Yɛrɛmaya 37 - ALLALA KUMƐ

Yɛrɛmaya Madiya-Koe Mansa Sɛdɛkaya Bolo

¹ Babilɔn Mansa Nɛbukanasa ya Yosayala den Sɛdɛkaya sigi Yahoyakimna den Yɛhoyasin gbɛ rɔ Yuda nyamanɛ rɔ.

² Kɔnɔ Sɛdɛkaya anubɛ ala mɔgɔ-banu anubɛ a mɔgɛ toenu ma sɔn Marita kumɛ tola a gbɛ rɔ iko nde, Yɛrɛmaya ya a fɔ anu ye nya min.

³ Mansa Sɛdɛkaya ya Sɛlimayala den Yɛhukali anubɛ Meyaseyala den Saraka-Masɔla Sɛfanaya sɔ nde, Yɛrɛmaya wara alako n ni ale Mari, mata Alla madiya mala nyamanɛla ko la.

⁴ Wo ya a taran, anu ma n nadon bɛ yele la nun. N bi n nyɛrɛ le bolo nun.

⁵ Wo wati ya a taran, Babilɔn kɛlɛ-dannu bara mɛ buila Yerusalɛm soe ma. A lamɔɛn wonu bolo ko Iyipiti kɛnu bara tenbi anuna nyamanɛ dan kun na, anu ya anu fara Yerusalɛm kɛnu kɛlɛla ka ta doi wonu kun-kɔrɔ-bɛn-tinɛ.

⁶ Isirɛlata Mari Alla ya a fɔ n ye ko

⁷ n ni sarakanɛ lake Mansa Sɛdɛkaya ma. A ko Iyipiti kɛlɛ-dannu bi kilɛ la ka na wo dɛnbɛ kɔnɔ anu bi sɛgila le tun.

⁸ Wo kɔma, Babilɔn kɛlɛ-dannu si na wo kɛlɛ-tinɛ tun. Anu si soe bira-a-la ka a mintan.

⁹ Mari ko hali wo ma wo nyɛrɛ baya bawo Babilɔn kɛlɛ-dannu ba ta, anu bi nala le tun wo kɛlɛ-tinɛ.

¹⁰ A ko hali wo ya Babilɔn kɛlɛ-dan bɛɛ nɔ, minnu matanbannɛ ye tola sanɛ anuna fani-bɔnnu na, wonu si tɛ tugu Yerusalɛm soe la ka a mintan gburr!

Yɛrɛmaya Sa-Koe Yele La

¹¹ Babilɔn kɛlɛ-dannu bɔra Yerusalɛm bawo Iyipiti kɛlɛ-dannu tara anu kun-kɔrɔ-bɛn-tinɛ.

¹² N bɔɛ Yerusalɛm ka ta nna fen-sannɛ yabɔ Bɛnyamɛ nyamanɛ rɔ,

¹³ n ke don-dɛ ma anu bi min kelela, “Bɛnyamɛ,” kɛlɛ-den-kunyɛ minnubɛ ala kɛlɛ-dannu siginɛ nyɔ, wonu ya n bira. Wo tɔgɛ le Iraya. A fa tɔgɛ le Sɛlimaya. Wo benba tɔgɛ le Hananaya. Iraya wo ko nde ye kofula Babilɔn kɛlɛ-dannu ma.

¹⁴ N ya a fɔ a ye ko wo mɔgɔ ma nde la. N ko nde ti sa Babilɔn kɛnu kuma. Kɔnɔ Iraya ma a tole masɔ n na fɔ a ya n bira min kɛ ka ta n na mɔgɔ-banu bara.

¹⁵ Anu nyɛɛra n ma dɔgɔma-ma-de! Anu ya n gbesi ka n nadon mansɛla sɛbɛli-kɛla Yonatanna bɔn la min bi yeleyɛ la gbɛ!

¹⁶ Anu ya n nadon dugu-kɔrɔ-yele la. N mɛra nyɔ dɛɛ!

¹⁷ Wati-tenbinɛ, Mansa Sɛdɛkaya ya n kele ala bolɔn la. N ke, a ya n kele n dan na ka n manyinika ni Marita sarakanɛ ye n bolo. N ya a fɔ a ye, n ko, “Ɔn. Mari si a ma, Babilɔn mansɛ ni i bira.”

¹⁸ Wo kɔma, n ya a manyinika ko, “N bara nfen tinya wobɛ ila mɔgɔ-banu anubɛ mɔgɛ kɛnu ma gben, min bara a ma, wo ara n sa yele la?

¹⁹ Nɛbi minnu ya foninyɛ fɔ ko Babilɔn kɛnu ti na wo kɛlɛ, wonu bi mintɔ gbɛ?

²⁰ I yandi, n tigi, i wɔlɔ matɔlɔ n na. N ba min fɔ i ye, i ni wo ma. I yandi, i kana n nadon yele la tun Yonatanna bɔn la. Ni i ya wo ma, n si faga nyɔ rɔ don!”

²¹ Wo le ya a ma, ale Sɛdɛkaya ko anu ni n namara ala kata burɔ. Tele-wo-tele, anu si biredi-lɔngbɔn kelen di n ma ha biredi-koe banta soe wo burɔ.