Yɛrɛmaya 26 - ALLALA KUMƐ

Yɛrɛmaya Bira-Koe

¹ Yosayala den Yahoyakim mɛ Yuda mansɛ la, a ma mɛ wo kɔma,

² Mari ya a fɔ nde, Yɛrɛmaya ye ko n ni ta sɔ Bato-Bon-kata burɔ. A ko n ni ala kumɛ kɛ bɛɛ latenbi wole ma minnu nara ka bɔ Yuda soenu tɔ batoli-kɛ-tinɛ. A ko n kana dan wo fenfen-fɔ-tinɛ.

³ Tumado wo si wo tole masɔ ka wo kan-kɔ sɔ wola ko-yogomɛnu na, ado ni wo ya wo ma, a ko a si a miriya yɛlɛma wo kasara-koe ma, a ye min nanala wo kuma wola sɔn-yogoyɛla ko la.

⁴ Mari ya a fɔ wole, ala mɔgɛnu ye ko wo ni ala kumɛ bira tɔn-birɛ fɛ iko a ya wo labila nya min.

⁵ A ko a tora nɛbi minnu nanala wo ma, ala wɔli-kɛlɛnu, kɔni, wo ni wo tole masɔ wonuna nɛbiya-kumɛnu na a kin na kɔnɔ wo sa sɔnna wo tole masɔla.

⁶ Ni wo tora murutiyɛ kɛ kun na, a ko a ya ala Fani-Bɔn tinya Sailo soe burɔ nya min nun, a ye a Bato-Bɔn fanan tinyana wo nya na le, ado duninya-mɔgɛ bɛɛ si Yerusalɛm soe tɔgɔ ratɛgɛ dankali-kɛ-tinɛ.

⁷ Kumɛ wo fɔɛ nde, Yɛrɛmaya bolo Bato-Bon-kata burɔ, wole saraka-masɔlɛnu wo, wole nɛbinu wo, anubɛ wole mɔgɛ donu ya wo lamɔɛn.

⁸ N banta Mari kan kɛ fɔla nya min wo, wo kɛra n ma ka a lasɔnkɔ ko, “Ma ye i fagala kumɛ kɛla ko la.

⁹ I ya a fɔ Mari baraka rɔ ko Bato-Bɔn kɛ si tinya iko Sailotɛ. I ko soe kɛ si kasara, hali mɔgɔ-den-kelen-bɛrɛn kunyɛ ti to-a-rɔ. I ya i tui kɛ fɔla nfenna ko la?” Wo ya kurɔn don n ma.

¹⁰ Kɛ lamɔɛn wole, Yuda mɔgɔ-banu bolo, wo burumatoe bɔra bolɔn la ka ta Bato-Bɔn la. Wo dama tara wo sigi tinɛ rɔ don-dɛ wo dafɛ min tɔgɛ Don-Da-Kurɛ.

¹¹ Saraka-masɔlɛnu anubɛ nɛbinu ya a fɔ wole, mɔgɔ-banu anubɛ wole, a mɔgɛ toenu ye ko, “A bɛnta, Yɛrɛmaya kɛ ni faga ka a tɛgɛ a ara kumɛ min fɔ soe kɛ tinya-koe ma, ado wole nyɛrɛ ara kɛ lamɔɛn.”

¹² Wo kɔma, n ya a fɔ wo ye ko, “N bara kumɛ min fɔ Bato-Bɔn anubɛ soe kɛla ko ma, Mari le ya n sɔ wonu fɔ-tinɛ.

¹³ Fɔ wo ni wo kɛ-nya anubɛ wola ko-ladan-nya yɛlɛma. Wo ni wota Mari Alla sako kɛ. Ni wo ya wo ma, ale Mari si a miriya yɛlɛma wo wara la. A ye kasarɛ min nanala wo kan ma, a si tɔn sigi wo la.

¹⁴ N bara ban sala wo bolo tɔ. Ko-wo-ko telennɛ wo ya la, wo ni wo sigi n ma.

¹⁵ Kɔnɔ wo ni la kɛ la serr! Ni wo ya n faga, wo ara n faga le dɔrɔn, fɛɛ sa n na bawo Mari le nyɛrɛ ya n sɔ wo makawandili-kumɛ kɛ fɔ-tinɛ wo ye.”

¹⁶ Wo kɔma, wole mɔgɔ-banu anubɛ wole, a mɔgɛ toenu ya a fɔ saraka-masɔlɛnu anubɛ nɛbinu ye ko, “Kei kɛ ara kuma ma ye mata Mari Alla le tɔgɛ rɔ. A ma bɛn, a ni faga.”

¹⁷ Wole mɔgɔ-ba donu fanan ya wo lasɔ. Wo ya a fɔ wole, nyama ye ko,

¹⁸ “Mansa Hɛsakaya ye Yuda nyamanɛ kun na tumɛ min, Mɔrɔsɛti kɛ, Nɛbi Maika ya a fɔ Yuda kɛnu ye wati wo rɔ ko Mari Sɛnbɛ-Bɛɛ-Tigi ko, ‘Yerusalɛm ma si nunku iko sɛnɛ. A si to kasarala, ado tɔ-a-la, Bato-Bɔn sɔ-tinɛ si ma gbɔngbɔn la.’

¹⁹ Kɔnɔ Mansa Hɛsakaya anubɛ ala mɔgɛnu ma Nɛbi Maika faga wola ko la de, ado Mansa Hɛsakaya ya Mari gbiliya ka kuma-diyamɛnu fɔ ale Mari ye. Wo le ya a ma, Mari ya a miriya yɛlɛma Yerusalɛm kasara-koe ma. Nba, male nyɛrɛ-nyɛrɛ le ye kasarɛ lanala ma kuma gbɛ!”

Nɛbi Yuraya Faga-Koe Mansa Yahoyakim Bolo

²⁰ (Kei do ye nyɔ nun min tɔgɛ Yuraya, Sɛmayala dan, kɔni. Wo bɔra Kiriyati-Yirɔm soe burɔ. Ale Yuraya fanan ya kuma-sufa kɛ le fɔ, ado wo fanan kumara Mari tɔgɛ rɔ Yerusalɛm anubɛ Yuda kan ma iko Yɛrɛmaya kɛ.

²¹ A lamɔɛn Mansa Yahoyakim anubɛ ala kɛlɛ-dannu anubɛ ala mɔgɔ-banu bolo, ale Yuraya faga-sɔgɛ ya mansɛ bira. Wo lamɔɛn Yuraya bolo, a ya a buri tala Iyipiti kilan bolo.

²² Hali wo, Mansa Yahoyakim ya Akiborila den Ɛlinetan anubɛ mɔgɛ donu nata Iyipiti Yuraya bira-tinɛ.

²³ Anu nɛ a la ale mansɛ wara, a ya a faga ka a furi lakɛ a rɔ nyama-kaburu-soe la.)

²⁴ Kɔnɔ Safanna den Ahaikam ye nde, Yɛrɛmaya dɛnbɛna min kɛ, anu ma n don wole bolo ka n faga.