Yilan-Yilan Koe 9 - ALLALA KUMƐ

Kanan-Ko-Ladiya Fila Nyɔgɛ

¹ Anu bɔɛ Iyipiti a san filɛ karɛ fɔlɛ ma, Mari ya a fɔ Musa ye Sinayi wula-da-rakolɔn rɔ ko,

^2-3 “A bɛnta, Isirɛla mɔgɛnu ni Kanan-Ko-Ladiyɛ kɛ a kilɛ fɛ. Anu ni a dabira a karɛ fɔlɔtɛ kɛ, tele tan-ni-nanɛ, tele-kolo-wulan ma.”

⁴ Musa ya kumɛ latenbi Isirɛla mɔgɛnu ma ko anu ni Kanan-Ko-Ladiyɛ kɛ.

⁵ Anu ya wo bɛɛ ma iko Mari ya a fɔ Musa ye nya min.

⁶ Kɔnɔ kei donu bi nyɔ nun, a ma bɛn anu ni Kanan-Ko-Ladiyɛ kɛ bawo anu bara anu bole tugu furi la. Anu tara Musa anubɛ Aruna warɛ tele wo nyɛrɛ rɔ

⁷ ka a fɔ anu ye ko, “Male sɛninyani ma iko tɔn ya a fɔ nya min bawo ma ara ma bole tugu furi la. Kɔnɔ nfen ya a to, anu ti sɔn ma ni kofu ma na-kelen-nyɔgɛ kɛnu ma ka mata sarakɛnu di Mari ma?”

⁸ Musa ya a fɔ anu ye ko, “Wo ni a makɔnɔ, n ni a lamɔɛn Mari bolo.”

^9-11 Mari ya a fɔ Musa ye ko, “Ni mɔgɛ min bara a bole tugu furi la nun, anubɛ ni min bi tagama rɔ kɔnɔ a sɔgɛ ye mɔgɛ wonu na ka Kanan-Koe wo ladɛn kɛ, a ma yogo wonu tigi bolo ka anuta ladɛn kɛ kɔnɔ anu ni a makɔnɔ karɛ kelen. Anu ni ladɛn kɛ iko tɔn ya a fɔ nya min. Anu si saga-soge anubɛ biredi-yɛlɛbɛlɛ anubɛ yanba-kun-kunanɛ dɔn anu nyɔgɔn fɛ.

¹² Anu tenbi saga bosola tumɛ min, anu kana a kole rakeri. Anu tenbi a dɔnna fanan, anu kana a kole rakeri. Samani banda ni ka, anu ni wo bɛɛ dɔn. Anu kana fenfen to a dɔnbɛlɛ la.

¹³ Ni mɔgɔ-wo-mɔgɔ ma sɔn ka kofu wo ma, ado wo ni a taran, mɔgɛ wo sɛninyanɛ iko tɔn ya a fɔ nya min, wo ni a taran fanan, a ma ta wula-yan na kɔnɔ a ma sɔn ka kofu wo ma Kanan-Ko-Ladiyɛ kɛ rɔ, wo ni mɔgɛ wo gben wo kurun tɔ. Wo tigi si tɔrɔya ata hakɛla ko la bawo a ma na ata sarakɛ la a wati-latɛgɛnɛ rɔ nde, Mari ye.

¹⁴ “Ni sundan ye wo tɛma Isirɛla mɔgɔ ma min na, a sɔgɛ ye wo tigi la ka kofu wo ma wola ladɛn rɔ, sundan wo fanan si tɔn wo bira iko wole fanan. Dan-nafarɛ mumɛ sa dugurannu anubɛ sundannu tɛma Kanan-Ko-Ladiyɛ tɔn kɛla ko la.”

Isirɛla Mɔgɛnuna Wuli-Koe Marita Banda-Fin-Gbɛnɛ Bolo

^15-16 Anu banta Marita Fani-Bɔn sɔla tele min tɔ, Mari ya ata banda-fin-gbɛ layigi ka a sɔ ata Bɔn wo kuma. Suyi rɔ, Marita tamasere wo si malan iko tɛ. Tele rɔ, a si gbɛ iko banda-fin-gbɛ.

^17-19 Banda-fin-gbɛ wa wuli tumɛ min ka ta, Isirɛla mɔgɛnu si Marita bɔn wayan anubɛ anu nyɛrɛta fani-bɔnnu ka bila Marita banda-fin-gbɛ dunnɛ wo fɛ. Ni wo ya a sɔ kan min, Isirɛla mɔgɛnu si anu daga makɛ nyɔ. Fananta a dunnɛ Marita Fani-Bɔn kuma, anu si to nyɔ iko Marita tamasere si a yira anu na nya min.

^20-23 Ni a ya tele fila bɔ a dunnɛ kan min kindɛn, Isirɛla mɔgɛnu si anu daga makɛ nyɔ. Ni a mɛra ha karɛ kelen, anu fanan si to nyɔ karɛ kelen. Ni a mɛra nyɔ san kelen, anu fanan si to nyɔ san kelen. A tenbi a magala kawo, anu fanan bi Marita Fani-Bɔn wo wayanna, anubɛ anuna fani-bɔnnu ka bila Marita banda fin gbɛnɛ wo fɛ, a mara tele rɔ, a mara suyi rɔ. Anu tora wo mala iko Mari ya a fɔ Musa ye nya min.