Yɛrɛmaya 42 - ALLALA KUMƐ

Yɛrɛmaya Manyinika-Koe Alla Madiya-Koe la Mɔgɛnu Bolo

¹ Kareyala den Yohenan wo, Hosayala den Asaraya wo, a kɛlɛ-den-kun toenu wo, anubɛ mɔgɔ-subolo-sufa bɛɛ nara nde, Yɛrɛmaya wara.

² Anu ya a fɔ n ye ko, “I yandi, ma ye i manyinikala min na, wo kɛ ma ye. Male min tonɛ, i ni mata Mari Alla madiya ma ye. I ma a yen, fɔlɔ nun ma siya kɔnɔ kaka, ma ara dɔgɔya.

³ I ni madiyali kɛ ma ye alako Mari Alla ni ma munanfaga-kilɛ yira ma la.”

⁴ N ya anu yabi a kin na, n ko, “N si Alla madiya wo ye iko wo ya a fɔ n ye nya min. Ni a ya ko-wo-ko fɔ n ye, n si wo fɔ wo ye. N ti ko-wo-ko dogon wo ma.”

⁵ Wo kɔma, anu ya a fɔ n ye tun ko, “Ile ye nala ma Mari Allata tɔn min fɔla ma ye, ni ma ma wo bɛɛ bira a kilɛ fɛ, ale Mari min telennɛ, alamɛ a mara sere la ma kan ma.

⁶ A diyara ma ye wo, a ma diya ma ye wo, fɔ ma wa Mari Allata kumɛ bira le ma ya min madiya-koe fɔ ile Yɛrɛmaya ye. Koe bɛɛ ra si bɛn ma ma, ni ma ya ma Mari Allata tɔnnu bira.”

Yɛrɛmayala Madiyalɛ Lamɔɛn-Koe Mari Bolo

⁷ Tele tan wo kɔma, Mari kumara n ye tun.

⁸ N ya Yohenan kele anubɛ ala kɛlɛ-den-kunyɛnu anubɛ a mɔgɛ toenu.

⁹ N ya a fɔ anu ye ko, “Wo ya n nata Mari Isirɛlata Alla min ma, wo ko

¹⁰ ni wo ye a fɛ wo ni to nyamanɛ kɛ rɔ, a si wo ma mɔgɛ la, a ti wo tinya tun. A ko a si wo ki, ado a ti wo wurun tun. A ko a nara kasarɛ min na wo ma fɔlɔ, wo ya a ma, a kinikinita wo ma.

¹¹ A ko wo ni fara kilanna Babilɔn mansɛ la. Ale Mari si taran wo fɛ. A si wo tanka a sɛnbɛ-wɛ la.

¹² A ko a si kinikini wo ma ka a ma, Babilɔn mansɛ fanan ni kinikini wo ma. A ko a si a ma, wo ni sɛgi tun wo warɛ. Mari kan le kɛ la.

^13-15 “Kɔnɔ wole min tora Yuda nyamanɛ kɛ rɔ, wo kana wota Mari Alla sɔsɔ ka wo ban sigila nyamanɛ kɛ rɔ. Wo kana to a fɔla ko wo ye tala Iyipiti ka kɛlɛ masangba bawo kɛlɛ anubɛ kɔnkɔ sa nyɔ. Mari Sɛnbɛ-Bɛɛ-Tigi Isirɛlata Alla ko ni wo tora a fɔla ko fɔ wo ni ta sigi Iyipiti nyamanɛ rɔ,

¹⁶ nba, wo kilannɛ kɛlɛ min na, wo si wo taran wo yarɔ nyɔ. Wo kilannɛ kɔnkɛ min na, wo si wo sagaran nyɔ. A ko wo si faga Iyipiti nyamanɛ rɔ nyɔ.

¹⁷ A ko Iyipiti ta-sɔgɛ ye mɔgɛ minnu na, ni wonu tɔgɔ ma to kɛlɛ la, anu tɔgɔ si to kɔnkɛ la, ni wo ma, kirayɛ. Hali mɔgɔ-den-kelan, a ti to a niyi la. A ko a ye kasarɛ min nanala anu ma, mɔgɔ-wo-mɔgɔ kunyɛ ti bɔ wo rɔ.

¹⁸ “Mari Isirɛlata Alla ko iko a fonde bɔra Yerusalɛm kɛnu kuma nya min, ni wo tara Iyipiti nyamanɛ rɔ, a fonde ye bɔla wo kan ma wo nya na le. A ko min ba wo yen, wo kuma si tɛgɛ. Mɔgɛnu si wo bira boloko-yogomɛ-kɛ ka wo tɔgɛ ma dankali-kɛ-fan la. A ko wo ti kan-tinɛ kɛ yen tun!

¹⁹ “Mari ara ban a latɛgɛla ko wole minnu bara to Yuda, wo kana ta Iyipiti. N bi tonyɛ fɔla wo ye,

²⁰ wo ara wo nyɛrɛ baya min si a ma, wo kunyɛ si to-a-rɔ. Wo ya n manyinika ko n ni mata Mari Alla madiya wo ye, ado wo ko a miriya ye ko-wo-ko ma, wo ye wonu denu kɛla.

²¹ N bara a fɔ wo ye kɔnɔ hali wo, mata Mari Alla ya min di n ma ka a fɔ wo ye, wo tole gberenɛ ka ata tɔn wonu bira.

²² Woletɔ wo hɛnkili ni to kɛ ko. Sigi-sɔgɛ ye wo la nyamanɛ min tɔ, wo tɔgɔ si to kɛlɛ la nyɔ, ni wo ma, kɔnkɛ anubɛ kiraya-fitinɛ.”