Yɛrɛmaya 24 - ALLALA KUMƐ

Toro-Gbɔ-Senda Filɛ Wara-Koe

¹ Babilɔn Mansa Nɛbukanasa tara Mansa Yahoyakimna den Yuda Mansa Yɛhoyasin la Babilɔn nyamanɛ rɔ. A tara Yuda mɔgɔ-banu anubɛ a boloma-wɔli-kɛlɛnu anubɛ siyakinu fanan na. Wo tenbira min kɛ, Mari ya senda fila yira n na minnu nafanɛ toro-gbɔɛ la. Anu siginɛ Bato-Bɔn lu-kole ma.

² Senda kelan, toro-gbɔ-hakikɛ le wo rɔ. Sende doi wo, fenfen sa wo rɔ fɔ toro-gbɔ-tulunɛ.

³ Mari ya nde, Yɛrɛmaya manyinika ko, “Yɛrɛmaya, i ya nfen yen?” N ya a fɔ ko, “N ya toro-gbɔɛnu denu yen. A hakikɛnu kin. Minnu tulunɛ, mɔgɔ ti ke wonu dɔnna.”

^4-5 Wo kɔma, ale Isirɛlata Mari Alla ya a fɔ n ye ko anu bara ta mɔgɛ minnu na Babilɔn, wonu mani de iko toro-gbɔ-nyimɛ wonu. A ko a si wonu bira a kin na!

⁶ A ko a si anu fɛ-bira ka anu nasɛgi nyamanɛ kɛ rɔ tun. A ko a si to anu wara-koe mayɛlɛla, a ti anu wara-koe mayigi. A si anu nama-a-la, a ti anu bɔ nyɔ iko mɔgɛ wa fen ki, a ti anu wurun tun.

⁷ A ko a si a ma, ale Mari-lɔn-sɔgɛ ni anu bira. Anu si ma ata mɔgɛnu na. Ale fanan si ma anuta Alla la. A ko ni i ya a yen, a ye wo mala bawo anu ba sɛgi anuna nyamanɛ rɔ tumɛ min, anu si sɛgi ale ma anu yisi bɛɛ la.

⁸ Kɔnɔ Yuda Mansa Sɛdɛkaya wo, ala mɔgɔ-banu wo, Yerusalɛm kɛ minnu tora Yuda nyamanɛ rɔ wo, anubɛ minnu ya anu buri tala Iyipiti nyamanɛ rɔ wo, Mari ko a si wole bira boloko-yogomɛ-kɛ iko tore minnu tulunɛ wo la.

⁹ A ko a ye kasarɛ min sigila wo ma, wo si a ma, duninya mumɛ bɛɛ ni kilan. Mɔgɛnu si wo mayɛlɛn. Anu si wo ma yɛlɛnma-fan la. Anu si wo tɔgɛ ma dankali-kɛ-fan la.

¹⁰ A ko a si kɛlɛ anubɛ kɔnkɛ anubɛ kirayɛ latugu wo ma. Hali wo mɔgɔ-den-kolo-kelan, wo ti to a niyi la nyamanɛ wo rɔ a ya min di wobɛ wo benbanu ma.