Yɛrɛmaya 21 - ALLALA KUMƐ

Alla Ban-Koe Mansa Sɛdɛkayala Taralɛ Ma

¹ Meyaseyala den Sɛfanaya min bi saraka-masɔ-wɔlɛ kɛla anubɛ Malakeyala den Pasura, Yuda Mansa Sɛdɛkaya ya anu kilaya nde, Yɛrɛmaya ma.

² Anu ko n ni Mari madiya anu ye bawo Babilɔn mansɛ Nɛbukanasa ara na bui mala so-karantan ma. Anu ko tumado Mari si kabana-koe do kɛ ma ye min si a ma, Nɛbukanasa ni sɛgi a kɔma.

³ Mari kumara n ye. Woletɔ n ya a fɔ Mansa Sɛdɛkayala kilayɛnu ye ko

⁴ Isirɛlata Mari Alla ko a si a ma, Babilɔn mansɛ ni ale Sɛdɛkayata kɛlɛ-dannu nɔ. Anuta kɛlɛ-kɛ-mirannu ti anu dɛnbɛ nɔ-ko sɔrɔn-tinɛ. Babilɔn kɛlɛ-dannu si don hali Yerusalɛm soe burɔ.

⁵ Mari ko a si wole, Yerusalɛm kɛnu kɛlɛ a sɛbɛ-kuna-wɛ anubɛ ata fondo-bɔ-wɛ la.

⁶ A so-burɔ-mɔgɔ wo, a kolo-fen wo, Mari ko wo dama tɔgɛ si to kiraya-yogomɛ la.

⁷ Kɔnɔ Mari ya a fɔ fanan ko ale Sɛdɛkaya wo, ala mɔgɔ-banu wo, hali kiraya-fitinɛ anubɛ kɛlɛ-fitinɛ anubɛ kɔnkɔ-fitinɛ foora wole minnu na wo, Mansa Nɛbukanasa faga-sɔgɛ ye mɔgɛ minnu na, wonu denu si ta wo la, ado ale mansɛ ti kinikini wo ma ka wo fenfen yamasansan. A si wo damasi faga tɛrr! Mari nyɛrɛ kan le kɛ la.

⁸ Wo kɔma, Mari ya sarakanɛ don n bolo wole, ala mɔgɛnu ye. A ko a si kila filɛ kɛnu sa wo kɔrɔ, nimaya-kila wo, saya-kila wo.

⁹ Mɔgɔ-wo-mɔgɔ tora soe burɔ, ni anu tɔgɔ ma to kɛlɛ la, anu tɔgɔ si to kɔnkɔ-fitinɛ la. Ni min tɔgɔ ma to kɔnkɔ-fitinɛ la, anu tɔgɔ si to kiraya-fitinɛ la. Kɔnɔ ni min tara Babilɔn kɛlɛ-dannu bara ka dɛgɛ min wonu ye, wo tigi ti faga. Minnu bi tala dɛgɛ min tinɛ, wo ye tala a niyi le dɔrɔn na a bolo.

¹⁰ Mari ko a ara a latɛgɛ ko a ti kinikini so-karantan kɛ ma fɔ a wa a kasara. A ko a ara ban a donna Babilɔn mansɛ bolo min si a mintan gburr! Ale Mari nyɛrɛ kan le kɛ la.

Kiti-Fɔ-Koe Yuda Mansa Bɔn La

^11-12 Mari ko n ni sarakanɛ kɛ latenbi wole, Yuda mansaya-bɔn la, Dawuda kegeyɛnu, kɔni. Mari ko wo ni wo tole masɔ a kan la. Wo ni to ko-latelennɛ kɛla tolon! Mɔgɛ min kensunnɛ, wo ni wo latanka a kensunte ma. Ni wo ma wo ma, a ko ata fondo-labɔɛ si ma iko tɛ min si mintanni kɛ a yisi ma, ado tɛ wo dufen-nya sa.

¹³ A ko ale Yerusalɛm soe siginɛ san ma iko fara-layan-bɛ min bi lɛɛ rɔ. A ko a si wole, Yerusalɛm kɛnu kɛlɛ, ado wo ye mankan tugula ko mɔgɔ-wo-mɔgɔ ti ke wo nɔla.

¹⁴ A ko a si wo tɔrɔ ka tɛ tugu wola mansaya-bolɔn la iko wo ara sɔn-yogomɛ min nabɔ. Tɛ wo si fan bɛɛ mintan ala foolɛ rɔ. Ale Mari nyɛrɛ kan le kɛ la.