Yɛrɛmaya 33 - ALLALA KUMƐ

Yili-Madiyɛ Yigila Ko la Tun

¹ N bi yele la kata burɔ tumɛ min, Mari kumara n ye tun.

² Mari min ya dugu-kole kɛ dan ka a lamondo ka a sigi a gbɛ rɔ, wo le kumara n ye. Ale min tɔgɛ Mari, a ko

³ ni n ya a rakele, a si n denkun. A si kabana-koe donu takaran n ye, n ma min lɔn kɔrɔma la.

⁴ Isirɛlata Mari Alla ko anu yogenu bi tarɛ tuntunna bɔnkɛ la soe kɔma anu kɛlɛ-koe la min kɛ, wo ya a ma, Yerusalɛm kɛnu bara anuna bɔnnu anubɛ Yuda mansɛla bolɔn tii alako anu si tarɛ wonu tagbɛlɛya nya min.

⁵ Hali wole, Isirɛla mɔgɛ donu bi Babilɔn kɛnu kɛlɛla kɔnɔ anu si wola bon-gba-kɔrɛnu nafa wo furinu na, ado Mari ko ale le ye wo gbesila dugi la ata fondo-bɔɛ la. A ko a ara a kan-kɔ sɔ soe kɛ la ka a tɛgɛ mɔgɛnuna karagbɛlɛyɛ ma.

⁶ Kɔnɔ a ko a si Yerusalɛm soe dandan anubɛ ala mɔgɛnu ka anu nasɛgi anu gbɛ rɔ. A si yisi-kimɛ di anu ma duk, ka anu nakanan.

⁷ A ko a si a ma, Yerusalɛm anubɛ Yuda kɛ tomɛnu ni ma-a-la. A ko a si anu ma iko anu bi nya min nun fɔlɔ.

⁸ A ko anu bara hakɛ min kɛ ale Mari la, a si anu sɛninya hakɛ wo ma. A si anu makoto anuna murutiyɛla ko la.

⁹ Yerusalɛm si ale Mari lasewa. A si gbiliyɛ sɔrɔn ka a wasi soe wo la. Ale Mari ko a ara min kɛ Yerusalɛm ye, sibolo-gbɛrɛnu ba a lamɔɛn a ara anu nama-a-la nya min, anu si to yɛrɛyɛrɛnna kilan bolo.

^10-11 Mari ko mɔgɛnu bi a fɔla ko yan bara ma wula-da-rakolɔn la. Mɔgɔ sa yan, kolo-fan sa yan. Mari ko anu ya tonyɛ le fɔ wo la. Yerusalɛm soe anubɛ Yuda nyamani-toe ra ara kolonya filili! Hali mɔgɔ-den-kelan sa anu tɔ tun. Kɔnɔ sewɛ-yerelen-tɛgɛ-kan si fɛrɛn nyɔnu tɔ tun. Mɔgɛ si sewa-tolɔn anubɛ kɔnyɔ-masɔ-tolɔn lamɔɛn tun nyɔ rɔ. Mɔgɛnu tenbi nala baraka-bira-sarakɛnu na Mari ye, mɔgɛnu bi bɛti-sufa kɛnu namɔɛnna ka le. “Ma ni baraka bira Mari Sɛnbɛ-Bɛɛ-Tigi ye bawo a nyimayanɛ, ado ala keninteyɛ ti ban.” Ale Mari ko a si nyamanɛ kɛ lata yarɔ iko a ye nya min nun, yɔ! Ale Mari kan le kɛ la.

¹² Mari Sɛnbɛ-Bɛɛ-Tigi ko nyamanɛ kɛ min manɛ wula-da-rakolɔn la nun, ado mɔgɛnu anubɛ kolo-fannu sa a rɔ, nyɔ si sabati. Saga-fɛ-biralɛnu si ta anuna sagɛnu na nyɔ rɔ tun.

¹³ Saga-fɛ-biralɛnu si anuna sagɛnu dan tun. Kɛ ye mala Bɛnyamɛ bɔnsɔnla nyamanɛ le tɔ anubɛ so-mɛsɛ minnu bi Yerusalɛmna foolɛ rɔ. Kɛ ye mala fanan Yuda nyamanɛ soenu tɔ anubɛ nyɔ-kɔnkɔ-nyamanɛ soenu tɔ. Anu si sagɛnu dan fanan Yuda nyamanɛ dugula soenu tɔ anubɛ gburukulinu bi nyamanɛ min tɔ.

¹⁴ Mari ko wati ye nala, a ara lanyiri min kiri Isirɛla anubɛ Yuda nyamanita-mɔgɛnu ye, a si wo latɔnbagaya.

¹⁵ Wo wati rɔ, a si Mansa Dawuda kegeyɛ do ma mansa-latelennɛ la. Wo si to ko-telennɛ kɛla nyamanɛ wo kan tinɛ bɛɛ rɔ.

¹⁶ Yerusalɛm anubɛ Yuda kɛ toenu nakisinɛ si to, ado mɔgɛnu si soe wo nyɛrɛ kele ko, “Ma Kisilɛ Mari.”

¹⁷ Ale Mari ko lanyiri le kɛ la ko Isirɛla mansayɛ ti bɔ Mansa Dawudala bɔn la mumɛ!

¹⁸ Saraka-masɔ-wɔli si to Lifayi bɔnsɔn la, a saraka-mintantɛ wo, a fui-fen-sarakɛ wo, anubɛ a sarakɛ toenu.

¹⁹ Mari ya a fɔ nde, Yɛrɛmaya ye ko

²⁰ ale Mari ya suyi anubɛ tele-bɔɛ dan ko anu dama ni to nala anu wati rɔ. Nba, iko mɔgɔni-fin ti wonu mayɛlɛma nya min, mani

²¹ anubɛ ala wɔli-kɛla, Dawuda ya sarama-kan min kiri anu nyɔgɔn tɛma, mansayɛ ti bɔ mansaya-bɔn la mumɛ! Lifayi bɔnsɔnnu si to mala saraka-masɔlɛnu na a ye tolon, ado sarama-kan wonu ti tinya ni!

²² A ko a si Mansa Dawuda bɔnsɔn anubɛ Lifayi bɔnsɔnnu nasiyaya duk! Ni mɔgɛ si ke lole anubɛ kɛnkɛn danna, nba mani, mɔgɛ si ke anu bɔnsɔnnu danna.

²³ Mari ya a fɔ n ye ko

²⁴ mɔgɛnu bi a fɔla ko ale Mari ara Isirɛla anubɛ Yuda min yabɔ, a ara wonu boloka. A ya nde, Yɛrɛmaya manyinika ni n ya wo lamɔɛn de! Woletɔ a ko mɔgɛnu yigi-tɛgɛnɛ ala mɔgɛnu na. Anu ma anu miri anu ma bɔnsɔn la lefan!

²⁵ Mari ko a ara tɔn sigi dugu-kole anubɛ san-kole ye.

²⁶ Iko tɔn wonu banbannɛ nya min, Mari anubɛ Yakoba anubɛ Mansa Dawuda kegeyɛnuna sarama-kan banbannɛ wo nya na le. Iburayima kegeyɛ wo, Yakoba kegeyɛ wo, Isiyaka kegeyɛ wo, Mansa Dawuda kegeyɛnu si to wonu marala tolon! A si kinikini ala mɔgɛnu ma ka anu sabati tun.