Yobu 12 - ALLALA KUMƐ

Yobuta Kumɛnu

^1-2 Ɔn-hɔn! Hɛnkili-bɔrɔ-tigi le wole la, nyɛ? Wole wa faga tumɛ min, hɛnkilimayɛ si tunu duninya kɛ rɔ.

³ Kɔnɔ hɛnkili ye nde fanan bolo iko wole. Wo ma tenbi n na fenfen tɔ. Wo ara kumɛ min bɛɛsi fɔ kɛ la, mɔgɛ bɛɛ ya wo lɔn.

⁴ Hali n kenintenu, anu bara n ma yɛlɛnma-fan la. Alla ye nna madiyali-kan lamɔɛnna. N natelennɛ, fɛɛ sa n na kɔnɔ hali wo, anu bi n mayɛlɛnna.

⁵ Ha bi, wole ma yakɔrɔ-mamɔɛ sɔrɔn bɛ, woletɔ wo ye n mayɛlɛnna. Wole si mɔgɔ-bumatoe tosokɔrɔ.

⁶ Kankan anubɛ Alla-lɔnbɛlɛnu bi yisi-kimɛ rɔ. Anu sɛnbɛ le anuta alla la.

⁷ Kolo-fannu manyinika, anu si wole karan. Hali konanu fanan si Alla wara-koe fɔ i ye.

⁸ Wo ni hɛnkili nyini sogenu bolo. Wo ni hɛnkili nyini yɛgɛnu fanan bolo.

⁹ Wonu dama ya a lɔn ko Mari le ya anu dan.

¹⁰ Nima-fan bɛɛ niyi ye Alla le bolo. Hadama-dan fanan niyi ye ata sɛnbɛ kɔrɔ.

¹¹ Iko dɔn-fan ma si fɛlɛn mɔgɔ nagan ma nya min, tole si kumɛ yabɔ wo nya na le, ni tonyɛ le, ni wo ma, foninyɛ.

¹² Simayɛ anubɛ ko-kɔrɔ-lɔn le tala anu nyɔgɔn fɛ. Hɛnkilimayɛ ye kinanu bolo

¹³ kɔnɔ hɛnkilimayɛ anubɛ sɛnbɛ ye Alla le bolo. Min sanɛ wo kuma, wo le, ko-kɔrɔ-lɔn anubɛ makawandilɛ ye ale bolo.

¹⁴ Alla ara ban min nawuyala, mɔgɔ-wo-mɔgɔ ti ke wo lasɔla tun. Alla wa mɔgɛ min nadon yele la, mɔgɔ-wo-mɔgɔ ti ke wo kunkala.

¹⁵ Ni Alla ya yili kiri bandala nɛ la, dugi ra si gbala todo! Kɔnɔ a wa san-kole dɛ bɔ bandɛ kɔrɔ, yi-siyamɛ wo si dugi tinya.

¹⁶ Sɛnbɛ anubɛ nɔlɛ ye Alla bolo. Bolo-labiralɛ anubɛ wo ye min bolo labirala, wonu bi a kɔɛn le tɔ.

¹⁷ A si kun-tiginuna hɛnkilimayɛ bi anu bolo. A si a ma, kiti-tɛgɛlɛnu ni to kun-takolonya-koenu nadanna.

¹⁸ Alla si mansaya-durukinu bɔ mansɛnu kan na ka yɔɔnya-durukinu don anu kan na.

¹⁹ Alla ya saraka-masɔlɛnuna sɛnbɛ bɔ anu bolo ka mɔgɔ-ba-sɛbɛnɛnu famayigi.

²⁰ Alla si yili kiri mansɛnuna makawandilɛnuna kumɛ-dan la. A si kinanu ma kinan-yungurɔn la.

²¹ A si kun-tiginu nayarabi. A si kurugbɛnu bole gbesi a la ka kɛlɛ-kɛ-fannu bɔ anu bolo.

²² A si waan raka lakira. Pinpi burunnɛ kan min bɛff, a si waan raka nyɔ rɔ waran!

²³ A si sibole do lasiyaya ka anu tagbɛlɛya. Kɔnɔ wati wa tenbi, a si anu nɔ ka anu nato dogbe!

²⁴ A si a ma, duninya-mansɛnu ni ma yuwɛ la. A si a ma, anu ni to-a-rɔ ka to yilan-yilanna.

²⁵ Anu si to anu bole mɛmɛla pinpi rɔ ka to tonko-tankanna iko gbɛɛ minnɛ.