Yɛrɛmaya 50 - ALLALA KUMƐ

Kilayɛ min bi Babilɔn Kɛnuna Ko La

¹ Mari ya min fɔ nde, Yɛrɛmaya ye Babilɔn nyamanɛ anubɛ a mɔgɛnuna ko la, wo le kɛ la.

² “Wo ni kɛ fɔ sibolenu ye ka a mayon ko anu ka a ma gbundu la de! Wo ni falafalɛ layɛlɛ tamasereyɛ la ko Babilɔn si na bui, yɔ! Anuna bɛsɛ min tɔgɛ Maraduku, wo si na nyɛnsɛn kesemeren! Babilɔn kɛnuna bɛsɛnu bara miliya kɔgɔrɔyɔlɔ! Anuna kisimiriya-bɛsɛ wonu si na serendi ha ka anu nunku iko gbangban.

³ “Sibole min bi kantɔ-wara la, wo si na kɛ Babilɔn kɛnu ma. A si Babilɔn nyamanɛ ma wula-da-rakolɔn la. Hadama-den wo, sogo wo, bɛɛ si a buri, ado hali mɔgɔ-den-kolo-kelan ti sigi nyɔ tun.”

Isirɛla Mɔgɛnu Sɛgi-Koe ka Bɔ Biralɛ Rɔ

⁴ Mari ko wo wati wa na tumɛ min, a Isirɛla ka wo, a Yuda ka wo, bɛɛ si sɛgi ale anuta Mari Alla ma diyi la anu bolo.

⁵ Anu si Yerusalɛm kilɛ manyinika alako anu ni bɔ nyɔ-kilɛ la. Anu denubɛ Mari si sarama-kan kiri anu nyɔgɔn tɛma min ti tinya muk!

⁶ Mari ko ala mɔgɛ kɛnu mani de nun iko sagɛ minnu bara tunu. Anuna kun-tiginu denu ya anu nasama kilɛ ma. Anuna kun-tiginu bara anu nayilan-yilan iko sagɛ minnu bara ta anu kun fɛ kɔnkɛnu ma. Anu ma anu bɔ-tinɛ lɔn, anu ma anu ta-tinɛ lɔn.

⁷ Min ba ale Marita mɔgɛ kɛnu yen, wonu si anu mawulen. Anu yoge wonu kɛnɛna a fɔla ko, “Male ma ko-yogoma ma. Isirɛla mɔgɛ kɛnu bara bila Mari la min kɛ, woletɔ ma ara anu mawulen. Anu benbanu ya anu yigi sa Mari rɔ, ado a bɛnta, anu fanani ni Mari gbiliya nun.”

⁸ Mari ko, “Wole Isirɛla mɔgɛnu, wo ni wo buri bɔla Babilɔn nyamanɛ rɔ. Wo ni nyamanɛ boloka tiriya! Wole ni ma mɔgɔ fɔlɛ la ka bɔ nyɔ.

⁹ N si sibolo kurun nabɔ kantɔ-wara la ka na kɛ Babilɔn kɛnu ma. Wonu si nyamanɛ kɛlɛ ka a nɔ. Donso-nyana le wonu na, min bole di kalabɛn la dɔgɔma-ma-de!

¹⁰ Wonu si anu wasakara maka ka ta wo bolo-fan bɛɛ la tɛrr!” Mari kan le kɛ la.

Babilɔn Soe Bui-Koe

¹¹ Mari ko Babilɔn kɛnu bara bui ala nyamanɛ ma ka a raku. A ko anu sewanɛ iko ninki tenbi kala-nɔrɔn rɔ. Anu nyagalennɛ iko soee wa ke gbere-kole ma.

¹² Kɔnɔ hali wo, anuta so-karantan si miliya yarabiyi bolo. A ko Babilɔn mankan ma si yigi ka tenbi nyamanɛ bɛɛ la, ado a si ma kɛn-dugi la.

¹³ Mari ko ka a tɛgɛ ata fondo-bɔɛ ma, mɔgɔ-wo-mɔgɔ ti to sigini Babilɔn tun. Nyɔ si to tonbonyɛ la. Min tenbimatoe wa a yen, wo si kawa ka a bole sa a dɛ la.

¹⁴ Mari ko, “Wole kalabɛn-nakɛlɛnu, wo ni mini Babilɔn ma a kɛlɛ-tinɛ. Wo ni wola kalabɛn damasi lakɛ Babilɔn ma bawo a ara hakɛ kɛ nde, Mari la.

¹⁵ Wo ni kɛlɛ-sɔnkɛ layɛlɛ Babilɔnna foolɛ bɛɛ rɔ, ado nyɔ-mɔgɛnu bara dɛgɛ min. Anuna soe tarɛ si keri ka bui fugbu! Nde, Mari si n tayili sara Babilɔn kɛnu na. Woletɔ wo ni anu bira boloko-yogomɛ-kɛ iko anu fanan taranta mɔgɛnu birala nya min.

¹⁶ Mɔgɔ kana sɔn, anu ni fui-fannu fui nyamanɛ wo rɔ. Mɔgɔ kana fui-fan tɛgɛ nyɔ tun. Sibolo-gbɛrɛ minnu siginɛ anu tɛma, wonu si kilan kɛlɛ-dannuna kɛlɛ la. Wo si a ma, anu ni sɛgi anuta nyamanɛnu tɔ.”

Isirɛla Mɔgɛnu Sɛgi-Koe ka Bɔ Biralɛ Rɔ

¹⁷ Mari ko Isirɛla mɔgɛnu mani de iko yarɛ wa sagɛnu tanyɛnsɛn. Asiriya mansɛ fɔlɔn ya anu dɔn dabira. Wo kɔma, Babilɔn Mansa Nɛbukanasa tora anu kolenu masusunna.

¹⁸ Woletɔ Mari Sɛnbɛ-Bɛɛ-Tigi Isirɛlata Alla si Babilɔn mansɛ anubɛ ata nyamanɛ tɔrɔ iko a ya Asiriya mansɛ tɔrɔ nya min.

¹⁹ A ko a si Isirɛla mɔgɛnu nasɛgi anu halala-nyamanɛ rɔ. Dɔn-fan min bi bɔla Kamɛli kɔnkɛ kuma wo, anubɛ min bi bɔla Basan nyamanɛ rɔ wo, a ko anu si to wonu dɔnna. Ifɛrɛm bɔnsɔn nyamanɛ dɔn-fan wo, Kaliyadi bɔnsɔn nyamanɛ dɔn-fan wo, anu ni to fala wonu na.

²⁰ Wo wulɔn-tele wa ke, mɔgɔ ti hakɛ-wo-hakɛ taran Isirɛla nyamanɛ rɔ. Karagbɛlɛyɛ fanan ti taran Yuda nyamanɛ rɔ. Wo ye mala le bawo Mari ko a ara minnu niyi lakanan, a ara wonu makoto. Mari kan le kɛ la.

Babilɔn Kiti-Koe Mari Bolo

²¹ Mari ko Babilɔn yogenu ni Mɛrateyim kɛnu anubɛ Pikɔdinu kɛlɛ. Anu ni anu faga ka anu halaki feu! Anu ni anu kasara iko ale Mari ya a fɔ anu ye nya min.

²² Kɛlɛ-sɔnkɛ anubɛ kasarɛ si taran nyamanɛ wo tɔnkɔn bɛɛ rɔ.

²³ Babilɔn mara kundu-wɛ la nun ka duninya bɛɛ ratiitii. Kɔnɔ kaka, kundu-wɛ wo ra si nyɛnsɛn gbesenkirin! Sibole bɛɛ kun ma si kɔ ka a tɛgɛ min bi nala mala nyamanɛ wo rɔ.

²⁴ Mari ko Babilɔn kɛnu bara ale Mari kɛlɛ. Kɔnɔ Mari si na yili min nasigi anu ye, anu bi nala birala wo le la, hali anu sa nala taranna a kalama.

²⁵ Mari ko a ara ala kɛlɛ-kɛ-miran-bɔn laka anu kan ma. A ko a fonde ara bɔ ha a si na ala kɛlɛ-kɛ-fan bɛɛsi labɔ anu kan ma bawo ale Mari Sɛnbɛ-Bɛɛ-Tigi ko wɔlɛ ye ata kɛlɛ-dannu ye Babilɔn nyamanɛ rɔ.

²⁶ Anu ni anu kɛlɛ a tɔnkɔn bɛɛ rɔ. Anu ni anuna fui-fen namara-tinɛnu takeri. Kɛlɛ-dannu ni anuna fen-kolomɛnu madɛn ka anu sigi anu nyɔgɔn kuma iko dɔn-fen-sendi. Anu ni nyamanɛ wo bɛɛ kasara. Anu kana fenfen to.

²⁷ Anu ni Babilɔn kɛlɛ-dan damasi kan natɛgɛ. Gbalo ye Babilɔn kɛnu ma. Anu kasara-wati ara ke.

²⁸ (Mɔgɛnu buri-kɛ-kan ye bɔla Babilɔn ka na Yerusalɛm. Anu bi ma Mari Alla tayili-sara-nya rakaranna ka a tɛgɛ a Bato-Bɔn tinya-nya ma Babilɔn kɛnu bolo.)

²⁹ A ko kalabɛn-nakɛlɛnu ni Babilɔn kɛlɛ. Minnu kusan kalabɛnnu nakɛla, anu dama ni ta. Anu ni anu mini anuna so-karantan ma alako mɔgɔ-den-kelen-kunyɛ kana bɔ a rɔ. Anu ni anuna karagbɛlɛyɛ yili sara anu na. Anu ni Babilɔn bira boloko-yogomɛ-kɛ iko anu bara doinu bira nya min, ado Babilɔn taranta anu nyɛrɛ kɔrɔbila ale Isirɛlata Alla-Sɛnimɛ kan ma.

³⁰ Woletɔ a fonikenu furu-bolokanɛ si to belenna luyinu ma. Ala kɛlɛ-dannu si kasara wulɔn tele kelan ma. Mari kan le kɛ la.

³¹ Babilɔn fanɛ wasinteyɛ la nya min kɛ la, ale ma tigi Mari Sɛnbɛ-Bɛɛ-Tigi ko a kɔnkɔnnɛ anu ma. Anu tɔrɔ-wati ara ke Mari bolo.

³² Sibolo-wasinɛ kɛ si a kian latugu ka bui fugbu, ado a bolo-birala ti taran min si a lasɔ. A ko a si tɛ tugu wola soe bɛɛ la ka ala foolɛ bɛɛ halaki.

³³ Mari Sɛnbɛ-Bɛɛ-Tigi ko Isirɛla mɔgɛnu anubɛ Yuda mɔgɛnu niyi ra ara gbɛrɛn anu ma. Anu maranɛ minnu bolo, anu buru-kunya sa ka bɔ wo bolo.

³⁴ Kɔnɔ minnu bi nala anu kunyɛ bɔla gbaran rɔ, wo sɛnbɛ kolo. A tɔgɛ Mari Sɛnbɛ-Bɛɛ-Tigi. Ale nyɛrɛ si anuna dunɛ bi ka yisi-kimɛ lana duninya rɔ. Kɔnɔ dunɛ si sa Babilɔn kɛnu kan ma.

³⁵ Mari ko a bɛnta, Babilɔn kɛnu ni faga. A mɔgɔ-ba wo, a hɛnkilima wo, a mɔgɛ bɛɛ ni faga.

³⁶ Foninya-nɛbinu fanan ni faga, ado kun-takolɔn le anu na. A kɛlɛ-dannu ni faga. Anu denu fanan kun ma ni kɔ.

³⁷ Anuna kirindinu anubɛ anuna soeenu ni kasara. Anuna kɛlɛ-den-masannɛnu ni faga, ado anu tafaganɛ kuluba! Anuna fen-kolomɛnu ni tinya ka toronde anu na fɔrɔsɛ la.

³⁸ Alamɛ tɔn sigira bandɛla nɛ la. Bɛnu ni gbala anu worɔn la todo! Babilɔn nyamanɛ lafanɛ bɛsi-makilannɛnu na, ado anu bara mɔgɔ siyaman nayuwaya.

³⁹ Woletɔ sulukinu anubɛ fen-makilannɛnu, hali gbingbinnyagannu-kan si to bɔla nyɔ. Mɔgɛnu ti sigi nyɔ ni!

⁴⁰ Koe min sigira Sɔdɔm anubɛ Kɔmɔra anubɛ nyɔ-dafɛ-so-mɛsɛnu ma, wo nyɔgɔn si sigi Babilɔn kɛnu ma. Mɔgɔ ti sigi nyɔ tun. Mari kan le kɛ la.

⁴¹ Mansa-siyaman tabɛnnɛ kɛlɛ-koe la, ado anuna kɛlɛ-dannu bi bɔla kantɔ-findan ma, sibolo-makilannɛ min fɛ-yan anu na, kɔni.

⁴² Anu bara na anuna kalabɛn anubɛ anuna faannu na. Anu wunduyogo, ado anu ti kinikini. Anu siginɛ soee minnu na, wonu na-kan mani de iko kɔgɔ-yi tenbi tugula a rɔ. Anu bara anu kɔnkɔn Babilɔn kɛlɛ-kan ma.

⁴³ Wo lamɔɛn Babilɔn mansɛ bolo, a mankulan bɔra a ma. Hɔnya sigira-a-la iko musi bui wa a lamaga.

⁴⁴ Mari ko a si a ma, Babilɔn kɛnu ni anu buri iko yarɛ wa bɔ Yorodan-ba-gbɔngbɔn rɔ ka a kun nabɔ kolo-fen de-nyini-tinɛ ma. Wo kɔma, Mari wa mɔgɛ min yabɔ, wo le ye nyamanɛ marala. Mari ko ale nyɔgɔn sa nyɔ. Yon si a kɔgɔ raka a la? Kun-tigi yon si ke a rasɛla?

⁴⁵ Mari ko a ara koe min tabɛn Babilɔn kɛnu kan ma, anu ni anu tole masɔ wo la. Hali anuna dannu, anu yogenu si wonu sagan dugi la. Bɛɛ kun ma si kɔ.

⁴⁶ Babilɔn nyamanɛ wa bui tumɛ min, wo bui-kan si duninya ramaga. Sibole doi wonu si anu di-kɛ-kan lamɔɛn.