Yɛrɛmaya 29 - ALLALA KUMƐ

Yɛrɛmayata Kɛdi min Sɛbɛnɛ Mɔgɔ-Biranɛnu Ye

¹ Mansa Nɛbukanasa tara Yerusalɛm kɛ minnu na birɛ rɔ, nde, Yɛrɛmaya ya kɛdi sɛbɛ wonu ma, a mɔgɔ-ba wo, a saraka-masɔla wo, a nɛbi wo, anubɛ a mɔgɛ toenu.

² Mansa Yɛhoyasin anubɛ a na tara birɛ rɔ tumɛ min, anubɛ Yerusalɛm mɔgɔ-banu anubɛ Yuda kun-tigi toe anubɛ nyɔ-boloma-wɔli-kɛlɛnu anubɛ nyɔ-siyakinu, n nara to kɛdi kɛ sɛbɛla.

³ Wo ya a taran, Yuda Mansa Sɛdɛkaya ara Safanna den Elesa anubɛ Hɛlikayala den Kɛmiraya sɔ Mansa Nɛbukanasa ma. Wo le ya a to, n ya kɛdi kɛ don anu bolo alako anu ni ta a la Babilɔn. Min sɛbɛnɛ kɛdi wo rɔ, wo le kɛ la.

⁴ Mari Sɛnbɛ-Bɛɛ-Tigi, Isirɛlata Alla ya kɛ le fɔ Yerusalɛm mɔgɔ-biranɛnu ye Babilɔn.

⁵ A ko wo ni bɔnnu sɔ ka wo sigi nyamanɛ wo rɔ. Wo ni ki-fannu ki alako wo ni to anu gbɔɛ dɔnna.

⁶ Wo ni wo nyɔgɔn furu ka yiri. Wo ni furi kɛ wola dannu ye. Wola dunmusinu di furu la alako wo ni den-siyaman sɔrɔn. A ko wo ni den-siyaman sɔrɔn ka siyaya Babilɔn nyamanɛ rɔ. Wo ma kana dɔgɔya nyamanɛ wo rɔ.

⁷ A ko a ya wo lata birɛ rɔ soe min tɔ, wo ni wɔli-nyimɛnu kɛ nyɔ. Wo ni Mari madiya wola soela ko la wo siginɛ min tɔ. Ni yisi-kimɛ ye soe wo rɔ, wole fanan si taran yisi-kimɛ rɔ.

⁸ Mari Sɛnbɛ-Bɛɛ-Tigi, Isirɛlata Alla ko wola foninya-nɛbinu anubɛ wola bolo-tafɛlɛnnɛnu kana wo bolo labira. Wo kana wo tole masɔ anuna kiyo-kannu na.

⁹ Anuna wɔlɔyiya-kumɛnu, wo bɛɛ foninyɛ. Anu kɛnɛna a fɔla ko anuna sarakanɛ bɛɛ bɔnɛ ale Mari le bolo. Kɔnɔ Mari ko ale ma kuma anu ye de!

¹⁰ Mari ko Babilɔn si to sɛnbɛ rɔ san bi-wɔrɔnfila kɔrɔ. San bi-wɔrɔnfilɛ wo wa ban tumɛ min, Mari ko a si na wo wara Babilɔn nyɔ. A si ala lanyiri latɔnbagaya ka sɛgi wo la Yerusalɛm wulɔn.

¹¹ Ale le kelen pe ya a miriya lɔn wola ko la. A miriya ye wo la yarɔma-ta-koe le ma, kasarɛ ma de! A ye a fɛ, wo ni yigi-bɛrɛbɛrɛ sɔrɔn yarɔma.

¹² A ko wo si a tɔgɔ ratɛgɛ wo tumɛ. Wo si na a wara ka a madiya, ado a ko a si a wɔlɔ matɔlɔ wo la.

¹³ A ko wo si to a nyinina, ado wo wa a nyini wo yisi bɛɛ la, wo si a yen.

¹⁴ A ko a si a ma, wo ni a yen. A si wo bɔ biralɛ rɔ ka sɛgi wo la wo halala-nyamanɛ rɔ yan. A ko hali a ara wo fɔrɔsɛ ko wo ni bɔ Yerusalɛm, a si wo yatɔnbɔn sibolo-gbɛrɛnu tɛma. A ya wo lata biralɛ rɔ kan tinɛ minnu tɔ, a ko a si wo kundɛn kan-tina-kelen ka na wo la Yerusalɛm yan. Ale Mari kan le.

¹⁵ Tumado wo ye a fɔla ko Mari ara nɛbinu di wo ma Babilɔn nyɔ.

¹⁶ Kɔnɔ Mari ye min fɔla yan-mansɛla ko la Dawuda kegeyɛnu, kɔni, anubɛ yan-so-burɔ-mɔgɛnuna ko la minnu ma ta biralɛ rɔ wo fɛ, wo ni wo tole masɔ kumɛ wo la.

¹⁷ Mari Sɛnbɛ-Bɛɛ-Tigi ko kɛlɛ-fitini wo, kɔnkɔ-fitini wo, kiraya-fitini wo, a si wonu nata Yerusalɛm kɛnu ma kaka. A ko a si anu ma iko toro-gbɔ-tulunɛ minnu ti dɔn tun.

¹⁸ A ko a si kɛlɛ anubɛ kɔnkɛ anubɛ kirayɛ ma anu gben-fan la, ado sibolo-gbɛrɛnu ba anu yen tumɛ min, anu kuma si tɛgɛ wao! Mɔgɛnu si anu manyini ka anu tɔgɛ ma dankali-kɛ-fan la.

¹⁹ Mari ko wo ye mala le bawo Yerusalɛm kɛnu ma anu tole masɔ a la. A tora sarakani-siyaman donna ala nɛbinu bolo kɔnɔ a ko Yerusalɛm kɛnu ma anu tole masɔ sarakanɛ wonu na mumɛ!

²⁰ Woletɔ wole mɔgɔ-biranɛnu, ale Mari ya wole minnu gben Yerusalɛm ka wo lata Babilɔn, wo ni wo tole masɔ a kan la.

²¹ Mari Sɛnbɛ-Bɛɛ-Tigi, Isirɛlata Alla, kɔni, wo kumara mɔgɔ fila wara-koe rɔ, Kolayala den Ehabu anubɛ Meyaseyala den Sɛdɛkaya. A ko mɔgɔ filɛ kɛnu bara nɛbiya-kumɛnu fɔ wo ye foninyɛ rɔ. Anu bi a fɔla ko Mari le ya sarakanɛ wonu di anu ma. Mari ko a si foninya-nɛbi filɛ kɛnu don Babilɔn Mansa Nɛbukanasa bolo. Ale mansɛ si anu faga wo dama yala.

^22-23 Anu bara sɔn-yogoya-siyaman kɛ Isirɛla mɔgɛnu tɛma. Anu yilikinɛ ka a tɛgɛ yɛlɛnyɛ ma anu sigi-nyɔgɔ-musi keni, kɔni. Wo kɔma, anu bi foninyɛ fɔla, ado anu bi a fɔla ko Mari nyɛrɛ kan le. Mari ko a ma fenfen fɔ anu ye. A ko anu bara ko-yogomɛ min bɛɛ kɛ, ale Mari ye wo kalama, ado Mari ko sere le ale la anu kan ma. Ka a tɛgɛ wo ma, wole Yuda kɛ minnu bi biralɛ rɔ, wo si dankali kɛ ko, “Alamɛ Mari ya wo bira iko Babilɔn mansɛ ya Sɛdɛkaya anubɛ Ehabu mintan nya min gburr, anu bi anu kɛndɛ la tumɛ min.” Mari kan le kɛ la.

Sɛmayala Kɛdi Wara-Koe

^24-25 Mari Sɛnbɛ-Bɛɛ-Tigi, Isirɛlata Alla, kɔni, wo ya sarakanɛ di n ma Sɛmayala ko la min bɔra Nɛhɛlam kebilɛ la. Ale Sɛmaya ya kɛdi sɛbɛ Meyaseyala den Sɛfanaya ma min bi saraka-masɔ-wɔlɛ kɛla. A ya wo sɛbɛ saraka-masɔlɛ toenu anubɛ Yerusalɛm kɛnu fanan ma a nyɛrɛta miriya rɔ. A ya min sɛbɛ Sɛfanaya ma kɛdi kɛ rɔ, wo le kɛ la.

²⁶ Sɛmaya ko Mari ya Sɛfanaya sɔ Saraka-Masɔla Yɛhoyada gbɛ le tɔ Bato-Bon-kun-tigiyɛ la. A ko ata wɔlɛ le ko mɔgɔ-rakolɔn fenfen min si a nyɛrɛ ma nɛbi la, ale Sɛfanaya ni wo bole anubɛ wo kian sa banban la ka yɔlɔkɛ sɔ wo kan la.

^27-28 A ya a manyinika ni min ya a to a ma yɔlɔkɛ kɛ nde, Anatɔti kɛ Yɛrɛmaya ma, nde min kumara mɔgɛnu ye iko nɛbi. A ko nde ya a fɔ Babilɔn mɔgɔ-biranɛnu ye ko anu si mɛ biralɛ rɔ nyɔ. Anu ni bɔnnu sɔ nyɔ ka anu sigi-bole rabɛn. Anu ni dɔn-fannu ki ka to wonu gbɔɛ dɔnna. Sɛmaya ko anu ni n nakala, n kana wonu fɔ.

²⁹ Saraka-Masɔla Sɛfanaya ya kɛdi kɛ karan nde, Yɛrɛmaya ye tumɛ min,

^30-31 Mari ya sarakanɛ di n ma Babilɔn mɔgɔ-biranɛnuna ko la. A ko Sɛmaya ya foninya-nɛbiya-kumɛ le fɔ, ale Mari ma a sɔ kumɛ min fɔla. A ko a ara wo buyi lafa foninyɛ le la wo la.

³² Bawo Sɛmaya ara wo ma, Mari ko a ti mɛ Sɛmaya tɔrɔla tun. A ko Mari ye wɔli-nyimɛ min kɛla ata mɔgɛnu ye, ale Sɛmaya ti bɛn wonu tɔ. Hali ala kebila-mɔgɔ den kelen ti taran Isirɛla mɔgɛnu tɛma tun bawo a ya mɔgɛnu nabila murutiyɛ ma Mari kan ma. Mari nyɛrɛ kan le kɛ la.