Yilan-Yilan Koe 8 - ALLALA KUMƐ

Lɛnpu Sigi Tinɛ

¹ Mari ya a fɔ Musa ye ko

² a ni ta a fɔ Aruna ye ko, “I tenbi lɛnpu kɛnu namalanna tumɛ min, i ni a ma, a waan ni ta a yarɔ.”

³ Aruna ya wo ma iko Mari ya a fɔ Musa ye nya min.

⁴ Anu ya lɛnpu wo ladan sɛnɛ-gbesinɛ la ka a fɔlɔ a kuri ma ha a kuma. Wo bɛɛ ladannɛ iko Mari ya a fɔ Musa ye nya min.

Lifayi Bɔnsɔn Dantɛgɛ-Koe

⁵ Mari ya a fɔ Musa ye ko,

⁶ “I ni a ma, Lifayi bɔnsɔn ni bɔ Isirɛla bɔnsɔn-toenu tɛma ka anu tabɛn nta wɔlɛla ko la.

⁷ Ka anu tabɛn, i ni nde, Marita sɛninya-yi doni bi ka a purupuru anu ma, wo le si anu hakɛ bɔ anu ma. Wo kɔma, anu ni anu nyɛrɛ fɛrɛ mumɛ masii, anubɛ ka anuna kurɛnu ku. Wo ko sawɛ wa ban tumɛ min, anu si sɛninya nde, Mari yala wo rɔ.

⁸ Anu ni tura-bulun kelen bi anubɛ dɛgɛ-munku-gbɛngbɛnnɛ min yabasannɛ tuli la ka wo filɛ ma kɔ-fan la nde, Alla ye. Anu ni tura-bulun kelen gbɛrɛ bi ka wo ma hakɛ-sarakɛ la.

⁹ Wo kɔma, i ni Lifayi bɔnsɔn-mɔgɛnu nadɛn nta Fani-Bɔn yakɔrɔ ka Isirɛla mɔgɛ bɛɛ ladɛn nyɔ.

^10-11 Isirɛla mɔgɛnu ba na tumɛ min, anu damasi ni anu bole sa Lifayi bɔnsɔn kebila-mɔgɛnu kuma ka anu di nde, Mari ma anuna den-kei fɔlɔtɛnu gbɛ rɔ. Wo kɔma, Aruna ni Lifayi mɔgɛnu dantɛgɛ nde, Mari ma nta wɔlɛla ko la.

¹² Lifayi bɔnsɔn-mɔgɔ kelen-kelan ni anu bole sa tura-bulun fila filɛ kunyɛnu kuma. Tura-bulun kelen-kelan si ma hakɛ-sarakɛ la ka a to kelen-kelan fanan ma saraka-mintantɛ la. Anu ya wo ma anu hakɛ-yamatogon-fan la.

^13-14 “Wo ni anu dantɛgɛ ka le alako anu ni ma ntɛ la ka Aruna anubɛ ala dannu ma anu yarɔ-sɔlɛnu na.

¹⁵ “Kɛ bɛɛ wa ban tumɛ min, anu bara kanbali worɔ ka ma ndeta wɔli-kɛlɛnu na. Anu si ke wɔlɛ wo kɛla kamasɔrɔn n bara dan-nafarɛ don anubɛ Isirɛla mɔgɛ toenu tɛma bawo anu dantɛgɛnɛ nde, Mari ma.

^16-18 “N ya Iyipiti mɔgɛnuna den-kei fɔlɔtɛ damasi faga Iyipiti nyamanɛ rɔ tumɛ min, n ya Isirɛla mɔgɛnuna den-kei fɔlɔtɛ bɛɛ niyi lakisi. N ya anu ma ndetɛ la, a mara mɔgɔ la wo, a mara sogo la wo. Kɔnɔ kaka, n bara Lifayi bɔnsɔn-mɔgɛnu nasɛgi wonu gbɛ rɔ ka anu ma ndetɛ la. N bara anu yɛlɛma ka ma Isirɛla musinuna den-kei fɔlɔtɛnu kunkɛ la.

¹⁹ N bara Lifayi bɔnsɔn-mɔgɛnu yabɔ ka anu ma sanbɛ la Aruna anubɛ a kebilɛ ye ka bɔ Isirɛla mɔgɛnu tɛma. Lifayi mɔgɛnu bi nala wɔlɛ min kɛla Isirɛla mɔgɛnu gbɛ rɔ, wo le ka wɔlɛ kɛ nde, Marita Fani-Bɔn la alako Isirɛla mɔgɛnu hakɛ yama ni togon nya min. Wo le si a ma, Isirɛla mɔgɛnu na ni tanka fitinɛ ma bawo a ma di nde, Mari ye Isirɛla mɔgɛnu ni gbɛrɛn nta Fani-Bɔn wo ma.”

²⁰ Musa anubɛ Aruna anubɛ Isirɛla mɔgɛ bɛɛsi ya Lifayi bɔnsɔn-mɔgɛnu dantɛgɛ Marila wɔlɛla ko la iko Mari ya a fɔ Musa ye nya min.

²¹ Lifayi bɔnsɔn-mɔgɛnu ya anu nyɛrɛ sɛninya ka anuna kurɛnu ku. Aruna ya anu dantɛgɛ Mari ma ka sarakɛ wo bɛɛ bɔ iko Mari ya a fɔ nya min. Wo le ya a ma, anuna hakɛ yamatogonta.

²² Anu ya wo damasi ma iko Mari ya a fɔ Musa ye nya min nun. Lifayi mɔgɛnu ya anuna wɔlɛ dabira Aruna anubɛ ala dannu yala Marita Fani-Bɔn burɔ.

²³ Mari ya a fɔ Musa ye ko,

^24-26 “Lifayi bɔnsɔn-mɔgɛnuta wɔlɛ da tɛgɛnɛ ye nya min, wo le kɛ la. Min ba san mogan-ni-loli bɔ ha ka ke san bi-loli ma, anu si wɔli nde, Marita Fani-Bɔn burɔ. Min siyi wa tenbi san bi-loli la, wo si a sulen. Wo kɔma, ni anu si ke ka anu ta-nyɔgɛnu dɛnbɛ iko kelen-kelen, wo ma yogo kɔnɔ wɔli-latɛgɛni sa anu ye nyɔ tun.”