Yilan-Yilan Koe 6 - ALLALA KUMƐ

Dantɛgɛ Ko Lanyiri

¹ Musa ya Mari kan latenbi

² Isirɛla mɔgɛnu ma ko, “Kei wo, musi wo, ni min bi a fɛ ka a nyɛrɛ dantɛgɛ Mari ma, fɔ a ni lanyiri kiri anubɛ Mari tɛma ka a nyɛrɛ ma Nansaran la.

^3-4 Lanyiri kɛ tɔn rɔ, fɔ mɔgɛ wo ni a fara baan minyɛ la. A ni a fara nɔnbɔ-gbɔɛ la hali min gbalanɛ anubɛ a yi, a mara a kole la, a mara a fɔrɔn la.

⁵ “Mɔgɔ-wo-mɔgɔ tenbi lanyiri kɛ kɔrɔ, wo kana a kun-sigi matɛgɛ hali ka a buyɛ sii kamasɔrɔn a dantɛgɛnɛ Mari ma. Woletɔ a kun-sigi anubɛ a da-buyɛ si to koloyala tuma-wo-tuma.

^6-8 “A kun-sigi-latonɛ wo si a yira ko mɔgɛ wo dantɛgɛnɛ Mari ma. A kana a gbɛrɛn furi ma, a mara a fa la wo, a na la wo, a kɔrɔ la wo, hali a dɔgɛ kamasɔrɔn a ye wo lanyiri kɔrɔ. A dantɛgɛnɛ Mari ma ata wati bɛɛ rɔ.

⁹ “Ni mɔgɛ do fagara Marita mɔgɛ wo yala, Marita mɔgɛ wonubɛ a kun-sigi sɛninyani ma iko lanyiri ya a fɔ nya min bawo a ara mɔgɔ faganɛ yen a yɛ la. Ni a ye a fɛ ka a nyɛrɛ sɛninya iko tɔn ya a fɔ nya min, a ni a makɔni tele wɔrɔ. A wɔrɔnfila nyɔgɛ, a ni a kunyɛ sii anubɛ a buyɛ.

¹⁰ A tele segin nyɔgɛ, a ni na kangbo fila la a bolo. Ni wonu sa a bolo, a ni na purulan fila la saraka-masɔlɛ wara nde, Marita Fani-Bɔn bonda-dɛ la.

¹¹ Saraka-masɔlɛ si kelen bi ka wo ma hakɛ-sarakɛ la. Kelan min bi tola, a si wo ma saraka-mintantɛ la min si ma a hakɛ-yamatogon-fan la bawo a ara a bole tugu furi la. Wo tele nyɛrɛ rɔ, a ni a nyɛrɛ anubɛ a kun-sigi dantɛgɛ Mari ma a kurɛ la tun.

¹² A ni a nyɛrɛ dantɛgɛ Mari ma tun a kurɛ la ka na san-kelen-saga-yigi la ka wo ma yiliki-sarakɛ la. A ya a nyɛrɛ di Mari ma wati min ka a dabira wo ma ha ka ke lanyiri tinya wati ma, a ti wo wati dan tun kamasɔrɔn a ya a nyɛrɛ ma sɛninyabɛlɛ la mɔgɔ-faganɛ wola ko la.

¹³ “Nansaran lanyiri wati wa ban tumɛ min, a ni ta Marita Fani-Bɔn dɛ la

¹⁴ kolo-fen sawa la a bolo, fɛɛ sa minnu na. Wo le kɛnu na, san-kelen-saga-yigi kelen ka wo ma saraka-mintantɛ la, anubɛ san-kelen-saga-den kelen, a musumɛ, kɔni, ka wo ma hakɛ-sarakɛ la, anubɛ saga-yigi kelen ka wo ma yisi-kima-sarakɛ la.

¹⁵ Mɔgɛ min dantɛgɛnɛ Mari ma, wota wati-latɛgɛnɛ wa ke tumɛ min, a ni dɛgɛ-munku-hakikɛ do ma biredi-kinamɛ la min yabasannɛ tulu-hakikɛ la. Wo kɔma fanan, a ni dɛgɛ-munku-hakikɛ do ma biredi-dɔgɔmɛ la ka tuli sosa a kumɛ ma. A ni na sende-nya kelen na biredi wo su filɛ bɛɛ la isiti sa min tɔ ka wo ma sarakɛ la. Min tugunnɛ wo la, a ni na bu-gbɛngbɛnnɛ la anubɛ nɔnbɔ-gbɔ-yi la ka wonu di Mari ma.

¹⁶ “A wa na kɛnu na saraka-masɔlɛ warɛ, saraka-masɔlɛ si anu damasi di Mari ma ka wonu ma a hakɛ-sarakɛ la anubɛ saraka-mintantɛ.

¹⁷ A si saga-yigi wo ma yisi-kima-sarakɛ la Mari ye anubɛ sende nya kelen biredi la anubɛ bu-gbɛngbɛnnɛ wo anubɛ nɔnbɔ-gbɔ-yi wo.

¹⁸ “Mɔgɛ min dantɛgɛnɛ Mari ma, wo si a nyɛrɛ kunyɛ sii nde, Marita Fani-Bɔn don-dɛ la ka a kun-sigi mintan yisi-kima-saraka-mintan-tinɛ.

¹⁹ “Saraka-masɔlɛ wa saga-yigi wo kɛɛ te wati min, a ni biredi-kinama kelen anubɛ biredi-dɔgɔma kelen bi ka bɔ sende rɔ. A ni fen sawɛ wo bi anu nyɔgɔn fɛ ka wonu sa mɔgɔ-dantɛgɛnɛ wo bole tɔ.

²⁰ Anu si wo bɛɛ di nde, Mari ma. Saraka-masɔlɛnuta niyi le wo la anubɛ a sisi anubɛ a wore min bɛnnɛ ka di saraka-masɔlɛ ma. Wo mumɛ wa ban wati min, ni a diyara mɔgɔ-dantɛgɛni-kɔrɛ ye, a si nɔnbɔ-gbɔ-yi min wo kɔma tun.

²¹ “N bara ban min bɛɛ fɔla kɛ la, mɔgɛ minnu dantɛgɛnɛ nde, Mari ma, wonuna tɔn le kɛnu na. Fɔ a ni na fan kɛ bɛɛ la iko a ya lanyiri kiri nde, Mari ye nya min. Ni a sɔgɛ ye a la ka fenfen sa wo kuma, a ara lanyiri kiri minna ko la fɔ a ni wo ma.”

Saraka-Masɔlɛnuta Duwa-Kumɛ

²² Mari ya a fɔ Musa ye ko,

²³ “Aruna anubɛ ala den-keinu bi duwala Isirɛla mɔgɛnu ye ka le. Anu ni a fɔ ko,

²⁴ ‘Alamɛ Marita duwɛ yigira wo kuma ka wo kandan.

²⁵ Alamɛ Mari nyagalenta wo la ka wo wara-koe layɛlɛ.

²⁶ Alamɛ Mari ya ko-nyimɛ kɛ wo ye ka yisi-kimɛ di wo ma.’ ”

²⁷ Mari ya a fɔ tun ko, “Wo wa duwa Isirɛla mɔgɛnu ye wati min, ni wo ya nde, Mari tɔgɛ ratɛgɛ, n si duwɛ layigi wole Isirɛla mɔgɛ bɛɛ kuma.”