Yɛrɛmaya 30 - ALLALA KUMƐ

Lanyiri Kiri Koe Marita Mɔgɛnu Ye

^1-2 Isirɛlata Mari Alla ya a fɔ nde, Yɛrɛmaya ye ko a ara min bɛɛ fɔ n ye, n ni wo sɛbɛ buku do rɔ.

³ A ko tumɛ do ye nala, a si koe bɛɛ lakinya iko a ye nya min nun fɔlɔ. Isirɛla mɔgɛnu wo, Yuda mɔgɛnu wo, a si sɛgi wonu na anu barɛ ka bɔ biralɛ rɔ. A ko a ya dugi min di anu benbanu ma, a si wo lasɛgi anu denu ma. A si to anu halalayɛ la. Mari nyɛrɛ kan le kɛ la.

⁴ Mari ya sarakanɛ kɛ lana ka a tɛgɛ Isirɛla anubɛ Yuda mɔgɛnuna ko ma.

⁵ A ko a ye wole, ata mɔgɛnu wɔrɔndɔ-kan lamɔɛnna kumakɔɛ bolo. Wo kilannɛ dɔgɔma-ma-de, ado yisi-kimɛ sa nyɔ.

⁶ Wo ni wo miri kumɛ kɛ ma. Kei si ke buyi bila ka dan sɔrɔn? Nfenna a ye kemini-tagbɛlɛmɛnu yenna anu bi anu buyi rabirala iko musi tenbi a nyɛrɛ masɔrɔnna? Nfenna bɛɛ yakɔrɛ manɛ fangbo iko furitɛ?

⁷ Kabana-ko-tele ye nala min nyɔgɔn ti na tun. Kɛ si ma tɔrɔya-tele la wole, Yakoba kegeyɛnu ye kɔnɔ wo kunyɛ si bɔ a rɔ.

⁸ Mari Sɛnbɛ-Bɛɛ-Tigi ko wo tumɛ wa ke, sara-ninki kanma-kɔlɔma min bi wole, ala mɔgɛnu kan ma, a si wo bɔ wo kan ma anubɛ a yɔlɔkɛnu. Wo ti ma yɔɔnnu na sibolo-gbɛrɛnu ye tun!

⁹ A ko wo si ale wota Mari Alla sako kɛ. A ye mansɛ min sigila ka bɔ Mansa Dawudata kebilɛ la, wo si to wɔlila wo ye.

¹⁰ A ko wole, ata mɔgɛnu, wo kana kilan. Wole Isirɛla mɔgɛnu, wo kuma kana kɔ. A ko a si wo kunyɛ bɔ nyamani-yan wo rɔ wo ye biralɛ rɔ kan min nun, kɔni. A ko wo si sɛgi wo warɛ. Wo ni sigi nyɔ wo fanbolo. Wo si to sigini lafɛrɛ rɔ. Mɔgɔ ti wo rakilan.

¹¹ A ko a si na wo kisi. Wo ranyɛnsɛnnɛ sibole min bɛɛ tɛma, a ko a si wonu dama kasara pɔ! Kɔnɔ a ti wo lato. A ko a ti wo to wo tɔrɔbɛlɛ la kɔnɔ a ko a si wo tɔrɔ iko a bɛnnɛ wo ma nya min. Mari nyɛrɛ kan le kɛ la.

¹² Mari ko tanban-nɛ ye wo ma min ti dandan. Wo duma-tinɛnu ti kɛndɛya.

¹³ Wo fɛ-birala fenfen ti taran. Bɛsi-wo-bɛsi ti taran wola tɛlɛnuna ko la. Wo lakɛndɛya-yigi-wo-yigi ti taran.

¹⁴ Wo diyana-mɔgɛ sibolo-gbɛrɛ bɛɛsi ara nyina wo wara-koe la. Anuna ko ti taran wola ko rɔ. Mari ko a ya wo kɛlɛ iko wo yogenu. Wola tɔrɔyɛ ara gbɛlɛya wo kuma bawo wo hakɛ ara siyaya, ado wola karagbɛlɛyɛ ara wara.

¹⁵ Hali wo ma wo tɔrɔ wola tɛlɛnu bara-koe fɔla bawo a dandan-fen sa. Mari ko a ara wo tɔrɔ wo nya bawo wo hakɛ ara siyaya, ado wola karagbɛlɛyɛ ara wara.

¹⁶ Kɔnɔ kaka, sibole min bi wo kasara-tinɛ nun, wonu si kasara. Wo yoge bɛɛ si ta biralɛ rɔ. Wo niyi-ragbɛrɛnnɛ bɛɛ niyi ra si gbɛrɛn anu ma. Minnu bi wo bolo-fannu bila wo kɔma, wonu fanantɛ si bi.

¹⁷ Mari ko hali wo yogenu bi a fɔla ko, “Yerusalɛm lakɛnɛ a rɔ. Mɔgɔ mako sa a la tun.” A ko a si wo lakɛndɛya tun. A si wo tanban-tinɛnu dandan wo ye. Ale Mari le ya kɛ fɔ.

¹⁸ Mari ko a si wole, ala mɔgɛnu nasɛgi wo halala-nyamanɛ rɔ tun. A si kinikini wo kebilɛ bɛɛ ma. Yerusalɛm soe si sɔ a gbɛ rɔ tun. Mansɛla bolɔn si sɔ a gba-kɔrɛ rɔ tun.

¹⁹ Wo si to baraka-bira-bɛti bɔla sewɛ la. Wo si to wo diya nyɔ. A ko a si den-siyaman di wo ma, ado wo si to gbiliya-wɛ rɔ.

²⁰ A ko a si wola fanka-sɛnbɛ don iko wo ye nya min kɔrɔma la. A si wola fanka banban iko a ye nya min nun. A ko min bɛɛ ye wo tɔrɔla nun, a si wo bɛɛ tɔrɔ.

^21-22 Wola kun-tigi si bɔ wo nyɛrɛ rɔ. Wola mɔgɔ-bɛrɛbɛrɛ le wo lamarala. Mari ko a wa kun-tigi wo rakele, wo si a gbɛrɛn a ma, ado yon si ke a gbɛrɛnna ale Mari ma, ni a ma min takele? A ko wole si ma ata mɔgɛnu na, ale si ma wota Alla la. Ale Mari kan le kɛ la.

²³ Mari diminyara dɔgɔma-ma-de ha a ya karagbɛlɛnu tɔrɔ. Tɔrɛ wo nara le iko fɔn-digidigi-wɛ. Tɔrɔyɛ wo nara anu denu kan ma iko tɔnkɔlɔn,

²⁴ ado Mari si to diminyɛ wo kun na ha a ni ban mɔgɛ wonu tɔrɔla. A kɔrɔtɔnɛ si to ha tɔrɔyɛ min tabɛnnɛ a bolo, wo ni ban. Tele wo wa ke a ko wo ni na a lɔn.