Yɛrɛmaya 41 - ALLALA KUMƐ

¹ San wo karɛ wɔrɔnfila nyɔgɛ ma, Nɛtanayala den Sumanyila kɛ tara mɔgɔ tan na a bolo Misipa soe Kɛdalaya yen-tinɛ. Sumanyila kɛ, mansaya-bon-kɔrɛ mɔgɛ do le ale la. A benba tɔgɛ le Ilasama. Mansa kɔrɔmɛta mɔgɔ-ba le nun. Anu dama ye fen-dɔn kun na tumɛ min,

² Sumanyila anubɛ ala mɔgɔ tan wonu ya anuna faannu sagan a lɛɛ rɔ ka ale Kɛdalaya faga nyɔ. Babilɔn mansɛ ya ale Kɛdalaya wo ma kun-tigi la Yuda nyamanɛ kun na nyɔ nun.

³ Sumanyila ya Isirɛla mɔgɛnu faga minnu bi Kɛdalaya fɛ nyɔ Misipa soe burɔ. Babilɔn kɛlɛ-dan minnu taranta a fɛ nyɔ, a ya wonu fanan faga.

⁴ Wo banda kɛ, yanni mɔgɛnu ni Kɛdalaya faga-koe lamɔɛn,

⁵ mɔgɔ bi-segin nara ka bɔ Sɛkɛm anubɛ Sailo anubɛ Samariya soenu tɔ. Anu ya anu buyɛ masii ka anuna durukinu tafara yisi-tinya bolo ka anu nyɛrɛ matanban ka a tɛgɛ Yerusalɛm tinya-koe ma. Anu nara fui-fan anubɛ isɛnti la anu bolo Mari kɔ-tinɛ Bato-Bɔn la.

⁶ Sumanyila tara dila mɔgɛ kɛnu telen tɔ. A ya a fɔ anu ye ko, “Wo na, ma ni ta wona Kɛdalaya wara.”

⁷ Anu donta soe burɔ nya min wo, anubɛ ala mɔgɛnu wulita anu fagala ka anu furinu nakɛ kɔlɔn rɔ.

⁸ Kɔnɔ mɔgɔ tan taranta mɔgɔ bi-segin wonu tɛma, wonu ya Sumanyila madiya, anu ko, “I yandi, i kana ma faga. Fui-fan donu anubɛ tuli anubɛ liyi-dogonnɛ funɛ rɔ ma bolo.” Wo le ya a ma, anu ma anu faga.

⁹ Isirɛla Mansa Beyasa tara Yuda kɛnu kɛlɛ san min na nun, Yuda Mansa Esa ya kɔlɔn-belebele wo sin san wo le la. Sumanyila ya furi wonu nakɛ kɔlɔn wo le tɔ ka a lafa furinu na.

¹⁰ Wo kɔma, mansɛla dunmusinu anubɛ Misipa so-burɔ-mɔgɛ toenu, Nɛbusaradan ya minnu kerifa Kɛdalaya la, Sumanyila ya Amon kilɛ bira ka ta mɔgɔ-biranɛ wonu na a bolo.

¹¹ Yohenan anubɛ a ta-nyɔgɛ kɛlɛ-den-kunyɛnu ya Kɛdalaya faga koe lamɔɛn Sumanyila bolo min kɛ,

¹² anubɛ anuna kɛlɛ-dannu ya ale Sumanyila sagaran ka ta a taran Kibiyon soe. Dala-kundi ye kan min, anu tara a taran nyɔ.

¹³ Sumanyilala mɔgɔ-biranɛnu ya ale Yohenan anubɛ kɛlɛ-den-kunyɛ wonu yen min kɛ, anu sewara dɔgɔma-ma-de!

¹⁴ Anu sɛgira Yohenan wara la.

¹⁵ Kɔnɔ ale Sumanyila anubɛ ala mɔgɔ segin donu ya anu buri ka ta Amon nyamanɛ rɔ.

¹⁶ Wo kɔma, Sumanyila tara mɔgɔ-biranɛ minnu na, Yohenan anubɛ kɛlɛ-den-kunyɛ wonu tora mɔgɔ-biranɛ wonu kun na, a kɛlɛ-den wo, a musu wo, a den wo, a mɔgɔ-ba wo.

^17-18 Babilɔn mansɛ ya Yuda nyamanɛ kerifa Kɛdalaya min na, wo fagani kɔmɛ, wo le ya a ma, Yohenan kilanta Babilɔn kɛnu na. Woletɔ anu burumatoe ya Iyipiti kilɛ bira. Kɔnɔ anu kira Kimahamata bondɛ la min bi Bɛtalehɛm soe dafɛ.