Yilan-Yilan Koe 1 - ALLALA KUMƐ

Isirɛla Mɔgɛnu Tɔgɔ Sɛbɛ Fɔlɔtɛ

¹ Isirɛla mɔgɛnu bɔɛ Iyipiti nyamanɛ rɔ, wo san fila nyɔgɛ, karɛ filɛ, a tele fɔlɛ ma, Mari kumara Musa ye Sinayi wulɛ rɔ Marita Fani-Bɔn burɔ.

^2-3 Mari ya a fɔ Musa ye ko, “Wobɛ Aruna ni keinu dan ka a dabira anuna bɔnsɔnnu ma ha ka ke anuna kebilɛnu ma. Kei minnu si ke kɛlɛ kɛla ka a dabira anu san mogan ma ha ka tenbi wo la, wo ni wo bɛɛ tɔgɛ sɛbɛ.

⁴ Wo ni mɔgɔ-ba kelen-kelennamɛ-bɛɛ kele ka bɔ bɔnsɔn tan-ni-filɛ bɛɛ rɔ alako anu ni wobɛ Aruna dɛnbɛ mɔgɛnu danna.

⁵ Wo ni Sɛdiyala dan Ɛlisa kele ka bɔ Rubɛn bɔnsɔn rɔ.

⁶ Wo ni Suri-Sadaila dan Sɛlumiyɛli kele ka bɔ Simiyɔn bɔnsɔn rɔ.

⁷ Wo ni Aminadabula dan Neson kele ka bɔ Yuda bɔnsɔn rɔ.

⁸ Wo ni Suwala dan Natanɛli kele ka bɔ Isakari bɔnsɔn rɔ.

⁹ Wo ni Hilɔnla dan Ɛliyabu kele ka bɔ Sɛbulɔn bɔnsɔn rɔ.

¹⁰ Bɔnsɔn fila bɔra Yusufu rɔ, Ifɛrɛm anubɛ Manasa, kɔni. Wo ni Amihudila dan Ilasama kele ka bɔ Ifɛrɛm bɔnsɔn rɔ. Wo ni Pɛdasala dan Kamɛliya kele ka bɔ Manasa bɔnsɔn rɔ.

¹¹ Wo ni Kidiyɔnila dan Abidan kele ka bɔ Bɛnyamɛ bɔnsɔn rɔ.

¹² Wo ni Amisadaila dan Ehayisa kele ka bɔ Dan bɔnsɔn rɔ.

¹³ Wo ni Akaranla dan Pegiyɛli kele ka bɔ Asɛra bɔnsɔn rɔ.

¹⁴ Wo ni Duwɛlila dan Iliyasafu kele ka bɔ Kadi bɔnsɔn rɔ.

¹⁵ Wo ni Inala dan Ahaira kele ka bɔ Nafatali bɔnsɔn rɔ.”

¹⁶ Mɔgɔ-ba le kɛnu na ka bɔ Isirɛla bɔnsɔn tan-ni-filɛ bɛɛ rɔ.

¹⁷ Wo wati nyɛrɛ rɔ, Musa anubɛ Aruna anubɛ bɔnsɔn-kun-tigi wonu

^18-19 ya Isirɛla mɔgɛ bɛɛ kele. Kei minnu sɔrɔn ara tenbi san tan-ni-kɔnɔntɔ la ka a dabira anuna bɔnsɔnnu ma ha ka ke anuna kebilɛ ma, anu ya anu tɔgɛ bɛɛ sɛbɛ iko Mari ya a fɔ Musa anubɛ Aruna ye nya min. Anu ya wo bɛɛ ma Sinayi wulɛ rɔ nyɔ.

^20-46 Anuna bɔnsɔnnu yatɛ le kɛnu na ka bɔ bɔnsɔn kelen-kelennamɛ-bɛɛ rɔ min si ke kɛlɛ kɛla. Wo le kɛnu na. Minnu bɔra Yakobala sarɛ Rubɛn bɔnsɔn rɔ, wo le mɔgɔ waga bi-nani, mɔgɔ waga wɔrɔ ani mɔgɔ kɛmɛ loli (46,500) la. Minnu bɔra Simiyɔn bɔnsɔn rɔ, wo le mɔgɔ waga bi-loli, mɔgɔ waga kɔnɔntɔ ani mɔgɔ kɛmɛ sawa (59,300) la. Minnu bɔra Kadi bɔnsɔn rɔ, wo le mɔgɔ waga bi-nani, mɔgɔ waga loli, mɔgɔ kɛmɛ wɔrɔ, ani mɔgɔ bi-loli (45,650) la. Minnu bɔra Yuda bɔnsɔn rɔ, wo le mɔgɔ waga bi-wɔrɔnfila, mɔgɔ waga nani ani mɔgɔ kɛmɛ wɔrɔ (74,600) la. Minnu bɔra Isakari bɔnsɔn rɔ, wo le mɔgɔ waga bi-loli, mɔgɔ waga nani ani mɔgɔ kɛmɛ nani (54,400) la. Minnu bɔra Sɛbulɔn bɔnsɔn rɔ, wo le mɔgɔ waga bi-loli, mɔgɔ waga wɔrɔnfila ani mɔgɔ kɛmɛ nani (57,400) la. Minnu bɔra Yusufula dan Ifɛrɛm bɔnsɔn rɔ, wo le mɔgɔ waga bi-nani ani mɔgɔ kɛmɛ loli (40,500) la. Minnu bɔra Yusufula dan Manasa bɔnsɔn rɔ, wo le mɔgɔ waga bi-sawa, mɔgɔ waga fila ani mɔgɔ kɛmɛ fila (32,200) la. Minnu bɔra Bɛnyamɛ bɔnsɔn rɔ, wo le mɔgɔ waga bi-sawa, mɔgɔ waga loli ani mɔgɔ kɛmɛ nani (35,400) la. Minnu bɔra Dan bɔnsɔn rɔ, wo le mɔgɔ waga bi-wɔrɔ, mɔgɔ waga fila ani mɔgɔ kɛmɛ wɔrɔnfila (62,700) la. Minnu bɔra Asɛra bɔnsɔn rɔ, wo le mɔgɔ waga bi-nani, mɔgɔ waga kelen ani mɔgɔ kɛmɛ loli (41,500) la. Minnu bɔra Nafatali bɔnsɔn rɔ, wo le mɔgɔ waga bi-loli, mɔgɔ waga sawa ani mɔgɔ kɛmɛ nani (53,400) la. Wo bɛɛ lakofunɛ bɛnta mɔgɔ waga kɛmɛ wɔrɔ, mɔgɔ waga sawa, mɔgɔ kɛmɛ loli ani mɔgɔ bi-loli (603,550) ma.

⁴⁷ Kɔnɔ Lifayi bɔnsɔn-mɔgɛnu ma dan Isirɛla mɔgɛnu tɛma

^48-49 kamasɔrɔn Mari ya a fɔ Musa ye nun ko, “Wo kana anu dan

^50-51 bawo wo si nta Fani-Bɔn-wɔlɛ di anu ma. Anu si nyɔ-miran bɛɛ kandan minnu bi nta Fani-Bɔn burɔ anubɛ minnu bi kata burɔ. Isirɛla mɔgɛnu tenbi tala kan-bo-kan, anuta wɔlɛ le wo la ka nta bɔn wo maduni. Anu si nta Fani-Bɔn wayan ka ta a sɔ tun. Ni Isirɛla mɔgɔ-wo-mɔgɔ ya a gbɛrɛn nta Fani-Bɔn wo ma, ni Lifayi mɔgɔ ma min na, wo si wo tigi faga serr! Lifayi mɔgɛnu denu dɔrɔn si anu daga makɛ nna bɔnla foolɛ rɔ.

⁵² Bɔnsɔn bɛɛta sigi tinɛ ye a dan na anuna tamaserenu kɔrɔ Lifayi bɔnsɔnta minɛ rɔ.

⁵³ Kɔnɔ Lifayi mɔgɛnu ni sigi nna Fani-Bɔnla minɛ rɔ ka a kandan woletɔ mɔgɔ-wo-mɔgɔ ti a gbɛrɛn wo ma. Ni wo ma, nna diminyɛ si taran Isirɛla mɔgɛ bɛɛ kuma.”

⁵⁴ Isirɛla mɔgɛnu ya wo koe bɛɛ ma iko Mari ya a fɔ Musa ye nya min.