Yobu 18 - ALLALA KUMƐ

Bilidadita Kumɛnu

^1-2 Nfenna ile mɔgɔ-sufa ti fara kumala? Ni i ya i tole masɔ doni, ma si ke kumala i ye.

³ Nfenna i tɛgɛnɛ ma rɔ iko kolo-fannu? Nfenna ko la i mirinɛ male ma iko hɛnkili sa ma la?

⁴ Ila yisilamayɛ si i nyɛrɛ matanban-tanban. Ile lara a la ko ila yisilamayɛ si a ma, duninyarɔ-fan bɛɛsi ni ban, wa? Alla si kɔnkɛnu bɔ anu gbɛ rɔ alako i ni wasa, wa?

⁵ Karagbɛlɛ wola wan-takanɛ la si dufen, ado a ti waan raka tun.

⁶ Karagbɛlɛ wo si ma iko lɛnpu sa bɔn min na.

⁷ Fɔlɔtɔ nun, a ye tagamana fanka rɔ kɔnɔ kaka, a ye tagamana yuke! Ala yanfanteyɛ, wo le ara a labui fugbu!

⁸ A ye tagamana yalɛ rɔ min bi nala a birala. A ye tola a makɛlɛla nya min, wo ye tola a birala wo nya na le.

⁹ Gbɛrɛ si karagbɛlɛ wo bira a kian ma. A si a kian bira sɔɛn!

¹⁰ Kin-sɛrɛ lasiginɛ a ye. Denkɛ sinnɛ a ye ala kilɛ la.

¹¹ A ma si to banna ko-makilannɛnu bolo kan tinɛ bɛɛ rɔ. Anu bilanɛ a fɛ kan-bo-kan.

¹² Anubɛ kɔnkɛ ti fara. A ra si faga kuluba! Kasarɛ sɔnɛ a tɔnkɔn rɔ, a ye a makɔnɔna.

¹³ Fɛrɛma-kiraya-yogomɛ ye a fɛrɛ bɛɛ ma. A si a ma, a kian anubɛ a bole ni tuli.

¹⁴ Sayɛ si a songban ala bɔn la a lakanannɛ kan min. Mɔgɛnu si ta a la mɔgɔ-faganɛnuna mansɛ warɛ.

¹⁵ Anu si munku-gbɛ nyɛnsɛn ala fani-bɔnla foolɛ rɔ alako ala kirayɛ ra kana nyɛnsɛn. A ara bɔn min to, nyɔ wa diya min ye, wo si ta sigi nyɔ.

¹⁶ A si ma iko kɔlɔma min suli ye gbalala. A bolon-mɛsɛnu ma ye fɔsɔla.

¹⁷ Bɛɛ si nyina a wara-koe la. Mɔgɔ-wo-mɔgɔ miriya ti ke a ma.

¹⁸ Anu si a gben mɔgɔ-nimɛnu tɛma ka a wara-koe ka-a-la. Anu si a bi wan-takanɛ rɔ ka a latuntun pinpi rɔ.

¹⁹ A kegeya fenfen ti taran tun, ado a siginɛ kan min nun, mɔgɔ-wo-mɔgɔ ti to a niyi la nyɔ.

²⁰ Tele-yigi warala mɔgɛnu ba a saya-koe lamɔɛn, wonu kun ma si kɔ kilan bolo. Tele-bɔɛ warala mɔgɛnu ba a saya-koe lamɔɛn, wonu fanan kun ma si kɔ kilan bolo.

²¹ A manɛ wo nya na le karagbɛlɛnu na. Mɔgɛ minnuna ko sa Alla wara-koe rɔ, a ye mala wonu na wo nya na le fanan.