Yɛrɛmaya 48 - ALLALA KUMƐ

Mohabu Nyamanɛ Halaki-Koe

¹ Mari Sɛnbɛ-Bɛɛ-Tigi ya kɛ le fɔ Mohabu nyamanɛla ko la. A ko bɛɛ ni kinikini Nibɔ kɛnu ma bawo anu si na kasara. Kiriyateyim soe si bira. A tara-layan-bɛ si bui fugbu! A mɔgɛnu yarabinɛ si to,

² ado Mohabu kɛnuta so-nyimɛ si tinya pɔ! A yogenu bi nala Hɛsibɔn soe birala. Anu bi yanfɛ kirila nyɔ le gbɛ alako anu si Mohabu nyamanɛ toe bira nya min. Madena so-burɔ-mɔgɛnu tadenɛ si to don bawo faan ye nala anu sagaranna.

³ Worondo-kan ye nala ka bɔ Hɔrɔnayim soe burɔ. Anu bi dila ka a tɛgɛ karagbɛlɛyɛ anubɛ halakiyi wara-koe ma.

⁴ Mohabu nyamanɛ si na halaki. Anuna dannu di-kɛ-kan la si mɔɛn.

⁵ Anu bi yɛlɛla Luhiti soe magbenna, anu kulu-mayɛlɛnɛ la. Anu tenbi yigila Hɔrɔnayim soe magbenna, anu bi dila yisi-tinya bolo.

⁶ Anu bi a fɔla ko, “I buri i niyila ko la. I buri iko bintɔ-sofɛlɛ.”

⁷ Mohabu kɛnu yili-latɛgɛnɛ anu sɛnbɛ anubɛ anuna nɔnfuli ma, anu si ta biralɛ rɔ. Anuna bɛsi Kimɔsi fanan si ta biralɛ rɔ. Anu yogenu si ta bɛsɛ wonubɛ a kɔlɛnu anubɛ ala mɔgɔ-banu na.

⁸ A kɔnkɔrɔ-soenu wo, a lɛɛrɔ-soenu wo, wo bɛɛ si na kasara. Wo do-wo-do kunyɛ ti bɔ a rɔ. Mari kan le kɛ la.

⁹ Mohabu kɛnu tɔgɛ si sɛbɛ kanba kuri ma bawo anu sa mɛla kasarala tun! A soenu si to tonbonyɛ la. Hali mɔgɔ-den-kelan ti sigi nyɔ tun!

¹⁰ Dankɛ ye wo tigi ma min sa sɔnna Marita wɔlɛ kɛla a sɛnbɛ la. Dankɛ ye wo tigi ma min ti sɔn yele ni don ala faan ma.

Mohabu Soenu Kasara-Koe

¹¹ Mari ko Mohabu kɛnu nafɛrɛni de tuma-wo-tuma. Anu ma ta biralɛ rɔ ni! Anu siginɛ iko gbɛɛ min kɔrɔ siginɛ, mɔgɔ ma a bole tugu wɛ min barɛ la. A diyɛ ye a la iko a ye nya min nun fɔlɔ. A sumɛ ye bɔla iko a ye nya min nun fɔlɔ fanan.

¹² Kɔnɔ Mari ko tumɛ ye nala, a si mɔgɛnu nana min si anu tawiya iko gbɛɛ wo. Anu si anu tawiya ka anu barɛnu fɛrɛn dugi la.

¹³ Iko Isirɛla mɔgɛnuna bɛsi ya anu baya nya min Bɛtɛli soe burɔ, Mohabu kɛnuna bɛsi Kimasi ye anu bayala wo nya na le, ado anu lanɛ wo la kati!

¹⁴ Mohabu keinu bi anu nyɛrɛ mala kɛlɛ-nyananu na nfenna ko la? Anu miri ko kɛlɛ ara anu tasuma nun, ba?

¹⁵ Mohabu nyamanɛ anubɛ a soenu si tinya pɔ! A kemini-mɛsɛ-nyimɛnu kan na si tɛgɛ. Mala mansɛ Mari Sɛnbɛ-Bɛɛ-Tigi kan le kɛ la.

¹⁶ Mohabula ban ye nala. A ye nala banna tiriya!

¹⁷ Wole min siginɛ nyamanɛ wo dafɛ, wo di nyamanɛ wola ko la katarala wole ma minnu ya a mankan lɔn fɔlɔ nun. Wo ni a fɔ ko, “A sɛnbɛ-makawanɛ ra ara kerikeri. A fanka anubɛ ala gbiliyɛ sa nyɔ tun.”

¹⁸ Wole min siginɛ Dibon soe burɔ, wo si yigi ka bɔ wola gbiliya-tinɛ rɔ ka na sigi gbangban rɔ. Mohabu nyamanɛ kasaralɛ ye yan. Dibon so-latankanɛ kasaranɛ si to.

¹⁹ Wole min siginɛ Arɔra soe burɔ, wo ni wo sɔ kilɛ la ka to wo yɛ lakalanna. Wo ni kɛlɛ-kɔrɔ-burilɛnu manyinika ko, “Nfen mara nun?”

²⁰ Anu si anu yabi ko, “Mohabu kɛnu miliyanɛ nyamanɛ tinyala ko la. Arɔra kɛnu ni gbele-gbelen ka di. Wo ni a fɔ Anɔn bɛ dafɛ. Mohabu nyamanɛ ara halaki pɔ!”

²¹ Allata kiti ye kɔnkɔ-kuma-soe kɛnu ma, Holɔn, Yasa, Mɛfeyati,

²² Dibon, Nibɔ, Bɛti-Dibilatayim,

²³ Kiriyateyim, Bɛti-Gamulu, Bɛti-Miyon,

²⁴ Kɛriyoti anubɛ Bɔsira. Wula-yanna soenu wo, wo dafɛ-soenu wo, kiti ara na anu dama ma Mohabu nyamanɛ rɔ.

²⁵ Mohabu sɛnbɛ ra si bunden iko kɔrɛ! A sɛnbɛ bɛɛ si na tinya. Ale Mari kan le kɛ la.

Mohabu Nyamanɛ Yarabi-Koe

²⁶ Mari ko, “Wo ni Mohabu kɛnu lamin kɔlikɔli, bawo anu bara murutiya ale Mari ma. Mohabu si a mataragban a nyɛrɛ tesere gbɛ rɔ ha mɔgɛnu ni a mayɛlɛn.

²⁷ Mohabu kɛnu taranta Isirɛla mɔgɛnu bira boloko-yogomɛ-kɛla. Anu bara anu bira iko kankannu.

²⁸ “Anu denu min siginɛ Mohabu nyamanɛ rɔ, anu ni bɔ soenu tɔ ka ta anu dogon fara-woenu na. Anu ni ma iko kura-kangbɔɛ min si a nyagan sa faran la nya min.

²⁹ Mohabu kɛ kɛnu wasira. Anu nyɛrɛ kɔrɔtanɛ. Anu ya anu nyɛrɛ kelen pe lɔn mɔgɛ la.”

³⁰ Mari ko ale nyɛrɛ ye anuna wasinteyɛ kalama. Anuna kɔgɔ-rakɛ, fu le wo la. Anu bi min bɛɛ kuma, laban ko ma wo fenfen na.

³¹ Woletɔ Mari ko a si di Mohabu kɛ bɛɛ anubɛ Kiri-Harɛsɛti kɛnuna ko la.

³² A ko a si di Yasa kɛnuna ko la kɔnɔ katarala Sibima kɛnu ma. Sibima soe mani de iko nɔnbɛ min bolɔn ye tala fɔɔ Dalɛ Faganɛ kɔgɔma ka ta ke Yasa soe ma. Kaka, anuna ki-fen-hakikɛ anubɛ anuna nɔnbɔ-gbɔɛnu si halaki pɔ!

³³ Anu si ta anuna kɔntɔdiyɛ anubɛ sewɛ la anu bolo ka bɔ anuna nyamani-hakikɛ rɔ! Mari ko a ara tɔn sigi anuna minni-fan bɔ-tinɛnu na. Mɔgɔ-wo-mɔgɔ ti taran nyɔ min si minni-fan ladan, ni wo ma, ka sarandɛ ratii sewɛ bolo.

³⁴ Hɛsibɔn kɛnu anubɛ Ɛlɛyela kɛnu si anu dɛ sa-a-rɔ di-kɛ-tinɛ. Anu di-kɛ-kan si ta ha Yehasi soe burɔ. A si ta ha Sowa soe. A si ta fanan Hɔrɔnayim anubɛ Igilati-Sɛlisiya soe burɔ. Hali Nimirim yi-nɛ si gbala a dagɛ rɔ todo!

³⁵ Mari ko a si Mohabu kɛnu nato bawo anu bi sarakɛnu anubɛ isɛnti mintanna anuna bɛsɛnu ye. Mari kan le kɛ la.

³⁶ Woletɔ a ko a si di Mohabu anubɛ Kiri-Harɛsɛti kɛnuna ko la. A si di iko mɔgɛ tenbi saya-sigi sala fuli rɔ bawo anu bolo-fan bɛɛ si na kasara anu ma.

³⁷ Bɛɛ si a kunyɛ gbana ka anu buyɛ matɛgɛ. Bɛɛ ye nala a bole matɛgɛ-tɛgɛla di-kɛ-tinɛ ka kasa-kurɛ kɛ a ma.

³⁸ Fenfen sa nala taranna Mohabununa bɔnnu na anubɛ barɛnu tɔ fɔ diyi kɛ bawo Mari ko a si na Mohabu nyamanɛ ratii iko mɔgɛ si bɔnku-dagɛ ratii nya min mɔgɔ-mako sa min na.

³⁹ Mohabu kɛnu tanyɛnsɛnnɛ ye belenna. A ko bɛɛ ni di bawo anu si na yarabiyi sɔrɔn. A ye nala taranna tonbonyɛ le la, ado anu dafɛ sibolenu bi nala anu mayɛlɛnna. Mari kan le kɛ la.

Mohabu Kunyɛ Bɔbɛlitayɛ Gbaran Rɔ

⁴⁰ Mari ko, “Wo ni wo yɛ lata kɛlɛ-dannu mayigila Mohabu kan ma iko kokɛ-kanban tafulennɛ tenbi yigila fen kan ma.

⁴¹ Anu si Mohabu soe bɛɛ bira-a-la anubɛ a so-latankanɛnu. Tele wo ma, Mohabu kɛlɛ-dannu si kilan iko musi buyi wa a lamaga.”

⁴² A ko Mohabu nyamanɛ si kasara. A ti ma nyamanɛ la tun bawo a ara murutiya Mari ma.

⁴³ Kumakɔɛ anubɛ denkɛ anubɛ gbɛrɛ rabɛnnɛ Mohabu kɛnu ye. Mari kan le kɛ la.

⁴⁴ Min tenbi a burila kumakɔɛ bolo, wo ye buila denkɛ rɔ. Ni min bɔra denkɛ rɔ, wo si bira gbɛrɛ la bawo ale Mari ara ban Mohabu kasara-wati latɛgɛla.

⁴⁵ Mansa Saihɔn ye Hɛsibɔn soe min kun na nun, minnu bi anu burila kɛlɛ kɔrɔ ka ta soe kɛ magbenna anu nakanan-koe la, wonu si a taran, tɛ biranɛ soe kɛ la kiribo! Ta-kelan wo si Mohabu nyamanɛ maforongban, hali mɔgɔ sa kan-tinɛ minnu tɔ, ado wasinte kɛlɛ-tɛgɛla-wɛ le anu na nun kati!

⁴⁶ Gbalo si na Mohabu kɛnu ma. Bɛsi Kimasi kɔlɛnu si na kasara. Kɛlɛ si ta anuna dannu na.

⁴⁷ Kɔnɔ tɔ-a-la, Mari si a ma, Mohabu kɛnu ni to tala yarɔ. Mari ya kɛ le fɔ ka a tɛgɛ Mohabu kɛnuna ko ma.