Yɛrɛmaya 49 - ALLALA KUMƐ

Amonnu Kiti-Koe Mari Bolo

¹ Mari ya kɛ le fɔ Amonnuna ko rɔ. A ko kurusi-tigi sa Isirɛla mɔgɛnu tɔ min si anuna nyamanɛ kumafunfan? Nfenna Molɛki kɔlɛnu ya Kadi bɔnsɔnta nyamanɛ bi anu yala ka sigi nyɔ, anu ma fenfen fɔ?

² Wati ye nala, mɔgɛ minnu siginɛ Amonnuna so-karantan Raba burɔ, Mari ko a si a ma, wonu ni kɛlɛ-sɔnkɛ lamɔɛn. Soe wo si to tonbonyɛ la. A dafɛ-so-mɛsɛnu si mintan gburr! Minnu ya kan-tinɛ wonu bi Isirɛla mɔgɛnu bolo nun, Isirɛla mɔgɛnu fanan si anu gben nyɔ.

³ Hɛsibɔn kɛnu ni di sɔɛɛ! Eyai soe si na halaki. Raba musinu ni anu dɛ bolobɔ. Anu ni kasa-kurɛnu kɛ anu ma di-kɛ-tinɛ. Anu ni to yigi-ni-yɛlɛ kɛla kɔndɔfili bolo. A ko anu yogenu si ta anuna bɛsi Molɛki anubɛ a kɔlɛnu anubɛ anuna mɔgɔ-banu na.

⁴ Nfenna lanayabɛlɛnu bi anu nyɛrɛ matɔgɔla ko anu tagbɛlɛ? Nfenna anu yili latɛgɛnɛ ko anu nɔla-wo-nɔla sa nyɔ?

⁵ Ale Mari Sɛnbɛ-Bɛɛ-Tigi ko a si a ma, anu ni kilan kan tinɛ bɛɛ rɔ. Anu dama si anu buri tɛrr, anu niyila ko la. Kɛlɛ-dannu kundɛnna-wo-kundɛnna ti taran anu tɔ.

⁶ Kɔnɔ Mari ko tɔ-a-la, Amonnu si ma-a-la tun. Mari kan le kɛ la.

Idɔm Kɛnu Kiti-Koe Mari Bolo

⁷ Mari Sɛnbɛ-Bɛɛ-Tigi ya kɛ le fɔ Idɔm kɛnuna ko rɔ ko hɛnkilima sa Idɔm kɛnu tɔ, wa? Anu hɛnkili-kɔlɛnuna hɛnkili ara toronde anu na, wa? Anuna ko-lɔn ara tunu anu bolo, wa?

⁸ Didan so-burɔ-mɔgɛnu ni anu kan-kɔ sɔ. Anu ni anu buri tala anu dogonna. Mari ko a ye nala Isɔ kegeyɛnu kasarala, Idɔm kɛnu, kɔni bawo anu tɔrɔ-wati ara ke a bolo.

⁹ Ni mɔgɛ ya kɔn-gbɔɛ keri, a si a kelen-kelennɛnu to a la. Ni kankannu nara bɔn la suyi rɔ, anu bi anu bitɛ le bila.

¹⁰ Kɔnɔ Mari ko a si Isɔla nyamanɛ makolonya filili, ka anu dogon-tinɛ bɛɛ ma gbɛkole la. Idɔm mɔgɛ bɛɛ si kasara tɛrr! Hali mɔgɔ den kolo kelan, a ti to a niyi la.

¹¹ Mari ko anu ni wola kelennɛnuna fɛ-birɛ to ale ma. Anuna kɛɛ-nyaganɛnuna dunɛ si to ale ma.

¹² Hali a ma bɛn minnu ni tɔrɔyɛ sɔrɔn, fɔ tɔrɔya-yi-lafɛ ni sɔ anu dɛ la. Anu denu don? Anu miri ko anu ti tɔrɔyɛ sɔrɔn.

¹³ Mari ara a keli ko mɔgɛ min ba Bɔsira soe tinya-nya yen, wo yisi si tinya bawo a ara ma wula-da-rakolɔn la. Anu si nyɔ-tɔgɛ rakele dankali-kɛ-tinɛ. Nyɔ-dafɛ-so-mɛsɛnu si to tonbonyɛ la tolon! Mari kan le kɛ la.

¹⁴ Nde, Yɛrɛmaya ya a lamɔɛn Mari la ko a ara kilayɛ lata sibolenu ma ko anu ni anu kundɛn Idɔm kɛnu kɛlɛ-koe ma.

¹⁵ Mari ko a ti mɛ tun, a si Idɔm sibole madɔgɔya. Anu bɔrɔ ti taran mɔgɔ-wo-mɔgɔ ye.

¹⁶ Anuna wasinteyɛ ara anu bolo labira bawo mɔgɔ-wo-mɔgɔ ti kilan anu na tun iko anu miriya ye nya min nun. Hali anu sigira fara-kolo-kɔnkɔ-layan-bɛnu kuma, hali anu yɛlɛta san ma pon iko kokɛ, Mari ko a si anu fɛrɛn dugi la. Mari kan le kɛ la.

¹⁷ Mari ko kasarɛ min bi sigila Idɔm kɛnu na, wo ma si kilan. Hali min tenbi tenbila nyɔ, anu yigi si tɛgɛ kumakɔɛ bolo gbat!

¹⁸ Kasarɛ min nyɔgɔn sigira Sɔdɔm anubɛ Kɔmɔra anubɛ anu dafɛ-soenu ma, wo nyɔgɔn si na sigi Idɔm kɛnu fanan ma. Hadama-den fenfen ti sigi nyɔ tun! Mari kan le kɛ la.

¹⁹ Mari ko a si a ma, Idɔm kɛnu ni anu buri iko yarɛ wa bɔ Yorodan-ba-gbɔngbɔn rɔ ka ta a kun nabɔ kolo-fen de-nyini-tinɛ ma. Wo kɔma, Mari wa mɔgɛ min yabɔ, wo le ye Idɔm kɛnuna nyamanɛ wo marala. Mari ko ale Mari nyɔgɔn sa nyɔ. Yon si a kɔgɔ raka a ye? Kun-tigi yon si ke a rasɛla?

²⁰ Mari ko a ara koe min tabɛn Idɔm kɛnu kan ma, hali minnu siginɛ Timan soe burɔ, anu ni anu tole masɔ wo la. Hali anuna dannu, anu yogenu si wonu sagan dugi la. Bɛɛ kun ma si kɔ.

²¹ Idɔm nyamanɛ wa bui tumɛ min, a bu-kan wo si duninya ramaga. Anu di-kɛ-kan la si mɔɛn ha Kɔgɔ-Yi-Wulen bolɔn doi ma pon!

²² Bɔsira kɛnu yogenu si yigi anu kuma iko kokɛ-kanban tafulennɛ tenbi yigila fii! Wulɔn tele, Idɔm kɛlɛ-dannu kun ma si kɔ iko musi buyi wa a lamaga.

Damasika Kiti-Koe Mari Bolo

²³ Mari ya kɛ le fɔ Damasika kɛnuna ko rɔ. Hamati so-burɔ-mɔgɛnu wo, Arapadi so-burɔ-mɔgɛnu wo, wonu kun ma si kɔ ka a tɛgɛ anu bara yisi-tinya-kumɛ min namɔɛn. Hɔnya ye tugula anu kan ma iko gboron-gboronna-yi. Sulen sa anu ma.

²⁴ Damasika kɛnu si na ma kɔlɔbɔ! Anu si na anu buri kilan bolo. Anu si na anu sɔrɔkɔnna dumɛ bolo iko musi buyi wa a lamaga.

²⁵ Sewɛ ye so-karantan min tɔ nun, wo ra si kolonya filili!

²⁶ Wulɔn-tele, nyɔ-keminɛnu si ta sala a ma barɛnu tɔ tɛnɛnɛ! A kɛlɛ-dan bɛɛ si kasara.

²⁷ Mari ko a si tɛ tugu Damasika tarɛ la. Mansa Bɛnhedadila bolɔn si mintan. Mari Sɛnbɛ-Bɛɛ-Tigi kan le kɛ la.

Kedarinu anubɛ Hesɔ Soe Kiti-Koe Mari Bolo

²⁸ Mari ya kɛ le fɔ Kedarinu anubɛ Hesɔ soela ko la, Babilɔn Mansa Nɛbukanasa ye nala minnu nɔla, kɔni. A ko anu ni na Kedarinu kɛlɛ, minnu siginɛ tele-bɔɛ wara la, kɔni.

²⁹ A ko Babilɔn kɛlɛ-dannu ni anuna fani-bɔnnu anubɛ anuna kolo-fannu torondo anu na. Anu ni anuna fan bɛɛ bi anuna fani-bɔnnu burɔ, hali yorolannu ti to. Anu tenbi nyomɛnu bila tumɛ min, anu si a fɔ ko, “Fen-makilannɛnu bi wola foolɛ rɔ!”

³⁰ Mari ye Hesɔ so-burɔ-mɔgɛnu makawandila ko anu ni anu buri ka ta anu dogon pon! Babilɔn Mansa Nɛbukanasa si na yanfɛ don anu ma. A ko,

³¹ “Wo na. Ma ni ta bui mɔgɛ kɛnu ma minnu miri ko anu nakanannɛ le. Tara sa soe wo ma, ado tara da-balan-fan sa nyɔ.”

³² Mari ya a fɔ Babilɔn kɛlɛ-dannu ye ko anu ni nyomɛnu anubɛ kolo-fan bɛɛ bi tɛrr! A ko a si Hesɔ kɛnu fui, minnu si anu kun-sigi lawuruya, kɔni. Kasarɛ si ke anu ma kan-tinɛ bɛɛ rɔ.

³³ Hesɔ soe si ma wula-da-rakolɔn la. A si ma sulukinu sigi-tinɛ la. Hadama-den ti sigi nyɔ tun. Mari kan le kɛ la.

Ilam Nyamanɛ Kiti-Koe Mari Bolo

³⁴ Sɛdɛkaya mɛ mansɛ la Yuda nyamanɛ rɔ, a ma mɛ wo kɔma, Mari kumara nde, Yɛrɛmaya ye Ilam nyamanɛla ko la.

³⁵ A ko Ilam kalabɛn-nakɛla-wɛ minnu bara Ilam soe tɔgɔ bɔ, a ko a si wonu firan feya!

³⁶ A si fɔn-digidigi-wɛ latugu anu ma ka bɔ duninya-tonko-nanɛ bɛɛ rɔ. Fɔnyɔ wo si Ilam kɛ wonu tanyɛnsɛn duninya kun na. Duninya-tɛngbɛnya fenfen ti taran Ilam kɛ kɛnu ti ke kan min.

³⁷ Mari ko a si a ma, Ilam kɛnu ni kilan anu yogenu na, anu faga-sɔgɛ ye minnu na, kɔni. Mari ko ata fondo-bɔɛ si a ma, Ilam kɛnu yogenu ni tugu anu kan ma ha anu na ni ban tola dogbe!

³⁸ Mari ko a si a yira Ilam kɛnu na ko mansɛ le ale le la. A ko ale Alla si anuna mansɛ anubɛ anuna mɔgɔ-banu kasara pɔ!

³⁹ Kɔnɔ Mari ko lunyɛ do si na, a si a ma, Ilam kɛnu ni sabati tun. Ale Mari kan le kɛ la.