Yɛrɛmaya 38 - ALLALA KUMƐ

Yɛrɛmaya Lakɛ-Koe Kɔlon-Tagbalanɛ Rɔ

¹ Matanna den Sɛfataya wo, Pasurala den Kɛdalaya wo, Sɛlimayala den Yɛhukali wo, Malakiyala den Pasura wo, n bi Marita kumɛ min fɔla mɔgɛnu ye, mɔgɔ-ba wonu ya wo lamɔɛn.

² Mari ara a fɔ n ye ko mɔgɔ-wo-mɔgɔ tora sigini Yerusalɛm soe burɔ, a ma ta dɛgɛ min Babilɔn kɛnu ye, ni wo tigi ma faga kɛlɛ bolo, a si faga kɔnkɛ bolo, ni wo ma, kirayɛ bolo. Mɔgɔ-wo-mɔgɔ tara dɛgɛ min anu ye, wo tigi ti faga. Anubɛ a niyi dɔrɔn de ye tola.

³ N bara mɛ a fɔla anu ye nun ko Mari ye anu donna le Babilɔn kɛnu bolo minnu si soe wo bira, yɔ!

⁴ Mɔgɔ-ba wonu tara a fɔ mansɛ ye ko, “Fɔ kei kɛ wa faga. Masiba-kuma-fɔɛ kɛ si a ma, kɛlɛ-dannu anubɛ a mɔgɛ toenu yigi ni tɛgɛ! A darɔ-sigi-kunya le wo la soe kɛ burɔ tolon! A sa mɔgɛnu dɛnbɛna fɔ ka anu kɔntɔ-gboya.”

⁵ Mansa Sɛdɛkaya ya a fɔ anu ye ko, “Nba, ni min di wole ye, wo ni wo ma a la. Nde ti ke tɔn sigila wo ma.”

⁶ Anu ya n nayigi yili la mansɛla den Malakiyala kɔlɔn rɔ kata burɔ mansɛla bolɔn la. Wo ya a taran, a ragbalanɛ fɔ bore min bi nyɔ. N yigira bore wo rɔ pirin!

⁷ Nba, Sudan kɛ do ye nyɔ min tɔgɛ Ibɛdi-Milɛki, mansɛla wɔli-kɛlɛ, kɔni. Wo ya a lamɔɛn ko anu bara n nayigi kɔlɔn rɔ. Wo ya a taran, mansɛ ye kiti-fɔɛ la don-dɛ dafɛ min tɔgɛ, “Bɛnyamɛ.”

⁸ Woletɔ Ibɛdi-Milɛki tara a fɔ mansɛ ye nyɔ ko,

⁹ “N tigi, mɔgɛnu bara min ma, wo ma telen. Anu bara Yɛrɛmaya layigi kɔlɔn rɔ min kɛ, fɔ a wa faga nyɔ bawo dɔn-fen sa soe burɔ.”

¹⁰ Mansɛ ya a fɔ ale Ibɛdi-Milɛki ye ko a ni mɔgɔ bi-sawa- gbɛrɛ bi ka a sa ale kuma. Anu ni nde, Yɛrɛmaya layɛlɛ ka bɔ kɔlɔn rɔ alako n kana faga nyɔ.

¹¹ Nba, Ibɛdi-Milɛki tara mɔgɛ wonu na mansɛla fen-namara-tinɛ. Anu ya kura-kore anubɛ yili-kole layigi n ma.

¹² A ko n ni kura-kore wonu sa n kɛɛ filɛ kɔrɔ alako yili-kole wonu kana na n madumɛ. N banta wo mala tumɛ min,

¹³ anu ya n nayɛlɛ. Wo kɔma, anu ya n namara yele la kata burɔ tun.

Mansa Sɛdɛkaya Hɛnkili-Kɔ-Koe Yɛrɛmaya Bolo

¹⁴ Lunyɛ do, Mansa Sɛdɛkaya ya n kele Bato-Bɔn don-da sawa nyɔgɛ la. A ko a ye n manyinikala, n ni tonyɛ fɔ a ye. N kana fenfen dogon a ma.

¹⁵ N ya a fɔ a ye ko, “Ni n ya tonyɛ fɔ i ye, i si n faga. Ni n ya i makawandi, i ti i wɔlɔ matɔlɔ n na.”

¹⁶ Woletɔ Mansa Sɛdɛkaya ya lanyiri kiri n ye dogɔn tɔ. A ko a ye anubɛ Mari-nimɛ tɛma min bi niyi dila mɔgɛ ma ko a ti n faga. A ti n don mɔgɛnu bolo minnu bi n faga-koe rɔ.

¹⁷ N ya a fɔ Mansa Sɛdɛkaya ye ko, “Mari Sɛnbɛ-Bɛɛ-Tigi Isirɛlata Alla ko ni ile ya dɛgɛ min Babilɔn Mansɛla kɛlɛ-dannu ye, i si to i niyi la. Soe kɛ ti mintan wo rɔ. A ko wobɛ ila denbayɛ si kisi.

¹⁸ Kɔnɔ a ko ni i ma sɔn dɛgɛ minna mumɛ, soe kɛ kunyɛ si don Babilɔn kɛnu bolo. Anu si a mintan gburr, ado ile kunyɛ ti bɔ a rɔ.”

¹⁹ Kɔnɔ mansɛ ya a fɔ n ye ko a ye kilanna ala nyamanita-mɔgɛnu denu na minnu bara kofu Babilɔn kɛnu ma. A ko Babilɔn kɛnu si a don ala mɔgɛ wonu bolo. Wonu si a bira boloko-yogomɛ-kɛ.

²⁰ N ya a fɔ a ye ko, “Anu ti i don anu bolo. I yandi, Mari kan kɛ bira. Ni i ya wo ma, i wara-koe bɛɛ si ta a kilɛ fɛ. I si to i niyi la.

²¹ Mari ara ko-rayirɛ kɛ n ye ko ni i ma dɛgɛ min, min bi sigila i la, wo le kɛ la.

²² N ya min yen ko-rayirɛ wo rɔ, musi min bɛɛ tora Yuda mansɛla bolɔn la, n ya mɔgɛ do sɔnɛ yen wonu yarɔ. A ye tala anu na Babilɔn mansɛla mɔgɔ-banu bara. Musi wonu bi tala a fɔla ko, ‘Mansɛ diyana-mɔgɛnu bara a lasama kilɛ ma. Sɛnbɛ ye wonu na ka tenbi mansɛ la. Ale mansɛ kian ara yigi bore rɔ. A diyana-mɔgɛnu bara a bolokanɛ to ka a magboya.’ ”

²³ N ko, “Min sanɛ wo kuma, anu bi tala ila musinu anubɛ ila dannu na Babilɔn kɛnu bara. Ile nyɛrɛ-nyɛrɛ kunyɛ ti bɔ anu bolo. Babilɔn mansɛ si ta i la. Anu si soe kɛ mintan gburr!”

²⁴ Nba, ale mansɛ ko, “I kana sɔn, mɔgɔ-wo-mɔgɔ ni ko lɔn mala gbundu-kumɛ kɛ rɔ. Ni wo ma, ile Yɛrɛmaya si faga.

²⁵ Ni nna mɔgɔ-banu ya a lamɔɛn ko mabɛ ara kirabɔ, anu si i manyinika ni mabɛ ya min fɔ. Anu si a fɔ i ye ko ni i ya wo bɛɛ rakaran anu ye, anu ti i faga.

²⁶ A fɔ anu ye le ko i ye n madiya-tinɛ le alako n kana na i sa tun yele la Yonatanna bɔn la ka faga nyɔ.”

²⁷ Wo kɔma, ale mansɛla mɔgɔ-banu nara ka n fɛsɛfɛsɛ. N ya a rakaran anu ye iko mansɛ ya n nabila nya min. Anu ma ko-wo-ko ma n na bawo mɔgɔ-gbɛrɛkɛ ma mabɛ mansɛ kirabɔ kan lamɔɛn.

²⁸ Anu ya n namara n gbɛ rɔ kata burɔ nyɔ ha anu nara Yerusalɛm soe bira lunyɛ min.