi wo la.

¹⁷ Karagbɛlɛnu ya a fɔ Alla ma ko, “Fara ma la. Alla Sɛnbɛ-Bɛɛ-Tigi ti ke ko-wo-ko mala ma la.”

¹⁸ Hali wo, Alla le ya anu nasabati. Nba, nde ma sɔn karagbɛlɛ kɛnuna miriya ma.

¹⁹ Karagbɛlɛnu tenbi tɔrɔla, mɔgɔ-nyimɛnu si sewa. Ka tenbi wo la, fɛɛ sa mɔgɛ minnu na, wonu si yɛlɛn

²⁰ bawo karagbɛlɛ wonu bolo-fan bɛɛ ara tinya. A toe min tora, tɛ ara wo mintan.

²¹ Nba, Yobu, kaka gbɛ, i ni kɛlɛ-nyɔgɔnyɛ ban wobɛ Alla tɛma. Ni i ya wo ma, a si duwa i ye worɔ.

²² I ni ala karan bira i bolo filɛ la. I ni i hɛnkili to ala kumɛnu ko.

²³ Nba, kaka gbɛ, i ni i sɛgi Alla Sɛnbɛ-Bɛɛ-Tigi ma famayigi rɔ. I ye ko-yogomɛ min kun na nun, i ni tɔn sigi wo la ila bɔn la.

²⁴ I ni ila sɛnɛ lakɛ a rɔ gbangban rɔ. I ni ila sɛnɛ-hakikɛ lafili tungban rɔ.

²⁵ Alla Sɛnbɛ-Bɛɛ-Tigi ni ma ila sɛnɛ la. A ni ma ila wodi-gbɛ-siyamɛ la.

²⁶ Wo si a ma, i ni to lala Alla Sɛnbɛ-Bɛɛ-Tigi la. I si a lɔn worɔ ko ale le kelen pe si i lasewa.

²⁷ I wa a madiya tumɛ min, a si a wɔlɔ matɔlɔ i la. I wara lanyiri minnu kiri wobɛ Alla tɛma, i si wonu natɔnbagaya.

²⁸ I wa i bole don fenfen tɔ, i si wo tɔnɛ sɔrɔn. Wan-takanɛ si taran ila kilɛ la tumɛ bɛɛ.

²⁹ Alla si mɔgɔ-wasinɛ tosokɔrɔ dugi ma. A si mɔgɔ-famayiginɛ latanka.

³⁰ Ni fɛɛ sa mɔgɛ min na, a si wo lakisi katarala min bi ko-latelennɛ kɛla.