Yɛrɛmaya 52 - ALLALA KUMƐ

Yerusalɛm Kɛnu Nɔ-Koe Babilɔn Mansɛ Bolo

¹ Sɛdɛkaya ya mansayɛ sɔrɔn Yuda nyamanɛ rɔ a sɔrɔn-san mogan-ni-kelen nyɔgɛ le ma. San tan-ni-kelen, a ye mansayɛ la Yerusalɛm soe burɔ. A na le Yɛrɛmayala den Hamutali min bɔra Libina soe burɔ.

² A bilara Mari la iko Mansa Yahoyakim ya a ma nya min.

³ Mari diminyara Yuda mɔgɛnu ma anubɛ Yerusalɛm so-burɔ-mɔgɛnu ma ha a ya a kolan firindi anu ma. Ale Yuda Mansa Sɛdɛkaya murutiyara Babilɔn Mansa Nɛbukanasa ma.

⁴ Wo le ya a ma, Nɛbukanasa nara ala kɛlɛ-dannu na ka bui Yerusalɛm soe ma. Wo mara Mansa Sɛdɛkayala mansayɛ san kɔnɔntɔ, a karɛ tan, a tele tan nyɔgɛ ma. Anu ya anu daga makɛ nun Yerusalɛm soe tarɛ kɔma. Anu ya bɔnkɛ ladɛn a nyɔgɔn kuma tala tarɛ kɔma alako anu ni ke kilɛ sɔrɔnna so-burɔ-mɔgɛnu ma.

⁵ Anu tora kɛlɛ wo kun na nyɔ rɔ ha Sɛdɛkayala mansayɛ san tan-ni-kelen-nyɔgɛ ma.

^6-7 A san tan-ni-kelen-nyɔgɛ, a karɛ nani, a tele kɔnɔntɛ ma, Babilɔn kɛnu kera tarɛ punsɔgɔla ka don, ado wo ya a taran, kɔnkɛ ara mɔgɛnu malɔfɔkɔrɔya, fenfen sa anu si min dɔn. Hali Yerusalɛm soe lafoonɛ Babilɔn kɛlɛ-dannu na kɔnɔ Yerusalɛm mansɛ anubɛ ala kɛlɛ-dannu ya anu buri tala pinpi rɔ. Anu tenbira anuna mansɛla nakorɔ-kilɛ la. Tarɛ kun-da filɛ latugun tinɛ, anu tenbira nyɔ le. Anu tara Yorodan-ba-lɛɛ wara la.

⁸ Kɔnɔ hali wo, Babilɔn kɛlɛ-dannu ya anubɛ anuna mansɛ sagaran. Anu ya Mansa Sɛdɛkaya bira gbɛkole do ma Yɛrikɔ soe dafɛ. Ala kɛlɛ-dannu ya a boloka ka a to a yogenu bolo la.

⁹ Anu tara Mansa Sɛdɛkaya la pon fɔɔ Babilɔn Mansa Nɛbukanasa ma Ribila soe rɔ Hamati nyamanɛ rɔ. Anu bi nala a tɔrɔyala nya min, anu ya wo fɔ a ye.

¹⁰ Anu ya ale Mansa Sɛdɛkayala den-keinu faga a nyɛrɛ yakɔrɔ nyɔ. Anu ya Yuda mɔgɔ-banu fanan faga Ribila soe burɔ.

¹¹ Wo kɔma, Nɛbukanasa ya a ma, anu ya Mansa Sɛdɛkaya yɛnu bɔ a kolɔn rɔ. Anu ya yɔlɔkɛ kɛ a ma ka ta a la Babilɔn nyamanɛ rɔ. A tora yele la ha a faga-tele.

Mari Bato-Bɔn Kasara-Nya

¹² Mansa Nɛbukanasala mansayɛ san tan-ni-kɔnɔntɛ, a karɛ loli, tele tan nyɔgɛ ma, ale Nɛbukanasala mɔgɔ-ba do donta Yerusalɛm soe burɔ, ado ala kɛlɛ-den-kunyɛ le fanan. Wo tɔgɛ le Nɛbusaradan.

¹³ Anubɛ ala kɛlɛ-dannu ya tɛ tugu Mari Bato-Bɔn la anubɛ mansɛla bolɔn la anubɛ mɔgɔ-banuna bɔnnu na.

¹⁴ Babilɔn kɛlɛ-dannu ya tarɛ toe wo damasi keri Yerusalɛm soela foolɛ rɔ.

¹⁵ Boloma-wɔli-kɛlɛ minnu tora soe burɔ wo, mɔgɛ minnu ya anu buri ka ta kofu Babilɔn kɛnu ma wo, Yuda nyamanita-mɔgɛ toenu wo, kɛlɛ-den-kunyɛ wo tara wonu na Babilɔn nyamanɛ rɔ.

¹⁶ A ya minnu to Yuda nyamanɛ rɔ, fɔ bolo-kolon-gbɛnu, wɔli-kɛ-tina sa minnu bolo. A ya wonu to sɛni-ko-wɔlɛ kun na.

¹⁷ Mari Bato-Bon-sɛnbɛrɛn-kɔn minnu nadannɛ silɛɛ la wo, kenkirɛ minnu nadannɛ silɛɛ la wo, yi-sigi-kunan min nadannɛ silɛɛ la wo, Babilɔn kɛlɛ-dannu ya wonu tinya ka ta silɛɛ wonu na anu bolo.

¹⁸ Mari Bato-Bon-miran min bɛɛsi ladannɛ silɛɛ la, a sɔbulu wo, a bugura-makɔ-fen wo, a saraba-tɛgɛ-fen wo, a yele-purupuru-miran wo, a isɛnti-mintan-fen wo, anu tara wo dama la.

¹⁹ Miran minnu nadannɛ sɛnɛ anubɛ wodi-gbɛ la, a yi-kɛ-fen wo, a ta-kɔ-miran wo, a yele-purupuru-miran wo, a bugura-makɔ-fen wo, a lɛnpu-sigi-fen wo, a isɛnti-mintan-fen wo, a yi-lafɛnu, anu tara wonu fanan na.

²⁰ Mansa Silamɛni ya fan minnu nadan silɛɛ la wo, a sɛnbɛrɛn-kɔn filɛ wo, a yi-sigi-kenkirɛ wo, a yi-sigi-kunan wo, anubɛ kunan-wɛ wo siginɛ tura tan-ni-fila minnu kuma wo, wonu gbili ha mɔgɔ ti anuna gbiliyɛ dan lɔn.

^21-22 Sɛnbɛrɛn-kɔn wonu takɛn. Anuna yanyɛ ya nunkan-nya tan-ni-segin tan-ni-segin bɔ. Sɛnbɛrɛn-kɔn wonu kunna-sɛnu latugunnɛ anu na. Anuna minɛ mara nunkan-nya tan-ni-fila tan-ni-fila. Anu burɔ takolɔn, ado wo silɛɛ min bi a ma, wo da-gbengbe mara sibiri talɛ la. Kunna-sɛ wonuna yanyɛ nunkan-nya loli-loli. Kunna-sɛ wonu nafoonɛ sila-yalɛnu na. Kɔn-gbɔɛ min tɔgɛ pamakarani, anu ya wola muninyɛ ladan silɛɛ la. Wonu tugunnɛ kunna-sɛ wonu na.

²³ Pamakarani kɛmɛ-kɛmɛ sanɛ sila-yalɛ wonu ma tala. Mɔgɛ tenbi dugi ma, a si wonu bi-kɔnɔntɔ ani wɔrɛ dɔrɔn yen.

Kɛlɛ Ta-Koe Yuda Mɔgɛnu Na

²⁴ Saraka-Masɔla-Kun-Tigi-Wɛ Sɛraya wo, a kan-kɔrɔ-sigilɛ Sɛfanaya wo, anubɛ Bato-Bɔn bonda-da-makandanna mɔgɔ sawɛ wo, Nɛbusaradan ya wonu dama bira.

²⁵ Wo kɔma, a kɛlɛ-den-kun wo, a mansa-hɛnkili-kɔla mɔgɔ wɔrɔnfilɛ wo, a kɛlɛ-den-kunyɛ wola kɛdi-sɛbɛla wo, a Yerusalɛm mɔgɔ-ba bi-wɔrɛ donu wo,

²⁶ ale Nɛbusaradan ya wonu dama bira Yerusalɛm soe burɔ ka ta anu na pon, Babilɔn mansɛ wara Ribila soe burɔ.

²⁷ Anu ke anu na Ribila soe burɔ Hamati nyamanɛ rɔ, Babilɔn mansɛ ya a ma, anu ya Yerusalɛm kɛ wonu gbesi ka anu faga. Kɛlɛ tara Yuda mɔgɛnu na ka le.

²⁸ Nɛbukanasata san wɔrɔnfila nyɔgɛ ma mansayɛ la, a tara mɔgɛ minnu na biralɛ rɔ a bolo, wonu yatɛ le kɛnu na. Mɔgɔ waga sawa anubɛ mɔgɔ mogan-ni-sawa (3,023).

²⁹ Ata mansayɛ san tan-ni-segin-nyɔgɛ ma, a tara mɔgɔ kɛmɛ segin, mɔgɔ bi-sawa ani fila (832) la ka bɔ Yerusalɛm soe burɔ.

³⁰ Ata mansayɛ san mogan-ni-sawɛ ma, Nɛbusaradan tara mɔgɔ kɛmɛ wɔrɔnfila, mɔgɔ bi-nani ani loli (745) la. A bɛɛ lakofunɛ mɔgɔ waga nani mɔgɔ kɛmɛ wɔrɔ (4,600).

³¹ Ifali-Mɛrodaki mara mansɛ la san min na Babilɔn nyamanɛ rɔ, ale Babilɔn mansɛ wo ya ko-nyimɛ kɛ Yuda mansa-kɔrɛ Yɛhoyasin ye ka a labɔ yele la. Mansɛ wo ya a labɔ yele la san bi-sawa ani san wɔrɔnfila, a karɛ tan-ni-fila, a tele mogan-ni-loli-nyɔgɛ le ma.

³² Babilɔn mansɛ wo ya a bira boloko-nyimɛ-kɛ. A ya sɔ-tina-belebele di a ma ka tenbi mansa-biranɛ doinu na Babilɔn nyamanɛ rɔ.

³³ Ale mansɛ ya a rabɛn ko Yɛhoyasin ni yelela fanɛnu bɔ a ma. Ale mansɛ ya a rabɛn ko tun ko Yɛhoyasin kɛ ni to a de-nyinina ale mansɛ wara bɔn la a siyi-tele-bɛɛ kɔrɔ.

³⁴ Mansɛ ya a rabɛn ko tele-wo-tele, a si to a mako-nyinya-wodi dila a ma a siyi-tele-bɛɛ kɔrɔ.