Yɛrɛmaya 7 - ALLALA KUMƐ

Kawandili Bɔ-Koe Bato-Bɔn Don-Dɛ la Yɛrɛmaya Bolo

¹ Mari ara min fɔ nde, Yɛrɛmaya ye, wo le kɛ la.

² A ko n ni sɔ Mari Bato-Bɔn don-dɛ la. N ni kawandili kɛ bɔ nyɔ rɔ. Wole Yuda mɔgɛnu, wo ni wo tole masɔ Mari kuman-kan la. Wole minnu bi tenbila don-dɛ kɛ la ka na Mari bato-tinɛ, wo ni wo tole masɔ.

³ Mari Sɛnbɛ-Bɛɛ-Tigi, Isirɛlata Alla, kɔni, wo ye a fɔla ko wo ni yɛlɛma ka don ko-latelenni-kɛ rɔ. Ni wo ya wo ma, a si sɔn wo ni to sigini yan.

⁴ Wo ka la mɔgɛnuna foninya-kumɛnu na minnu bi a yonkanna a la ka to a fɔla ko, “Mari nyɛrɛta Bato-Bɔn le kɛ la min si ma kisi.”

⁵ Wo ni yɛlɛma ka don ko-latelenni-kɛ rɔ. Wo ni wo telen wo nyɔgɔn ye.

⁶ Sundannu wo, kelennɛnu wo, kɛɛ-musinu wo, wo kana a lagbɛlɛya wonu kuma. Minnu ma ko-yogomɛ ma, wo fara anu fagɛ la nyamanɛ kɛ rɔ. Wo fara bɛsi-kɔ-koe la fanan. Ni wo ma, bɛsi-kɔ-koe wo si wo halaki.

⁷ Ni wo ya tɔn kɛnu bira, Mari ko nyamanɛ kɛ ti bɔ wo bolo, ado a ya nyamanɛ kɛ le di wo benbanu ma tolon!

⁸ Kɔnɔ i ma a yen, wo lanɛ foninyɛnu na, ado lanaya-fuyi le wonu na.

⁹ Ha bi, wo ye kankanyɛ kɛla. Ha bi, wo ye mɔgɔ-fagɛ kun na. Ha bi, wo bole ye yɛlɛnyɛ rɔ. Ha bi, wo ye tɔgɛ sala mɔgɛnu na. Ha bi, wo ye bɛsi Beyali kɔla. Ha bi, wo nɔrɔnɛ sibolo-gbɛrɛnuna bɛsi-kɔ-koenu ma.

¹⁰ Mari ko wo bole si to ko sufa kɛnu tɔ minnu gbo a ye, wo kɔma, wo ni na sɔ a yakɔrɔ yan? A ko ale ara a bato-tinɛ min yabɔ kɛ, wo si ke nala sɔla yan ka a bato, wa? Wole miri ko wo ara kanan, nyɛ? Wo kanannɛ alako wo ni fɛrɛ sɔrɔn ko sufa kɛnu ma-tinɛ, wa?

¹¹ A ko ale nyɛrɛ-nyɛrɛ le ya kan-tinɛ kɛ yabɔ a bato-tinayɛ la. Wo ara yan ma kankan-dogon-tinɛ le la. Mari ko a kolan le bɛnnɛ wo ma.

¹² Mari ko wole, Yuda mɔgɛnu ni ta Sailo soe burɔ. A ya nyɔ le fɔlɔn fɔlɔn yabɔ a bato-tinayɛ la. Ale Mari ara min ma ko-yogoma-kɛlɛnu na nyɔ, a ko wo ni ta wo rayen wo yɛ la.

¹³ Mari ko wole, Isirɛla mɔgɛ damasi bole ye ko-yogoma-kɛ kɛ rɔ. A ye wo makawandila su-ni-tele kɔnɔ a ko wo ma sɔn wo tole masɔla a la. A ya wo rakele kɔnɔ wo ma sɔn a labirala.

¹⁴ Woletɔ ale ara kan-tinɛ min yabɔ a bato-tinayɛ la Yerusalɛm, a si na nyɔ tinya pɔ, ado wo lara kan-tinɛ wo la dɔgɔma-ma-de! A ya nyɔ di wobɛ wo benbanu ma. Kɔnɔ hali wo, a ko a si nyɔ kasara iko a ya Sailo soe kasara nya min.

¹⁵ A ko a si wo gben a yakɔrɔ iko a ya wo na-kelen-nyɔgɛ Isirɛla mɔgɛnu gben nya min.

Yuda Mɔgɛnuna Kumɛ Tinya-Koe

¹⁶ Kɔnɔ Mari ya a fɔ n ye ko nde, Yɛrɛmaya kana madiyali kɛ wole, Yuda kɛnu ye. A ko n kana di wola ko la. N kana fenfen matara wo ye. A ko n kana a madiya wo dɛnbɛn-koe la bawo a ti a wɔlɔ matɔlɔ wola ko la mumɛ!

¹⁷ A ya n manyinika ni n sa a yenna wo ye min kun na Yerusalɛm luyinu ma anubɛ Yuda soe toenu burɔ.

¹⁸ A ko n ni n yɛ lata wole, Yuda kɛnu kɛ-nya ma. Wola dannu tenbi nala sɔgɛ la, anu fanu bi tɛ ladɛnna wo la. Anu nanu bi dɛgɛ mintanna ka wo di bɛsɛ wo ma min tɔgɛ Arinyɛnɛ Musu-Mansɛ. Wo kɔma, anu bi minni-sarakɛnu bɔla bɛsɛ doinu ye. A ko wo ye wo damasi mala alako a fonde ni bɔ.

¹⁹ Kɔnɔ Mari ko wole, Yuda kɛnu sa ale tɔrɔla. Wo ye wo nyɛrɛ tɔrɔla. A ko wo ye wo nyɛrɛ le lamiliyala.

²⁰ Ma Tigi Mari ya a fɔ ko a si ata fondo-bɔɛ labɔn kan-tinɛ kɛ ma. A hadama-den wo, a sogo wo, a kɔlɔma wo, a fui-fen wo, a si ata fondo-bɔɛ rawuya wonu dama ma. A ko ata fondo-bɔɛ si ma iko tɛ, ado mɔgɔ-wo-mɔgɔ ti ke tɛ wo ladufenna.

Kuma-Birɛ Fisa Saraka-Bɔɛ Ko

²¹ Mari Sɛnbɛ-Bɛɛ-Tigi kan le kɛ la. A ko Isirɛlata Alla le ale la kɔnɔ a ti wola sarakɛnu bira. A ko wo ni ta wola mintan-sarakɛ bɛɛ ma dɔntɛ la duk! Hali a ma bɛn, wo ni sarakɛ minnu dɔn, wo ni wo buyi lafa saraka-soge wonu na pen, bawo a sa wonu birala wo bolo.

²² A ko alele nara wo benbanu na ka bɔ Iyipiti nyamanɛ rɔ. A kumara anu ye tumɛ min, a ma saraka-mintan-ko-tɔn dɔrɔn di anu ma.

²³ A ko a ma dan wo dɔrɔn ma de! A ya a fɔ anu ye fanan ko ni anu ya ata kumɛ bira, ale si ma anuta Alla la. Anu denu fanan si ma ata mɔgɛnu na. A ko ni anu ya ala tɔn bɛɛ bira, ko-nyimɛ si to mala anu ye.

²⁴ Kɔnɔ a ko wo benbanu ma sɔn anu tole masɔla a la. Anu tole gbɛlɛ nun. Anu taranta anu nyɛrɛ diyana-koenu denu mala. Anu ma to tala yarɔ fɔ ka to sɛgila anu kɔma.

²⁵ A ko kebi wo benbanu bɔra Iyipiti, ale Alla tora ala nɛbinu nanala anu ma le tolon, ata wɔli-kɛlɛnu, kɔni!

²⁶ Kɔnɔ a ko wo benbanu ma sɔn anu tole masɔla nɛbi wonu na ka anu kuman-kan bira. Kɔnɔ wole karagbɛlɛ ka tenbi wo benbanu na.

²⁷ Mari ko nde, Yɛrɛmaya ni kɛ rakaran wole, Yuda kɛnu ye. Kɔnɔ a ko hali wo, wo ti wo tole masɔ. A ko hali n mɛra kɛ rakaranna wo ye, wo ti wo tole masɔ.

²⁸ Woletɔ a ko n ni a fɔ wo ye ko sibole le wole la min ti sɔn wo nyɛrɛta Mari Alla kan tola a gbɛ rɔ. A ko a tenbi wo latelenna, ko ti bɔ a rɔ. Wo tole gbɛlɛ dɔgɔma-ma-de! A ko wo sa tonya-wo-tonya fɔla. A ko tonyɛ ara sama wo ma yen!

Sayɛ Wara-Koe Bɛn-Hinɔm Lɛɛ Rɔ

²⁹ Mari ko wole, Yuda kɛnu ni wo kunyɛ gbana ka wo kun-sigi lakɛ a rɔ. A ko wo ni ta kɔnkɔ-makolɔn kun tɛma ka saya-sigi sa. Wo ni wo ma bawo ale Mari nyɛrɛ ara a ban wole la. A ko a ara a kan-kɔ sɔ wo la. A ye wo tɔrɔla ata fondo-bɔɛ la.

³⁰ Mari ko fenfen min yogo, wole Yuda kɛnu diyana-koe le wo la. Ale ya a bato-tinɛ min yabɔ wole, ata mɔgɛnu ye, wo ara ta wola kisimiriya-bɛsɛnu sɔla nyɔ. Wo ara kan-tinɛ wo latinya feu!

³¹ Wole Yuda kɛnu bara bɛsi-kɔ-tinɛ min tɔgɛ Tofɛti sɔ Bɛn-Hinɔm lɛɛ rɔ. Wo ye wola den-keinu anubɛ wola dunmusinu mintanna bɛsɛnu ye nyɔ rɔ, ado Mari ko ale ma tɔn wo di wo ma. Ado nfan, a miriya ma tugu wo la lefan!

³² Woletɔ wo ni a ma wo fɛrɛma de! Mari ko wati ye nala, mɔgɔ ti kan-tinɛ kɛ kele tun ko Tofɛti. Anu ti a kele fanan tun ko Bɛn-Hinɔm lɛɛ. Anu si a kele ko, “Mɔgɛ-Faga-Lɛɛ.” Anu si furi togon Tofɛti furr, hali kin-sɔ-tina ti sɔrɔn tun kanbɛ bolo.

³³ Wo kɔma, furi-bolokanɛ si taran dugi ma nyɔ. Anu si ma konanu de-nyini-fan la. Kɔnkɛ ti nyɔ-sogenu bira. Mɔgɔ-wo-mɔgɔ ti taran nyɔ min si fan wonu gben furinu ma.

³⁴ Wo wati rɔ, Mari ko kɔnyɔ-tolon ti taran nyamanɛ kɛ kan-tinɛ fenfen tɔ. Sewa-wo-sewa ti taran Yerusalɛm luyinu ma anubɛ Yuda nyamanɛ toe bɛɛ rɔ. Nyamanɛ wo si ma dugu-magbalanɛ la.