Yɛrɛmaya 2 - ALLALA KUMƐ

Isirɛla Mɔgɛnu Fɛ-Bira-Koe Mari Bolo

¹ Mari ya a fɔ n ye ko

² n ni ta kuma Yerusalɛm kɛnu na. A ko n ni a fɔ anu ye ko anu sibole wuli-san, anu telennɛ a ye. A ko ale Mari di anu ye nun koikoi iko kei di ala kɔɛn-kurɛ ye nya min. A ko anu bilanɛ a fɛ nun wulɛ rɔ, wulɛ min da-rakolɔn filili, kɔni.

³ Isirɛla mɔgɛ wonu mara Mari-halalɛ la. Anu dantɛgɛnɛ a ma iko dɔn-fen-kun-fɔlɛ tɔnsɔn. Minnu ya ko sigi Isirɛla mɔgɛnu ma, wonu ya yilikiyi sɔrɔn. Mari ko mɔgɛ wonu kasarata le! Ale Mari kan le!

Isirɛla Mɔgɛnu Benbanuna Hakɛ-Kɛ-Koe

⁴ Wole Yakoba kegeyɛnu, wo ni wo tole masɔ Marita kumɛ la. Wole Isirɛla bɔnsɔn toe min tonɛ, kɔni, wo ni wo tole masɔ.

⁵ Mari ko a ya a telen wo benbanu ye min kɛ, nfenna anu ya anu kan-kɔ sɔ a la? A ko wo benbanu ya bɛsi-fufafuyinu kɔ ha anu denu fanan mara mɔgɔ-fufafuyinu na iko anuna bɛsɛnu.

⁶ Hali a ya anu kunyɛ bɔ gbaran rɔ Iyipiti nyamanɛ rɔ ka wulɛ ratɛgɛ kasan, wo benbanu ma ale Mari tɔgɛ rakele mumɛ! A bɔra anu na kuru-gbɔgɔsa-gbagasa-nyamanɛ rɔ min tagbalanɛ todo! A bɔra anu na setani-nyamanɛ rɔ min tapinpinɛ. A tenbira anu na kan do mɔgɔ ti tagama kan min, ado mɔgɔ ti sigi nyɔ. Kɔnɔ wo bɛɛ rɔ, anu ma ale Mari tɔgɔ rakele muk!

⁷ Mari ko a tara anu na nyamani-diyamɛ rɔ alako anu si nyɔ dɔn-fan-diyamɛnu dɔn. Kɔnɔ hali wo, anu ya ala nyamanɛ wo latinya. Anu ya nyɔ ma nyamani-magboyanɛ la Mari ye.

⁸ Hali saraka-masɔlɛnu ma Mari manyinika. Anu denu minnu bɛnta ka ale Marita karan lɔn, anu miriya ma ke a ma lefan! Mari ko wo benbanuna kun-tiginu wulita a kan ma. Hali aleta nɛbinu ya wɔlɔyiya-kumɛnu fɔ bɛsi Beyalila ko rɔ ka bɛsi-fufafuyi wo kɔ.

Isirɛla Mɔgɛnu Sɔn-Fɛrɛn-Koe Anu na Alla Bolo

⁹ Mari ko min bi a tola, a ye wole kan ma, a si wo fɔ wo ye. Min bi a tola, a ye wola dannubɛ wo mamanɛnu kan ma, a si wo fanan fɔ wo ye.

^10-11 Sibolo-wo-sibolo sa nyɔ minnu bara anuta bɛsɛ mayɛlɛma ka a kɔrɔmɛnu nabɔ ka a kurɛnu nadon, hali Alla-bɛrɛ ma wo fenfen na. Wo ni kɔgɔ-yi ratɛgɛ tele-yigi wara la ka Saiparasi yi-tɛma-dugi mafɛlɛn. Wo ni donu nata tele-bɔɛ wara la ha Kedari nyamanɛ rɔ. Wonu ni nyɔ lakɔrɔsi ka a lɔn ni ko sufa kɛ do ara kɛ wonu ye. Kɔnɔ wole Marita mɔgɛnu bara wota Alla-makawanɛ boloka ka bɛsi-fufafuyinu natenbi ale la.

¹² Mari ko san-kole ni yɛrɛyɛrɛn ka a tɛgɛ ko-sufa wonu ma. San-koletɔ-fannu kun ma ni kɔ kilan bolo.

¹³ A ko wole, ata mɔgɛnu bara hakɛ-su fila kɛ. A fɔlɔtɛ, wo ya wo kan-kɔ sɔ ale Mari la, ale min bi tenke-nyimɛ la wo ye, kɔni. A fila nyɔgɛ, wo ara bila bɛsi-gbɛrɛkɛnu fɛ minnu manɛ iko mɔgɛ wa yi kɛ bɔnku-daga-ratiinɛnu tɔ.

Isirɛla Mɔgɛnu Tɔrɔ-Koe anu Sɔn-Yogomɛla Ko La

¹⁴ Mari ko yɔɔn ma wole, Isirɛla mɔgɛnu na, ado wo ma sɔrɔn yɔɔnyɛ rɔ. Nfenna worɔ, wo yogenu bi buila wo ma iko a di anu ye nya min.

¹⁵ Wole Isirɛla mɔgɛnu, wo yogenu bi bɔrɔndɔ-bɔrɔndɔla wo la iko yarɛ. Wo yogenu bi wo rakilanna. Anu bara Isirɛla nyamanɛ tii. Isirɛla soe bɛɛ ara mintan. Anu tonɛ tonbonyɛ la.

¹⁶ Iyipiti kɛ minnu bɔra Mɛmfisi anubɛ Tapanisi soenu burɔ, Mari ko wonu bara wole, Isirɛlata mɔgɛnuna gbiliyɛ anubɛ sɛnbɛ bɔ wo ma feu!

¹⁷ A ko wo nyɛrɛ gbɛ le wo la, yɔ! Wo mara bawo wo ara wo kan-kɔ sɔ ale wota Mari Alla la wo tumɛ a sɔnɛ wo yarɔ wulɛ rɔ.

¹⁸ Wola tɛ Iyipiti, wo ya tɔnɔ-nyuman sɔrɔn ha wo ni to kan kelan rɔ. Wola tɛ Asiriya, wo ya tɔnɔ-nyuman fanani sɔrɔn nyɔ ha wo ni to kan kelan rɔ.

¹⁹ A ko wola karagbɛlɛyɛ si tɔrɔyɛ lana wo ma. Wola ko-yogomɛnu si wo don nyagbɛ rɔ. Wo ni wo miri a ma a kilɛ fɛ alako wo ni ko nya-yen. Ka wo kan-kɔ sɔ wota Mari Alla la, wo yogo dɔgɔma-ma-de! A ko ka a fɔ wo ti kilan a la, wo ma telen. Wo Tigi Mari Sɛnbɛ-Bɛɛ-Tigi kan le kɛ la.

Isirɛla Ban-Koe Mari Bato-Koe La

²⁰ Wo Tigi Mari ko wo ara wo kan-kɔ sɔ ata Mariyɛ la bi-ko-ma! Yili min sɔnɛ wo la, wo ya wo ratɛgɛ. Wo ya a fɔ ale, Mari ye ko wo ti ala kumɛ bira hali ka a bato, ado wo ye bɛsɛnu kɔla kɔnkɔ-layan-bɛnu kuma anubɛ kɔlɔma-kuru-wɛnu kɔrɔ bɛsi-fuyinu kɔ-tinɛ. Wo ma telen ale, wota Mari ye iko musi-yɛlan.

²¹ Mari ko a ya wo ki le iko ki-fen-natankanɛ. Wo mani de iko sugu-bɛrɛ. A ko nfenna wo ara yɛlɛman nɔnbɛ la min gbɔɛ kunayanɛ kelele?

²² Nde, wo Tigi Mari ko hali wo ya soda bi ka wo ku a la, hali wo ya sefini-siyaman yogobɔrɔ wo ma, wo hakɛ ye a yirala ko wo kɔsɔnɛ.

²³ A ko wo le si ke a fɔla kama gbɛ ko wo kɔsɔni ma Beyali kɔ-koe bolo? Ado nfan, wo ni wo miri wo ya koe minnu ma Bɛn-Hinɔm lɛɛ rɔ. Wo ni wo miri wola bɛsi-kɔ-koe ma. Wo mani de dɔrɔn iko kei-sɔgɛ ye nyomo-musi min na. A ye a burila kan-tinɛ bɛɛ rɔ.

²⁴ A ko wo mani de iko sofɛli-musumɛ min bi wulɛ rɔ. A kɛnɛna sofɛli-keimɛnu sumɛ birala. Wo wati rɔ, mɔgɔ-wo-mɔgɔ nɔ-ko ti taran ale sofɛli-musi wo rɔ. Sofɛli-keimɛ min ba a labɔ a ma lenkan wo la, anubɛ wo si dɛn. A musumɛ wo lasɔrɔn ma gbo wati wo le.

²⁵ Mari ko wole, Isirɛla mɔgɛnu kana wo buri ha wo kian ma ni wulen kɔli-fannu-nyinɛ bolo, ado wo kana wo buri ha wo niyi tɛ ni tɛgɛ kɔli-fannu-sɔrɔn-koe la. Wo ye a fɔla wo bɛɛ rɔ ko bɛsɛ wonu denu di wo ye. Wo ko fɔ wo wa anu kɔ le serr!

Tɔrɛ min Bɛnta ka Sigi Isirɛla Mɔgɛnu Ma

²⁶ Ni mɔgɛ ara kankan bira kankanya-kɛ-tinɛ, a si miliya, ado wole Isirɛla mɔgɛnu fanan bara miliya wo nya na le. A mansa wo, a kun-tigi wo, a saraka-masɔla wo, a nɛbi wo, wo bɛɛ ara miliya tɛrr!

²⁷ Wo kɛnɛna a fɔla wola kɔlɔma-malɛsɛnɛnu ma ko wo fa le wonu na. Wo kɛnɛna a fɔla wola kuru-malɛsɛnɛnu ma ko wonu denu ya wo sɔrɔn. Mari ko wo ara wo yɛ bɔ a la. Wo ara wo kan-kɔ sɔ a la. Kɔnɔ nanparan wa na wo ma, wo ye dila Mari dala wo kisi-koe la.

²⁸ A ko wole Isirɛla mɔgɛnu, wo ya bɛsɛ minnu nadan wo nyɛrɛ ye, wonu bi mintɔ gbɛ? Nba, ni wola bɛsɛnu si nanparan nɔ, wonu ni na wo kunyɛ bɔ a rɔ. Soe min nyɔgɔn ye Yuda nyamanɛ rɔ, wo le nyɔgɔn bɛsɛ ye a rɔ.

²⁹ Mari ko nfenna wo dama ye wo tɛgɛ sigila a ma? Wo dama ara wo kan-kɔ sɔ a la nun.

³⁰ A ko a ya wole Isirɛla mɔgɛnu tɔrɔ kɔnɔ tɔrɛ wo ma wo yɛ mabɔ. Wo ya wola nɛbinu faga iko yara-kɔnkɔtoe wa a labɔ soge ma, a ye wo fagala nya min.

³¹ Wole Isirɛla mɔgɛnu, wo ni wo tole masɔ ale Mari kan la! A ko a mani ma wo ye nun iko wula-da-rakolɔn. A ko a mani ma wo ye iko nyamani-makilanni-tapinpini-bɛ. A ko nfenna wo rɔ wo ye a fɔla ko min di wole ye, wo ye wo le mala? Nfenna wo ye a fɔla ko wo ti sɛgi a ma tun?

³² Sunkurɔn ti nyina a makiri-fan ko. Kɔɛn-kurɛ ti nyina ala kɔnyɔ-masɔ-kurɛnu ko. Kɔnɔ Mari ko ata mɔgɛnu nyinara a ko bi-ko-ma,

³³ ado wo kusan keni nyinina wo yɛ la. Wo si musu-yɛlan lawɔliya.

³⁴ Fɛɛbɔnɛ anubɛ bolo-kolɔnnu yele donnɛ wola kurɛnu ma pakasa! Kɔnɔ kankan yele ma wo la de! Hali wo ye kɛ dama mala

³⁵ kɔnɔ wo ye sɛgila a fɔla tun ko fɛɛ sa wo la. Wo ma la a la ko Mari kɔrɔtɔnɛ wo ma mumɛ! Kɔnɔ Mari ko a si wo tɔrɔ bawo wo ara wo da ragbɛlɛya ko wo ma hakɛ kɛ.

³⁶ Wo toni ma kan-tina-kelen ma wo dɛnbɛn-koe rɔ. Asiriya kɛnu ya wo baya nya min, Iyipiti kɛnu bi nala wo bayala wo nya na le,

³⁷ ado wo bole sanɛ si bɔ wo kuma Iyipiti nyamanɛ rɔ miliyɛ bolo. Wo yili latɛgɛnɛ nyamanɛ kɛnu ma kɔnɔ Mari ara a ban wonu na. Wo ti dɛnbɛni-wo-dɛnbɛni sɔrɔn wonu bolo.