Yobu 2 - ALLALA KUMƐ

Yobu Kɔrɔbɔ-Koe Setanɛ Bolo Tun

¹ Lunyɛ do, melikanu tara anu sɔ Alla yakɔrɔ a kɔndɔn tinɛ tun, Setanɛ fanan ye anu tɛma nun.

² Mari ya ale Setanɛ manyinika ko, “Ile ye nfen ma tinɛ nun?” Setanɛ ya a fɔ a ye ko, “N bɔnɛ yigi-ni-yɛlɛ kɛla ka n matagama duninya le tɔ nun.”

³ Mari ya a fɔ a ye tun ko, “I ya nna wɔli-kɛla Yobu yen nun? Mɔgɔ-nyimɛ le ale la, ado a telennɛ. A nyɔgɔn sa duninya rɔ. A ye n batola. A ye a mala a fɛrɛma alako a kana na ko-yogomɛ ma. Hali i nɔrɔta n ma Yobu kasara-koe la, n ma a tɔrɔ-kunya yen i bolo kɔnɔ hali wo, a telennɛ n ye iko a ye nya min nun fɔlɔ.”

⁴ Setanɛ ya a fɔ Mari ye ko, “Ko kɛ fu sa. Mɔgɛ si a bolo-fan bɛɛ di i ma a niyila ko la

⁵ kɔnɔ ni i ya dumɛ sigi a fɛrɛ ma, a si i lafɛya i nyɛrɛ yala!”

⁶ Woletɔ Mari ya a fɔ Setanɛ ye ko, “Awa, n bara a latenbi i ma. A manarangban kɔnɔ i kana a faga de!”

⁷ Setanɛ ya a bɔ Mari dafɛ. A ya a ma, sumunɛ tara fɛrɛnna Yobu fɛrɛ bɛɛ ma purususu!

⁸ Yobu ya bɔnku-daga-gbɛnkian bi ka to ala sumunɛnu mawɔrɔla wo la. Wo ya a taran, Yobu siginɛ sundu-kunyɛ ma.

⁹ Ala musi ya a fɔ a ye ko, “Ha bi, i ye Alla fɛ? Nfenna i sa kuma-yogomɛ fɔla a ma alako a ni i wara-koe ka-a-la kelenna?”

¹⁰ Yobu ya a fɔ a ye ko, “Ile ye Alla-lɔnbɛliya-kumɛ fɔla. Alla wa ko-nyimɛ kɛ ma ye, ma sewamatoe si wo bira. Nfenna a wa tɔrɔyɛ lana ma ma, ma si gbunyɛ wo kɔrɔ?” Yobula tɔrɔyɛ wo damasi kɔrɔ, a ma kuma-wo-kuma fɔ min si Alla fonde tɔrɔ.

Yobu Diyana-Mɔgɛnu Na-Koe A Wara

¹¹ Yobu diyana-mɔgɔ sawa ya a lamɔɛn min kɛ ko ale Yobu ye tɔrɔyɛ rɔ, anu nara a kɔndɔn tinɛ. Mɔgɔ sawɛ wonu tɔgɛ le kɛnu na, Ɛlifasi ka bɔ Timan soe burɔ wo, Bilidadi ka bɔ Suwa nyamanɛ rɔ wo, anubɛ Sofari ka bɔ Neyama nyamanɛ rɔ.

¹² Anu tora wula-yan la, anu ya ale Yobu mafiliyanɛ yen kirayɛ bolo. Anu ya a ragbɛ wati min, anu donta diyi-kɛ rɔ ka anuna durukinu tafara yisi-tinya bolo. Wo kɔma, anu ya gbangban yuluyulu anu kunyɛ rɔ.

¹³ Su wɔrɔnfila, tele wɔrɔnfila, anu siginɛ Yobu fɛ dugu ma nyɔ. Anu ma fɛrɛ sɔrɔn ka kirabɔ a la bawo ala dumɛ da rakolo.