Yilan-Yilan Koe 7 - ALLALA KUMƐ

Kun-Tiginuta Kɔ-Fannu Di-Koe Mari Ma

¹ Musa banta Marita Fani-Bɔn sɔla wati min, a ya dantɛgɛ-tuli do bi ka doni sosa Marila Fani-Bɔn ma anubɛ saraka-mintan-tinɛ anubɛ a miran bɛɛ. A ban, a ya Fani-Bɔn dantɛgɛ Mari ma anubɛ a fɛ-miran mumɛ bɛɛ.

² Wo kɔma, Isirɛla bɔnsɔn-kun-tigi tan-ni-filɛ min ya Isirɛla mɔgɛnu dan,

³ wonu nara anuta kɔ-fan minnu na Marita Fani-Bɔn don-dɛ la, wo le kɛnu na. Kun-tigi fila-fila wonu nara ninki fila-fila la anu bolo anubɛ kirindi kelen-kelen minnu kuma-togɔn ye a la. Ninki fila-filɛ wonu denu bi wonu denu saganna. Wo bɛɛ lakofunɛ bɛnta sara-ninki tan-ni-fila anubɛ kirindi-belebele wɔrɔ ma.

⁴ Anu banta wo bɛɛ dila Mari ma wati min, Mari ya a fɔ Musa ye ko,

⁵ “I ni kɔ-fan kɛnu bira alako anu ni wɔli nta bɔn kɛ la. I ni anu di Lifayi bɔnsɔn ma ka anu ma anu madɛnbɛ-fan la iko anuta wɔlɛ ye nya min.”

^6-7 Musa ya sara-ninki nani bi anubɛ kirindi fila ka wonu di Kɛrisɔn kebilɛ ma.

⁸ A ya sara-ninki segin anubɛ kirindi nani di Mɛrari kebilɛ ma.

⁹ Kɔnɔ a ma fenfen di Kohati kebilɛ ma kamasɔrɔn anuna dunu-sɛnimɛnu, fɔ anu ba wonu bi anu kanban-kunyɛ ma.

¹⁰ Anu ya saraka masɔ tinɛ dantɛgɛ Mari ma tele min nyɛrɛ rɔ, bɔnsɔn-kun-tigi wonu nara kɔ-fannu na saraka masɔ tinɛ yakɔrɔ.

¹¹ Mari ya a fɔ Musa ye ko, “Bɔnsɔn-kun-tigi bɛɛ ni na anuta kɔ-fannu na nde, Mari Alla ye kelen-kelenyɛ ma tele tan-ni-fila kɔrɔ.”

^12-83 A tele fɔlɛ, Abinadabula dan Neson ka bɔ Yuda bɔnsɔn rɔ, wo nara anuta kɔ-fannu na. A tele fila nyɔgɛ ma, Suwala dan Natanɛli ka bɔ Isakari bɔnsɔn rɔ, wo nara anuta kɔ-fannu na. A tele sawa nyɔgɛ ma, Hilɔnla dan Ɛliyabu ka bɔ Sɛbulɔn bɔnsɔn rɔ, wo nara anuta kɔ-fannu na. A tele nani nyɔgɛ ma, Sɛdiyala dan Ɛlisa ka bɔ Rubɛn bɔnsɔn rɔ, wo nara anuta kɔ-fannu na. A tele loli nyɔgɛ ma, Suri-Sadaila dan Sɛlumiyɛli ka bɔ Simiyɔn bɔnsɔn rɔ, wo nara anuta kɔ-fannu na. A tele wɔrɔ nyɔgɛ ma, Duwɛlila dan Iliyasafu ka bɔ Kadi bɔnsɔn rɔ, wo nara anuta kɔ-fannu na. A tele wɔrɔnfila nyɔgɛ ma, Amihudila dan Ilasama ka bɔ Ifɛrɛm bɔnsɔn rɔ, wo nara anuta kɔ fannu na. A tele segin nyɔgɛ ma, Pɛdasala dan Kamɛliya ka bɔ Manasa bɔnsɔn rɔ, wo nara anuta kɔ fannu na. A tele kɔnɔntɔ nyɔgɛ ma, Kidiyɔnila dan Abidan ka bɔ Bɛnyamɛ bɔnsɔn rɔ, wo nara anuta kɔ fannu na. A tele tan nyɔgɛ ma, Amisadaila dan Ehayisa ka bɔ Dan bɔnsɔn rɔ, wo nara anuta kɔ-fannu na. A tele tan-ni-kelen nyɔgɛ ma, Akaranla dan Pegiyɛli ka bɔ Asɛra bɔnsɔn rɔ, wo nara anuta kɔ fannu na. A tele tan-ni-fila nyɔgɛ ma, Inala dan Ahaira ka bɔ Nafatali bɔnsɔn rɔ, wo nara anuta kɔ-fannu na. Kun-tigi wonu nara kɔ-fan minnu na Mari ye, wo bɛɛ subolo kelen. Wonu denu denu bi kɛnu na, wodi-gbɛ ku-musu-kinamɛ min gbiliyanɛ iko sinin-kelen-dagɛ anubɛ wodi-gbɛ ku-musu-dɔgɔmɛ min gbiliyanɛ iko kaba-wɔrɔ-dagɛ. Miran filɛ kɛ bɛɛsi lafanɛ dɛgɛ-munke la min tamaganɛ tuli la min si ma Marita kɔ-fan dɔn-fan la. Anu nara sɛnɛ-yi-lafɛ kelen na minna gbiliyɛ manɛ iko wodi-mɛlɛn mogan-ni-nani. Yi-lafɛ wo lafanɛ isɛnti la. Anu nara kɔ-fen mogan-ni-kelen na anu bolo. Kɔ-fan wonu denu denu bi kɛnu na. Minnu si ma saraka-mintantɛ la, wo le kɛnu na, tura-bulun kelen ani saga-yigi kelen ani san-kelen-saga keima kelen. Anu nara baa-kɔrɔn kelen na fanan min si ma hakɛ-sarakɛ la. Minnu si ma yisi-kima-sarakɛ la, wo le kɛnu na, tura fila wo, saga-yigi loli wo, baa-kɔrɔn loli wo, anubɛ san-kelen-saga keima loli.

^84-88 Anu nara min dama la, wo bɛɛ lakofunɛ bɛnta wodi-gbɛ ku-musu-kinama tan-ni-fila ma anubɛ wodi-gbɛ ku-musu-dɔgɔmani tan-ni-fila. Wonu dama lakofunɛla gbiliyɛ mani de iko yi kalɔn loli. Anu nara sɛnɛ-yi-lafɛ tan-ni-filɛ minnu na, wo gbiliyɛ mani de iko yi-kilasi nani. Tura-bulun tan-ni-fila wo, saga-yigi tan-ni-fila wo, san-kelen-saga tan-ni-fila wo, anu nara wonu na ka anu ma saraka-mintantɛ la. Anu nara wonubɛ dɛgɛ-munke la anu bolo. Anu nara baa tan-ni-fila la hakɛ-sarakɛla ko la. Anu nara tura mogan-ni-nani la, anubɛ saga-yigi bi-wɔrɔ anubɛ baa bi-wɔrɔ, anubɛ san-kelen-saga bi-wɔrɔ ka wonu ma yisi-kima-sarakɛ la.

⁸⁹ Musa tara Marita Fani-Bɔn la tumɛ min ka kuma Mari ye, a ya Mari kuman-kan lamɔɛn bɔla tɔn-kenkirɛ kuma melikanuna muninya filɛ tɛma.