Yɛrɛmaya 19 - ALLALA KUMƐ

Bɔnku-Daga Ratii-Koe

^1-2 Mari ya a fɔ n ye ko n ni ta bɔnku-dagɛ do san daga-sɔlɛ ma. Wo kɔma, a ko n ni tenbi Yerusalɛm soe don-dɛ rɔ min tɔgɛ Bɔnku-Daga-Gbɛnkian ka ta Bɛn-Hinɔm lɛɛ rɔ. A ko n ni ta wola kun-tigi donu na nyɔ anubɛ saraka-masɔla-kun-tigi donu. A ko n ba ke nyɔ, n ni a fɔ wo ye ko

³ wole, Yuda kun-tiginu anubɛ Yerusalɛm so-burɔ-mɔgɛnu ni wo tole masɔ Marita sarakanɛ kɛ la. Mari Sɛnbɛ-Bɛɛ-Tigi, Isirɛlata Alla, kɔni, wo ko a si kasarɛ lana kan-tinɛ kɛ rɔ tiriya! Mɔgɔ-wo-mɔgɔ wa kasarɛ wo wara-koe lamɔɛn, wo kun ma si kɔ.

⁴ A ko a ye wo mala le bawo wole, Yuda mɔgɛnu bara wo kan-kɔ sɔ a la. A ko wo ara kan-tinɛ kɛ ma bɛsi-kɔ-tinɛ la ka saraka-mintantɛnu mintan wola bɛsɛnu ye nyɔ, ado wo benbanu wo, wola Yuda mansɛnu wo, wole wo, fɔlɔ nun wo do-wo-do ma bɛsɛ wonu kɔ. A ko a ya a ma, kan-tinɛ kɛ la ara fa mɔgɔ-yele la minnu ma ko tinya.

⁵ Wo ya bɛsi Beyali kɔ-tinɛ ladan nyɔ ka wola dannu ma saraka-mintantɛnu na a ye. Mari ko a ma wo fɔ wo ye, ado a miriya ma ke wo ma.

⁶ Mari ko wo ni a ma wo fɛrɛma. Tumɛ ye nala mɔgɛnu ti bɛsi-kɔ-tinɛ kɛ kele ko Tofɛti. Anu ti yan kele tun ko Bɛn-Hinɔm lɛɛ. Anu si a kele ko Mɔgɛ-Faga-Lɛɛ.

⁷ Mari ko a si wole, Yuda mɔgɛnu anubɛ Isirɛla mɔgɛnu miriya bɛɛ tinya kan-tina-kelan kɛ rɔ ka a ma, wo yogenu ni wole, Yuda kɛnu faga tɛrr! A ko a si a ma, wo furinu ni ma konanu anubɛ sogenu de-nyini-fan la.

⁸ A ko a si so-karantan kɛ rade dogbe! So-karantan kɛ si ma yɛlɛnma-fan la mɔgɛnu ye. Mɔgɛnu tenbi tenbila, anu si anu kunyɛ firifiri. Anu ba so-karantan kɛ tinya-bole mafɛlɛn, anu si kawa.

⁹ A ko wo yogenu si a mini wola soe ma. Mɔgɔ ti bɔ, mɔgɔ ti don dɔn-fen nyini-tinɛ. Kɔnkɛ si wo bira ha wo ni wo nyɛrɛta dannu dɔn. Wo kɔma, wo si wo nyɔgɔn dɔn dabira.

¹⁰ Mari ko, “Wole Yuda mɔgɛnu tenbi n mafɛlan kun na, n ni bɔnku-dagɛ wo ratii pose, iko n bara a ratii nya min kɛ.

¹¹ N bara a ratii min kɛ, n ni a fɔ ko Mari Sɛnbɛ-Bɛɛ-Tigi ko a ye soe kɛnubɛ a nyamanɛ toe kɛ ratiila ka le, ado mɔgɔ ti ke a tugunna a nyɔgɔn na tun. Mɔgɛnu si furinu togon hali Tofɛti bɛsi-kɔ-tinɛ kɛ rɔ. Anu si furinu togon ha, hali dugu-sibiri-kundi ti to.

¹² Mari ko a si kasarɛ kɛ sigi wole kun na ka Yerusalɛm soe kɛ ma iko Tofɛti.

¹³ Yerusalɛmna bɔnnu anubɛ mansɛla bolon-sɛninyabɛlɛ si to iko Tofɛti kɛ. Wo ye mala le bawo wo ye yɛlɛla anuna bɔnnu kuma bɛsi-kɔ-tinɛ. Wo wa yɛlɛ nyɔ, wo si to lolenu kɔla ka isɛnti mintan anu ye nyɔ. Wo si minni-fannu ma sarakɛnu na wola bɛsɛnu ye nyɔ.”

¹⁴ Wo kɔma, nde, Yɛrɛmaya bɔra Tofɛti lɛɛ rɔ, Mari ya n sɔ wɔlɔyiya-kumɛ fɔ-tinɛ kan min nun. N tara n sɔ kata burɔ Mari Bato-Bɔn la. N ya a fɔ mɔgɛnu ye ko

¹⁵ Mari Sɛnbɛ-Bɛɛ-Tigi, Isirɛlata Alla ko a si kasarɛ lana Yerusalɛm anubɛ a dafɛ-soenu ma. A ti mɛ tun. A ye kɛ fɔla le bawo wo ara wo yisi gbɛlɛya ka wo tengberenya.