Yobu 15 - ALLALA KUMƐ

Kuma Ratantan Fila Nyɔgɛ Yobu anubɛ A Diyana-Mɔgɛnu Tɛma Ɛlifasita Kumɛnu

^1-2 Yobu, a bɛnta nun, i ni ma hɛnkilimɛ la kɔnɔ yaga, i sa fenfen fɔla fɔ kun-takolonya-kumɛnu. Wonu manɛ iko fɔnyɔ dɔrɔn!

³ Hɛnkilimɛ ti kuma-pɔrɔtɔ-parata-sufa kɛnu fɔ iko ile. A ti kun-takolonya-kumɛnu fɔ a nyɛrɛ fɛka tinɛ.

⁴ Ni a tora ile ma, mɔgɔ-wo-mɔgɔ ti kilan Alla la. Mɔgɔ-wo-mɔgɔ ti a madiya.

⁵ Ila kuma-nya ara a yira n na ko i karagbɛlɛ. Kuma-fila-fɔlɛ le ile la ila kɛwuyɛ rɔ.

⁶ Hali nde ma i yiliki, i darɔ-kan, wo le ye i yilikila.

⁷ Ile miri ko kei fɔlɔtɛ le ile la duninya rɔ, nyɛ? Alla ye kɔnkɛnu nadanna wati min, ile ye nyɔ nun?

⁸ I tole masɔnɛ nun, Alla ye koenu tabɛnna wati min? A fɔra i ye ko hadama-denya-hɛnkili ye ile le kelan bolo?

⁹ Ile ma fenfen lɔn male ma min lɔn. Nfen hɛnkili ye i bolo, min sa male bolo?

¹⁰ Male ya hɛnkili sɔrɔn kun-gbɛnu denu bolo, ado wonu kina i fa ko pirr!

¹¹ Alla ye i yisi-kima-koe rɔ. Male fanan bi kumala i ye a kin na kɔnɔ wo do-wo-do ma i hɛnɛ.

¹² Nfenna i yisi ye bɔla ma kan ma? Nfenna i ye i yakɔrɛ sisila ma kan ma?

¹³ Min sanɛ wo kuma, i wara to diminyani Alla ma ha i nagankuri namanɛ kuma-siyaman-fɔɛ ma.

¹⁴ Hadama-dan si ke sɛninyala, wa? A si ma telenbaga la Alla yala?

¹⁵ Alla ma la a nyɛrɛta melikanu denu gbuyɛ la. Hali wonu denu, anu ma sɛninya Alla yala.

¹⁶ Kɔnɔ hadama-dan don? A sɔn yogo kati! Karagbɛlɛyɛ diya donnɛ mɔgɛnu tɔ iko min-kɛ-yi.

¹⁷ Yobu, i tole masɔ n na. Nde ya min lɔn, n ni wo fɔ i ye.

¹⁸ Hɛnkilimɛnu ya min karan anu fanu bolo, anu ya n karan wonu denu na. Anu ma fenfen dogon n ma.

¹⁹ Wo wati ya a taran, sibolo-gbɛrɛkɛ basanni ma anu na. Mɔgɔ-wo-mɔgɔ sa nyɔ nun min si anu bɔ Alla wara-koe rɔ.

²⁰ Karagbɛlɛ min bi mɔgɛnu tɔrɔla, wo ye a siyi dununa tɔrɔyɛ le tɔ.

²¹ Kuman-kan-makilannɛnu si to a rakilanna. Ale miri wati min ma ko a latankanɛ, kankan si bui a ma.

²² Woletɔ yili-latɛgɛ sa karagbɛlɛ bolo ko a si ke a burila, ado faan ye a makɔnɔna kan tinɛ do rɔ ka a faga.

²³ Dogɛnu bi karagbɛlɛ suyi makɔnɔna. Wonu ya a lɔn ko a wara-koe sa mɛla kala-a-la.

²⁴ A kilannɛ nanparan anubɛ dumɛ la iko mansa-makilannɛ do le ye nala a kɛlɛla.

²⁵ Mɔgɛ min bi a kɔnkɔnna Alla Sɛnbɛ-Bɛɛ-Tigi kɛlɛ ma, tɔrɔyɛ si taran wo tigi la wo nya na le.

²⁶ A si ala kɔgɔ-matanka-fan bi ka tugu Alla kan ma. Mɔgɔ-murutiyanɛ le ale karagbɛlɛ la.

²⁷ Karagbɛlɛ wo ara tɔlɔ ha a yakɔrɛ ara yiri koloyɛ bolo.

²⁸ Kɔnɔ tɔ-a-la, mɔgɔ-sufa wonu si sigi soe-tinyanɛnu denu tɔ. Ni bon-tigi min ya ala bɔn boloka ka a buri, ale karagbɛlɛ si a sigi bɔn wo la. So-sufa wonu bi tonbonyɛ le la.

²⁹ A ti mɛ nɔnfulu-tigiyɛ rɔ. Fan minnu bi a bolo, wo do-wo-do ti mɛ. Hali mɔgɛ wo ninɛ si tunu yen!

³⁰ A ti ke a putukulula sayɛ bolo. A si ma iko tɛ wa kɔlɔma lamintan. Alla si karagbɛlɛ wo fɛ iko fɔnyɔ ye tala kɔlɔma-fere min na.

³¹ Mɔgɛ min bi a yigi sala ko-fufafuyinu tɔ, wo sarɛ si ma ko fuyi la.

³² Mɔgɛ wo si faga, ala tumɛ ma ke. Mɔgɛ wo fuyan-fuyan si to iko kɔlɔma-matiibɛlɛ.

³³ Mɔgɛ wo si ma iko ki-fan min si a fere layalan yona. A si ma fanan iko ki-fan min gbɔ-pose si yalan.

³⁴ Alla-lɔnbɛlɛ wonu ti anu nyɔgɔn to anuta kebilɛ rɔ. Tɛ si kensuntela bɔn mintan bawo a ya bɔn wo sɔrɔn kensunteyɛ le la.

³⁵ Mɔgɛ wola miriya si buri ko-yogoma-kɛ rɔ tiriya! Anu yisi lafanɛ yanfanteyɛ la.