Yɛrɛmaya 16 - ALLALA KUMƐ

Kasara-Tele Wara-Koe

¹ Wo kɔma, Mari kumara n ye, a ko

² n kana musi furu. N kana den sɔrɔn nyamani-su kɛ rɔ.

³ Min bi nala mala dannu anubɛ anu sɔrɔnnɛnu na yan, Mari ko a si wo fɔ n ye.

⁴ A ko kiraya-fitinɛ si ta anu na. Anu kunyɛ si to kɛlɛ rɔ, ni wo ma, kɔnkɛ si anu firan dugu-kole kuma. Anu dila-wo-dila ti taran, ado anu togonna-wo-togonna ti taran. A ko anu furi-bolokanɛ si taran dugi ma iko ninki-nyɛ. Anu furinu si ma konanu de-nyini-fan la, ni wo ma, firarɔ-sogenu.

⁵ Mari ko n kana ta saya-bɔn la. A ko n kana saya-kɔndɔli-kɛ hali ka di. A ko n kana wo ma bawo a ara ata duwɛ bɔ wo bolo. A ti ata keninteyɛ anubɛ ata kinikinɛ yira wo la tun!

⁶ A mɔgɔ-ba wo, a mɔgɔ-ni wo, wo dama si faga Yuda nyamanɛ rɔ. Mɔgɔ ti wo togon hali ka di wola ko la. Mɔgɔ ti a nyɛrɛ matanban, ni wo ma, ka anu kunyɛ gbana wolela ko la di-kɛ-tinɛ.

⁷ Mɔgɔ-wo-mɔgɔ ti na saya-kinɛ la wo ye. Hali min si yi di wo ma, wo ti taran. Hali a ya a taran, mɔgɛ na ani fila a fa bɔra a kuma, a manugu-nɛgɛla ti sɔrɔn.

⁸ Mari ko n kana ta mɔgɛnu tɛma minnu bi ladiyɛ kun na. N kana ta fen dɔn, ni wo ma, ka n min anu fɛ nyɔ.

⁹ Isirɛlata Mari Sɛnbɛ-Bɛɛ-Tigi Alla ko a ti mɛ tun, a si tɔn sigi sewɛ anubɛ nyagalan la kan tinɛ kɛ rɔ. A si tɔn sigi kɔnyɔ-masɔ-ladiyɛla sewɛ la, ado a ko kɛ bɛɛ si ma n siyi-tele kɔrɔ.

¹⁰ Mari ko n ba kumɛ kɛnu fɔ wole, Yuda kɛnu ye tumɛ min, wo si n manyinika ko, “Nfenna Mari ara ko su kɛnu sigi ma la? Ma ara nfen tinya a ma? Ma ya ko-yoge mintan ma mata Mari Alla la?”

¹¹ Mari ko n ni a fɔ wole fanan ye ko ni wo ya kɛ yen mala wo la, wo benbanu denu fɔlɔn ya ale Mari boloka. Anu ya bɛsɛnu kɔ ka anu taya wonu ma. A ko wo benbanu fɔlɔn bara anu masɛgi Mari la. Anu ya anu ban ale Marita tɔn-bira-koe ma.

¹² A ko kɔnɔ woleta karagbɛlɛyɛ ara tenbi wo benbanutɛ la. Wo tole gbereta dɔgɔma-ma-de! Min di wo ye, wo ye wo le mala. A ko wo sa a sako kɛla mumɛ!

¹³ Woletɔ a ko a ye wo lakɛla a rɔ nyamanɛ do rɔ wo benbanu anubɛ wole ma min lɔn tele-kelen-bɛrɛni! Wo tenbi nyamanɛ wo rɔ, su-ni-tele wo ye bɛsi-kɔ-koe le tɔ. A ko a ti wo dɛnbɛ hali ka hina wo la.

Mɔgɛnu Kunyɛ Bɔ-Koe Biralɛ Rɔ

¹⁴ Wo wati ye nala, wo si wo keli ale Mari tɔgɔ rɔ tun. Kɔnɔ wo ti a kele tun ko, “Alla min ya ma bɔ Iyipiti nyamanɛ rɔ.”

¹⁵ Kɔnɔ wo si a kele ko, “Alla min ya ma bɔ kantɔ-nyamanɛnu tɔ anubɛ nyamanɛ doinu a ara ma ranyɛnsɛn kan min,” ado Mari ko a si a ma, a ya nyamanɛ kɛ min di wo benbanu ma, wo ni sɛgi nyɔ rɔ tun, yɔ!

Yarɔma-Tɔrɔyɛ

¹⁶ Mari ko a ti mɛ tun, a si kilayɛ lata yɛgɛ-biralɛnu ma alako wonu ni na wole, Yuda mɔgɛnu bira. Wo kɔma, a si kilayɛ lata donsenu ma alako wonu ni na bui wola nyamanɛ kɛ bɛɛ ma. Donse wonu si to wole, Yuda mɔgɛnu napɛrɛnna kɔnkɛnu anubɛ farannu ma.

¹⁷ Wo ye min bɛɛ kun na tɛrr, Mari ko a kolan bɛnnɛ a ma. Wo ti ke ko-wo-ko dogonna a ma. Wo hakɛ sanɛ gbɛ le ma.

¹⁸ A ko wole, Yuda mɔgɛnu ya karagbɛlɛyɛ min bɛɛ ma, a si wo yili sara wo la ka wo tɔrɔ hakɛ wo la iko fila fila. A ko a si wo ma bawo wo ara nyamanɛ latinya wola kisimiriya-bɛsɛnu na, ado wo ara ale Marita nyamanɛ kɛ lafa bɛsɛnu na pen!

Yɛrɛmaya Yili-Latɛgɛ-Madiyalɛ

¹⁹ E, Mari, n sɛnbɛ anubɛ n natankalɛ le ile la. Tɔrɔyɛ wa na tumɛ min, n si ta i wara n nakanan-koe rɔ. Sibolenu si bɔ duninya tonke bɛɛ rɔ ka na i wara. Anu si a fɔ ko, “Bɛsi-fuyi le ye ma benbanu bolo nun dɔrɔn! Anu bi bɛsi-fufafuyinu kɔla nun minnu ti ko nyinya anu ma.

²⁰ Hadama-dan si ke bɛsɛ ladanna a nyɛrɛ ma, wa? Ɔn, kɔnɔ Alla ma bɛsɛ wonu na.”

²¹ Mari ko a si sibolenu karan ata sɛnbɛ-makawanɛ la. Anu si a lɔn worɔ ko ale le ye Mariyɛ la.