Yilan-Yilan Koe 12 - ALLALA KUMƐ

Miriyam anubɛ Arunala Wɔrɔnyimɛ Bɔ-Koe

¹ Musa ya Itiyopiya-musi do furu min kɛ nun, Aruna anubɛ a kɔrɔ-musi Miriyam wulita Musa tɔgɛ tinyana ka a rasɛ.

² Anu ya a fɔ ko, “Mari si to kumala Musa ye tun? Male don, Mari ti kuma male la?” Mari ya anu kuman-kan wo lamɔɛn.

³ (Hali wo, Musa, mɔgɔ-famayiginɛ le ka tenbi mɔgɛ bɛɛ la duninya kɛ rɔ.)

⁴ Anu banta kumɛ kɛ fɔla wati min, Mari ya mɔgɔ sawɛ wonu kele. A ko, “Wo ni na n taran nta bɔn la.” Anu tara nyɔ min kɛ,

⁵ Mari yigira ata banda-fin-gbɛ rɔ ka sɔ ata bɔn wo don-dɛ la. Mari ya Aruna anubɛ Miriyam kele. A ko, “Wo ni wo madon n na yan.” Anu nara tumɛ min,

⁶ Mari ya a fɔ anu ye ko, “Wo ni wo tole masɔ. Nɛbinu bi wo tɛma tumɛ min, n si ko-rayirɛ kɛ anu ye kiyo rɔ.

⁷ Kɔnɔ nta lanaya-mɔgɛ le Musa la, woletɔ n ya a sigi Isirɛla mɔgɛ bɛɛsi kun na.

⁸ Mabɛ Musa si kuma ma nyɔgɔn na kɔnɔ n sa tamayi-kumɛ fɔla a ye. Ka tenbi wo bɛɛ la, a ya n nyɛrɛta tamasere yen, yɔ! Nfen ya a to gbɛ, wo sa kilanna ka murutiya-kumɛ kɛ fɔ a ma.”

⁹ Mari diminyara ha a fonde bɔra. A ya ata Fani-Bɔn boloka.

¹⁰ Banda-fin-gbɛ wo bɔra bɔn kuma tumɛ min, kiraya-yogomɛ do bɔra Miriyam fɛrɛ ma. A fɛrɛ bɛɛ gbɛra iko bɛgi-gbɛ. Aruna ya a kɔrɔ-musi yen tumɛ min ko kiraya-yogomɛ do ara bɔ a ma,

¹¹ a ya a fɔ Musa ye ko, “E, ma tigi, i yandi, i kana ma tɔrɔ mala kuntanya-hakɛ kɛla ko la.

¹² I yandi, n fa, ma kɔrɔ-musi fɛrɛ kana ma iko dennɛ min tulunɛ sɔrɔnta ka bɔ a na burɔ.”

¹³ Musa fanan dira Mari dala, a ko, “E, Alla, i yandi, n kɔrɔ-musi lakɛndɛya.”

¹⁴ Mari ya a fɔ Musa ye ko, “Kɔnɔ ni mɔgɔ fa ya nɔgɔ-yi kɛ ala den yakɔrɛ ma ka a layarabi kɛ nya, den wo ti miliya wola ko la tele wɔrɔnfila kɔrɔ, wa? Woletɔ wa a labɔ dagɛ kɔma tele wɔrɔnfila kɔrɔ fanan. A ni kofu kiraya-yogoma-tiginu ma nyɔ miliyɛ kɛla ko la. Tele wɔrɔnfila wo wa ban tumɛ min, a si na tun.”

¹⁵ Miriyam bɔra dagɛ kɔma tele wɔrɔnfila kɔrɔ. Isirɛla mɔgɛnu ma ta tagama rɔ ha Miriyam nara tun.

¹⁶ Anu bɔra Hasirɔti ka ta anu daga makɛ Paran wulɛ rɔ.