Yilan-Yilan Koe 11 - ALLALA KUMƐ

Fisiriwɔlɛnuna-Koe

¹ Isirɛla mɔgɛnu wulita da-kɔrɔ-kumɛ la Mari ma anuna tɔrɔyɛla ko la. Mari ya wo lamɔɛn tumɛ min, a fonde bɔra. A diminyara anu ma ha ka tɛ layigi anu kuma ka dagɛ tɔnkɔn kelan mintan gburr!

² Isirɛla mɔgɛnu dira Musa dala anu dɛnbɛn-koe la. Musa ya Mari madiya anu ye, woletɔ tɛ makimara.

³ Woletɔ anu ya kan tinɛ wo tɔgɔ sa “Ta Layigi Tinɛ” bawo Mari nyɛrɛ ya tɛ layigi anu kuma nyɔ.

Marita Biredi, Wo Da-Kɔrɔ-Kumɛ

⁴ Sundan donu taranta Isirɛla mɔgɛnu tɛma. Mɛyɛ ara anu tabɔ. Wo ara anubɛ Isirɛla mɔgɛ donu bira kosɛbɛ! Anu ya a fɔ ko, “Alako tun, ma ni soge do sɔrɔn.

⁵ Ma ye Iyipiti nyamanɛ rɔ tumɛ min, ma ye yɛgɛ sɔrɔnna dɔgɔma-ma-de! Hali kaba, ma sa a bɔla wo wati rɔ. Ma wa ma miri wo tumɛ ma, kɔkunba siyaman bi ma bolo anubɛ watamiliyɔn anubɛ yawa-kunbɛ anubɛ yawa-mɛsɛ.

⁶ Biredi su kɛ dɔn-sɔgɔ sa ma la tun bawo a ara ma rabɔ ha a wuyɛ ara sigi ma ma. Kɔnɔ kaka, fanka sa ma la bawo ma sa fen-gbɛrɛkɛ dɔnna fɔ biredi kɛ su tuma-wo-tuma. Ma si to wo le dɔnna tun tun.”

Marita Biredi Manɛ Nya Min

⁷ (Marita biredi kɛ dɔgɔyanɛ le iko kende-kole, ado a gbɛnɛ fanan iko kende-kole.

^8-9 Anubɛ duri si yigi dugi ma anuna dagɛ rɔ suyi rɔ. A wa yigi suyi rɔ, sɔgɔma, Isirɛla mɔgɛnu si a makɔ. Donu si a sii, donu si a bunden ka a ma munke la. Wo kɔma, anu si a mate iko dɛgɛ-lamondonɛ hali ka a ma dɛgɛ-yilannɛ la. Ala diyɛ manɛ le iko dɛgɛ, tuli ye min tɔ.)

¹⁰ Musa ya Isirɛla mɔgɔ-kurɔnnu sɔnɛ yen belenna da-wo-da anuna bonda-dɛnu na. Anu bi da-kɔrɔ-kumɛ fɔla tun tun. Mɔgɛ kɛnuna ko la, Mari fonde bɔra. Musa yakɔrɛ mamɔra kati!

¹¹ A ya a fɔ Mari ye ko, “Nfen ya a to, i ye nanparan kɛ bɛɛ lanala n kuma? Mɔgɛ kɛnuna koe gbɛlɛ gben! Nfen ya a to, i ya mɔgɔ-kalabante kɛnuna dunɛ sa nde kuma?

¹² Nde le ya mɔgɛ kɛnu sɔrɔn, ba? Nde le ye anu banbanna ka ta ha lanyiri-nyamanɛ rɔ, wa?

¹³ Nde si mɛya-fan siyamɛ kɛ sɔrɔn mintɔ ka mɔgɔ-siyamɛ kɛnu de-nyini?

¹⁴ Nde kelen pe ti ke mɔgɔ-siyamɛ kɛnu dunɛ nɔla.

¹⁵ Ni i si na a ma n na ka le, kinikini n ma. I yandi, n faga kelenna! N kana to tɔrɔyɛ kɛ rɔ tuma-wo-tuma.”

Mɔgɔ-Ba Bi-Wɔrɔnfilɛ Sɔ-Koe

¹⁶ Mari ya a fɔ Musa ye ko, “Mɔgɔ-ba-sɛbɛni bi-wɔrɔnfila yabɔ hɛnkili ye minnu bolo minnu si ke sɔla Isirɛla mɔgɛnu yarɔ. I ni mɔgɔ-ba wonu nadɛn nta Bɔn yakɔrɔ.

¹⁷ N si ile Musa taran nyɔ. N ya nta Sɛnbɛ min di ile Musa ma, n si wo nyɔgɔn di mɔgɔ-ba wonu fanan ma. N ba ban nna Sɛnbɛ wo dila anu ma tumɛ min, anu si ke worɔ ka i dɛnbɛ dunɛ kɛnu bila. Wo le si a ma, ile kelan ti sɔ mɔgɔ-siyamɛ kɛnu yarɔ tun fɔ wobɛ mɔgɔ-ba kɛnu.”

Sogo Dɔn-Koe Lanyiri Mari Bolo

¹⁸ Musa ya a fɔ mɔgɛnu ye ko, “Mari ko koe min bi nala mala sina, wo ni wo nyɛrɛ rabɛn wola ko la. A ko sina, wo si soge dɔn. A ko a ya wo gbɛngbɛrɛn-kan lamɔɛn wo ye a fɔla ko mɛya ma wo bira Iyipiti. Wo ko nyɔ di yan ko.

¹⁹ A ko wo ti mɛya-fan dɔn tele kelen dɔrɔn ma

²⁰ kɔnɔ wo si to a dɔnna ha karɛ kelen. A ko wo si a dɔn ha a ni bɔ wo sunyɛ rɔ. A ko wo si to a dɔnna ha a wuyɛ ni sigi wo ma. Min ya a to a ye kɛ mala, a ko bawo mɔgɔ-fisiri-fasarɛ le wole la. A ko wo ara da-magboya-kumɛ fɔ, hali wo ye a fɔla ko a fisa nun hali wo tora Iyipiti.”

²¹ Musa ya a fɔ Mari ye ko, “E, Mari, ile le ko i si mɔgɔ waga kɛmɛ wɔrɛ kɛnu de-nyini ha karɛ kelen kɔrɔ, wa?

²² Hali ma ya mala kolo-fan kɛ bɛɛ boso, wo ti a bɔ. Hali ma ya yɛgɛ damasi bira kɔgɔ-yi rɔ, wo bɛrɛn ti a bɔ mumɛ!”

²³ Mari ya Musa manyinika ko, “Ile ara n fanka-dan lɔn wo rɔ, wa? I si a yen i nyɛrɛ yɛ la, ni n bi tonyɛ le fɔla, ka, ni n bi foninyɛ le fɔla. I si wo yen de serr!”

²⁴ Musa tara Marila sarakanɛ kɛ bɛɛ latenbi Isirɛla mɔgɛnu ma. Musa ya mɔgɔ-ba bi-wɔrɔnfila kɛnu yabɔ ka anu kele ko anu ni na Marita bɔn yakɔrɔ.

²⁵ Mari nyɛrɛ yigira ata banda-fin-gbɛ rɔ ka kuma Musa ye. Marita Sɛnbɛ min nyɛrɛ ye Musa rɔ, a ya wo nyɔgɔ di mɔgɔ-ba wonu ma. Anu ya Marita Sɛnbɛ sɔrɔn nya min kawo, anu wulita kumala iko nɛbinu. Kɔnɔ anu ma mɛ wo kun na.

²⁶ Kɔnɔ Musata mɔgɔ-ba-yabɔni filɛ, Ɛledadi anubɛ Midadi, wonu ma ta ladɛn wo rɔ. Wonu tora dagɛ rɔ, woletɔ anu foora ladɛn wo la. Kɔnɔ hali wo, Marita Sɛnbɛ tara ka yigi anu kuma dagɛ rɔ nyɔ. Anu fanan ya a dabira ka wɔlɔyiya-kumɛ fɔ mɔgɛnu tɛma.

²⁷ Dennɛ do burumatoe nara a fɔ Musa ye ko, “Ɛledadi anubɛ Midadi, anu bi bɛti bɔla dagɛ rɔ.”

²⁸ Nunna den Yasowa min gbɛrɛnnɛ Musa ma kebi fɔlɔ, wo ya a fɔ Musa ye ko, “N fa Musa, mɔgɛ kɛnu nakala.”

²⁹ Musa ya a fɔ Yasowa ye ko, “Ile le ye nna keliyɛ kɛla n ye, wa? Nba, a si diya nde nyɛrɛ ye ni Isirɛla mɔgɛ bɛɛ si Marita Sɛnbɛ kɛ sɔrɔn. A si diya nde ye gbuyɛ, ni bɛɛ si bɛti bɔ ka Mari wɔlɔbɔ!”

³⁰ Musa anubɛ mɔgɔ-ba wonu sɛgira dagɛ rɔ tun.

Wonderenu Matɔnbɔn-Koe Isirɛla Mɔgɛnu Bolo

³¹ Mari ya fɔn-belebele labɔ kɔgɔ-yi wara la. Fɔn wo nara wondere siyaman na a bolo dagɛ rɔ. Wondere wonu takara nyɔ baraki! Ka a fɔlɔ dagɛ tele-yigi anubɛ a tele-bɔɛ, dagɛ anubɛ ala foolɛ rɔ, mɔgɛ si tele kelen tagama kɛ wondere kɛnu tɛma. Ka a bi dugi ma ha mɔgɔ tɛmɛ, wondere wonu sanɛ anu nyɔgɔn kuma.

³² Isirɛla mɔgɛnu tara kona wonu bira tinɛ su kelen, tele fila. Anu kelen-kelan ya wonderenu bira. Bɛɛtɛ tenbira bɔrɔ mogan-ni-nani-nani na. Bɛɛ ya atɛ sa tele la ka a gbala.

³³ Wondere-gbalɛ kɛ ma ban bɛ, Mari fonde bɔra anu kuma. A ya kiraya-yogoma-belebele layigi anu kuma. Mɔgɔ siyaman fagara.

³⁴ Woletɔ anu ya dinkirɛ wo tɔgɔ sa “Ko-Latenbi-Kaburu-Soe.” Anu ya mɔgɔ siyaman togon nyɔ minnu bi nyinina sogo siyaman ma, wasabɛlɛ wonu, kɔni!

³⁵ Anu bɔra Ko-Latenbi-Kaburu-Soe rɔ ka ta kan tinɛ do rɔ min tɔgɛ Hasirɔti ka anu daga makɛ nyɔ.