Yɛrɛmaya 46 - ALLALA KUMƐ

Sarakanɛ Iyipiti Wara-Koe Rɔ

¹ Mari kumara n ye sibolo-gbɛrɛnuna ko rɔ.

² A ya a dabira Iyipiti ma. Yahoyakimta san nani nyɔgɛ ma Yuda nyamanɛ kun na, Babilɔn Mansa Nɛbukanasa ya Iyipiti Mansa Nikola kɛlɛ-dannu nɔ Yufereti bɛ dafɛ Kakemisi soe burɔ.

³ Mari ko Iyipiti kɛlɛ-den-kunyɛnu ya anu dɛ bolobɔ. Anu ko, “Wo ni wola nɛgɛ-walannu bi ka ta kɛlɛ rɔ.

⁴ Wo ni karafɛnu sa wola soeenu dɛ ma ka sigi anu na. Wo ni wola nɛgɛ-fulɛnu don wo kunyɛnu na ka wo sɔ wo sansan-yili ma. Wo ni wola tanbɛnu nasulen. Wo ni wola nɛgɛ-durukinu don wo kan na.”

⁵ Mari ko a ya a kolan lata de pan! A ko Iyipiti kɛlɛ-dannu bi sɛgila anu burila kilan bolo. Anuna kɛlɛ-dannu bi anu burila. Anu pelapelɛ ye tala kumakɔɛ bolo. Anu ti ke anu yɛ lasɛgila anu kɔma.

⁶ Hali a buri-kɛla-wɛnu, anu kunyɛ ti bɔ a rɔ. Anuna kɛlɛ-dannu kunyɛ ti bɔ a rɔ. Anu bi anu kian latugula kantɔ-wara la Yufereti bɛ dafɛ ka ta bui fugbu!

⁷ Yonnu tɔkɔkɛ ye nala wo la iko Nayɛli bɛ? A beyabeyɛ iko bɛ tenbi yanbɛ gbesila.

⁸ Iyipiti kɛlɛ-dan denu tɔkɔkɛ ye nala wo la iko Nayɛli bɛ. Wonu denu beyabeyɛ iko bɛ tenbi yanbɛ gbesila. Anu ko, “Ma si yɛlɛ ka duninya bɛɛ yamatogon. Wo si a ma, soenu ni halaki anubɛ nyɔ-burɔ-mɔgɛnu.

⁹ Wo ni soeenu naburi wɛ kɛ. Kirindinu gbɛ ni to. Ini kɛlɛ-dannu nata. Sudan kɛnu anubɛ Libiya kɛnu si nɛgɛ-lufɛnu bi. Lidiya kɛnu si kalɛnu tasagan.”

¹⁰ Ma Tigi Mari Alla Sɛnbɛ-Bɛɛ-Tigita tele le kɛ la. A ye nala a tayili sarala bi. A ye nala anu yogenu tɔrɔla bi. Ala faan si anu dɔn ha a buyi la ni fa. A si anu yele min ha a ni wasa. Mari Sɛnbɛ-Bɛɛ-Tigi si a ma, Babilɔn kɛlɛ-dannu bi a yogenu kan natɛgɛla Yufereti bɛ dafɛ kantɔ-wara la.

¹¹ Iyipiti kɛnu ni ta Kaliyadi anu dandan bɛsi-nyini-tinɛ. Bɛsɛ wo ti ko nyinya anu ma. Fenfen ti anu dandan.

¹² Duninya ye anuna miliya-koe lamɔɛnna. Bɛɛ ye anu di-kɛ-kan lamɔɛnna. Kɛlɛ-dannu si to fɛrɛnna anu nyɔgɔn na. Anu ni bui anu nyɔgɔn fɛ fugbu!

Nɛbukanasa Na-Koe

¹³ Babilɔn Mansa Nɛbukanasa nara Iyipiti kɛlɛ-tinɛ tumɛ min, Mari kumara n ye. A ko

¹⁴ nde, Yɛrɛmaya ni kumɛ kɛ lawanka Iyipiti nyamanɛ rɔ. N ni a mayon Migidɔli anubɛ Mɛmfisi anubɛ Tapanisi soe burɔ ko, “Wo ni wo rabɛn kɛlɛ kan ma bawo wo bɛɛ ye nala lakira sɔrɔnna kɛlɛ rɔ.

¹⁵ Wola bɛsi-makawanɛ Epesi min nadannɛ turɛla muninyɛ rɔ, nfenna ko la wo sanɛ dugi ma? A ti ke a sɔla bawo Mari le wara a digin dugi la.

¹⁶ Iyipitila kɛlɛ-dannu bi tonko-tankanna ka bui kilan bolo. Anu bi a fɔla anu nyɔgɔn ye ko, ‘Ma ni ma buri tala mala mɔgɛnu bara ma halala-nyamanɛ rɔ. Ma ni ma buri ma yogenu kɔrɔ.’ ”

¹⁷ Mari ko n ni Iyipiti mansɛ tɔgɔ-kurɛ sa ko, “Sɔnkɔ-Gbansan Min Foora ala Mansaya-Tumɛ la.”

¹⁸ Mari ko mansɛ le ale Mari Sɛnbɛ-Bɛɛ-Tigi la. A ko Alla-nimɛ le ale la. Iko Tebɔ kɔnkɛ layan kɔnkɛ bɛɛ ko nya min, iko Kamɛli kɔnkɛ dunnɛ kɔgɔ-yi kuma nya min, Iyipiti yogenu sɛnbɛ kolo Iyipititɛ ko wo nya na le.

¹⁹ Iyipiti kɛnu ni anuna mirannu mabɛn bawo anu biratoe le ka ta anu na. Mɛmfisi soe si ma wula-da-rakolɔn la mɔgɔ sa kan min.

²⁰ Iyipiti mani de iko ninki-tɔlɔnɛ kɔnɔ sigitɛgɛ ye nala a kan ma ka bɔ kantɔ-wara la.

²¹ Hali ala kɛlɛ den sannɛnu, wonu tafagani de iko ninki-dan sɔrɔn-san. Anu fenfen ma ke kɛlɛ rakɔnɔna fɔ ka anu buri. Anu kasara-tele ara na. Anu tinya-tele ara ke.

²² Iyipiti kɛnu bi anu burila anu yogenu kɔrɔ iko duguma-fan tenbi a burila fen kɔrɔ binyɛ rɔ. Anu yogenu si anu makeri tɛgɛran la iko kɔn-tɛgɛlɛnu bi kɔlɔmanu tɛgɛla tɛgɛran la nya min

²³ ka gbɔngbɔn makeri-keri nya min. Anuna kɛlɛ-dannu dan sa. Anu siyayanɛ iko kondɔn.

²⁴ Iyipiti mɔgɛnu bi nala yarabila bawo kantɔ mɔgɛnu bi nala anu nɔla le. Mari kan le kɛ la.

²⁵ Mari Sɛnbɛ-Bɛɛ-Tigi Isirɛlata Alla ko a sa mɛla tun, a ye tɔrɔyɛ lanala Tibisi kɛnuta bɛsɛ ma min tɔgɛ Amuna. A si Iyipiti kɛnuna mansɛnu anubɛ ala mɔgɛnu anubɛ anuta bɛsɛnu tɔrɔ anu nyɔgɔn fɛ. A ko a si Iyipiti mansɛ wurun anubɛ min bɛɛsi lanɛ ale mansɛ la.

²⁶ A si anu kunyɛ don Babilɔn Mansa Nɛbukanasa anubɛ ala kɛlɛ-dannu bolo, anu faga-sɔgɛ ye minnu na! Kɔnɔ a ko tɔ-a-la, mɔgɛnu si na sigi Iyipiti tun iko fɔlɔ. Mari kan le kɛ la.

Marita Mɔgɛnu Kisi-Koe

²⁷ Mari ko wole, ala mɔgɛnu kana kilan. Isirɛla mɔgɛnu kuma kana kɔ. A ko a si wo labɔ wula-yan-nyamanɛ rɔ wo ye biralɛ rɔ kan min nun. A ko a si na wo la ka wo sigi wo fanbolo. A si wo kandan. Mɔgɔ-wo-mɔgɔ ti wo lakilan.

²⁸ A ko wole, Yakoba kegeyɛnu, wo kana kilan. A ko a si na wo wara ka wo lakisi. A ya wo ranyɛnsɛn kan-tinɛ min bɛɛ rɔ, a ko a si sibole wo bɛɛ kasara kɔnɔ a ti wole lato. A ko hali wo, a ti wo tɔrɔbɛlɛ to kɔnɔ a ye tɔrɔya-bɛnmatɛ dila wo ma. Mari kan le kɛ la.