Yɛrɛmaya 6 - ALLALA KUMƐ

Yerusalɛm Lafoo-Koe A Yogenu Bolo

¹ Wole Bɛnyamɛ bɔnsɔn, wo ni wo buri wo niyila ko la. Wo ni wo buri bɔla Yerusalɛm soe burɔ. Wo ni kɛlɛ-buri fɛ Tekoya soe burɔ. Wo ni tamasere layɛlɛ ka bɔ Bɛti-Hakɛram soe burɔ. Wo ni a fɔ ko kasarɛ ye yigila a ma ka bɔ kantɔ-wara la. Kasara-belebele ye nala wo kuma.

² Hali Yerusalɛm soe kɛ kin, a si tinya pɔ!

³ Wo yogenuna mansɛnu anubɛ anuna kɛlɛ-dannu si anu daga makɛ nyɔ. Anu si kan-tinɛ wo bɛɛ ratala ka anuna fani-bɔnnu tafulen nyɔ rɔ.

⁴ Mansɛ wonu si a fɔ ko, “Wo ni wo rabɛn Yerusalɛm kɛlɛ-koe ma. Ma si anu kɛlɛ-tele latelan.” Kɔnɔ wo wati wa ke, anu si a fɔ ko, “Tele ara ban tala. Ninɛ ara don.

⁵ Ma ni a to ha suyi rɔ ka na to anu kɛlɛla. Ma si so-latankanɛ kɛ tii mɛmɛ!”

⁶ Mari Sɛnbɛ-Bɛɛ-Tigi ya a fɔ Yerusalɛm yogenu ye ko, “Kɔlɔma minnu bi Yerusalɛmna foolɛ rɔ, wo ni wonu tɛgɛ. Wo ni yɛlɛ-tinɛ ladan Yerusalɛm tarɛ ma ha a kun tɛma alako wo ni anu kɛlɛ. Fɔ soe kɛ wa tɔrɔ serr! Fenfen sa soe kɛ rɔ fɔ niyi-ragbɛran.

⁷ Iko yi si bɔ tenke rɔ nya min, karagbɛlɛnuna wunduyogoyɛ si bɔ Yerusalɛm soe burɔ wo nya na le.” Mari ko a ye karagbɛlɛyɛ anubɛ kasara-kan lamɔɛnna soe kɛ rɔ. A ko a sa fenfen yenna kirayɛ anubɛ dumɛ kɔma soe kɛ burɔ.

⁸ Mari ko tɔrɔyɛ kɛnu ni ma wole, Yerusalɛm kɛnu makawandi-fan la. Ni wo ma wo tole masɔ, a si a ban wo la. A ko a si wola soe kɛ ma dugu-magbalanɛ la. Nyɔ si ma tonbɔn la.

Isirɛla Mɔgɛnuta Murutiya-Koe

⁹ Mari Sɛnbɛ-Bɛɛ-Tigi ya a fɔ n ye ko Isirɛla mɔgɔ-dande minnu tora anu niyi la, anu yogenu ni anu kundɛn kan-tina-kelen. Anu ni anu nadɛn iko mɔgɛ si kɔn-gbɔɛ ladɛn nya min. Anu ba ban, anu ni sɛgi ka a bolɔn bɛɛ lafɛlɛn iko kɔn-gbɔ-tigi si a ma nya min.

¹⁰ N si kuma yon na? N si yon makawandi? Yon si a tole masɔ n na? Wole Yuda mɔgɛnu bara wo tole gbere. Wo ti sɔn wo tole masɔla nna makawandili-kumɛnu na. Marita kumɛ ma di wo ye. Wo ti sɔn wo tole masɔla a la muk!

¹¹ Kɔnɔ n dɛ la ara fa Marita fondo-bɔɛ la. N ti ke a birala n tɔ tun. Mari ko ala fondo-bɔɛ ni bon dennɛnu ma minnu bi tolonna soe tɔnkɔnnu tɔ. A ni bon kemini-mɛsɛnu ma minnu nadɛnnɛ kan-tina-kelen. Ala fondo-bɔɛ si keinubɛ ala nyaganɛ bira anu nyɔgɔn fɛ. A si kɛmɔgɛnu anubɛ musu-kɔrɛnu fanan bira.

¹² Wo halala-bɔnnu si to mɔgɔ-gbɛrɛnu bolo. Wola musinu anubɛ wola wɔli-kɛ-tinɛnu si di mɔgɔ-gbɛrɛ ma. A ko a wa a kɔɛn kɔrɔbi, a si wole, Yuda mɔgɛnu tɔrɔ.

¹³ A mɔgɔ-ba wo, a fɛlɛteni wo, wo bɛɛ sokesoke wodi-sɔrɔn-koe rɔ. A nɛbi wo, a saraka-masɔla wo, wo bɛɛ siginɛ foninyɛ le ma.

¹⁴ Mari ko wo ye wola mɔgɛnuna tɛlɛ-wɛnu dandanna iko wo si purupurɛ dandan nya min. Wo ye tola a fɔla ko a ma yogo. Kɔnɔ tonyɛ, a yogo ha ka a dan-natenbi.

¹⁵ A bɛnta wo ni miliya wo kɛ-nya-yogomɛ la. Kɔnɔ miliyɛ bɔrɔ turu, a sa wo yɛ la. Hali wo ara hakɛ-siyaman kɛ, mɔgɔ ti miliyɛ bira wo yakɔrɔ ma lefan! Wo le si a ma, wole fanan bi buila iko doinu. Mari ko mɔgɛnu tɔrɔ-tele wa ke, wo si fɛrɛn dugi la.

Allata Kilɛ-Ka-Koe Isirɛla Mɔgɛnu Bolo

¹⁶ Mari ko wole, ata mɔgɛnu sɔnɛ kila-faran rɔ. Wo ni wo yɛ lakalan. Wo ni ata kila-kɔrɛ manyinika. A ko wo ni kila-nyimɛ manyinika alako wo ni ta wo fɛ nya min, ado ni wo bɔra kilɛ wo fɛ, wo yisi la si fɛrɛ. Kɔnɔ hali wo, wo bannɛ bɔla kila-nyimɛ wo fɛ.

¹⁷ Mari ko a ya wo kumafɛlɛnnɛnu yabɔ. Wo ni wo tole masɔ anuna kɛlɛ-buri-fɛ-kan la. Kɔnɔ wo ara wo tolenu gbere gben!

¹⁸ Wole sibolo-gbɛrɛnu, wo ni wo tole masɔ. Wo ni wo tole rabalan, wole sereyɛnu, kɔni. Wo ni a mafɛlɛn ale Mari ye nala min mala Yuda nyamanita-mɔgɛnu na.

¹⁹ Wole duninya-mɔgɛnu, wo ni kɛ lamɔɛn. Mari ko a ye kasarɛ lanala Yuda mɔgɛnu kuma. Anu ya karagbɛlɛyɛ min tabɛn, wo ye mala anu na ka a tɛgɛ wo ma. A ko anu ma sɔn anu tole masɔla ata kumɛ la. Anu ma ata karan bira.

²⁰ Mari ko nfenna wole, Yuda kɛnu bi Siba nyamanita isɛnti mala sarakɛ la a ye? Nfenna wo ye nala fɔrɔnyakalɛ la ka bɔ wulɛ rɔ pon? A ko a ti sɔn wola saraka-mintantɛnu na. Wola sarakɛnu sa a hɛnɛna hali!

²¹ Woletɔ Mari ya a fɔ ko a ye fan donu sala kilɛ la mɔgɛnu si anu kian latugu minnu na. Dan anubɛ a fa si anu kian latugu wonu na. Wo sigi-nyɔgɛnu anubɛ wo diyana-mɔgɛnu si kasara pɔ!

Kantɔ-Warala-Yogenu Nana Koe

²² Mari ya a fɔ ko, “Wo ni wo yɛ lata. Kɛlɛ-dannu bi nala ka bɔ kantɔ-findan ma pon! Sibolo-makawanɛ do ye nala. Anu tabɛnnɛ kɛlɛ-wɛla ko la.

²³ Anu bi nala kalabɛn anubɛ tanbɛ la anu bolo. Anu karagbɛlɛ dɔgɔma-ma-de! Hina-wo-hina sa anu tɔ. Anubɛ anuna soeenu na-kan mani de iko kɔgɔ-yi tenbi tugula a rɔ. Kɛlɛ-dan wonu bara sɔ anu sansan-yili ma wo kɛlɛ-kan ma. Anu bi nala wole, Yerusalɛm kɛnu kɛlɛ-koe la.”

²⁴ Wole Yerusalɛm so-burɔ-mɔgɛnu ba kɛlɛ-dan wonu na-koe lamɔɛn, wo mankulan si bɔ wo ma kilan bolo. Yisi-tɔrɛ si wo bira. Wo si taran dumɛ rɔ iko musi tenbi den sɔrɔn kun na.

²⁵ Wo kana ta binyɛ rɔ de! Wo kana kila kun bira. Wo kana wo ma bawo faan-damɛ ye wo yogenu bolo la. Kumakɔɛ ye kan-tinɛ bɛɛ rɔ.

²⁶ Mari ko wole, ata mɔgɛnu ni kasa-kurɛ kɛ wo ma. Wo ni wo nyɛrɛ maforongban gbangban rɔ yisi-tinyala ko la. Minnu bara lakiraya, wo ni wo dɛ sa-a-rɔ wonuna ko la. Wo ni wo dɛ bolobɔ iko mɔgɔla den kelan wa bɔ a bolo. Wo ni wo bɛɛ ma bawo kasarɛ sa mɛla kɛla wo ma.

²⁷ Mari ko a ara nde, Yɛrɛmaya ma sulubondon-sɔlɛ la. A ko wole, ala mɔgɛnu mani de iko nɛgɛ ye bɔla kuri min tɔ. A ko n ni wo lakɔrɔsi tɛ wo rɔ ni nɛgɛ le wole la.

²⁸ A ko wole, ala mɔgɛnu bara wo ban a la ka wo tole gbɛlɛya. Wo ye belenna mɔgɛnu da ragbalala foninyɛ la. Wo yisi gbɛlɛ iko nɛgɛ anubɛ silɛɛ ye nya min, wo ye mɔgɛnu tɔrɔla yanfanteyɛ la wo nya na le.

²⁹ N bi tɛ lafɛla alako tɛ ni wɔlɔn-belebele-wɛ kɛ. Kɔnɔ hali wo, a bo sa sɔnna bɔla. Wodi-gbɛ sa bɔla kuri rɔ. A ko wole, ala mɔgɛnu sa sɔnna wo bole bɔla karagbɛlɛyɛ rɔ.

³⁰ A ko wole, ala mɔgɛnu si kele ko, “Wodi-gbɛ ani a boe.” Wo ara ma wodi-gbɛ-munke la bawo Mari ara a ban wo la.