Yɛrɛmaya 11 - ALLALA KUMƐ

Sarama-Kan Tinya-Koe

¹ Mari ya a fɔ nde, Yɛrɛmaya ye ko

² n ni n tole masɔ ala sarama-kan-kumɛ kɛ la. A ko n ni a nya-rakaran Yerusalɛm kɛnu anubɛ Yuda mɔgɛ toe bɛɛ ye.

³ A ko ale Isirɛlata Mari Alla ko ni min ma ata sarama-kan latɔnbagaya, a si wo tigi tɔrɔ.

⁴ A ko a ye kumala sarama-kan wara-koe la ale Mari anubɛ ma benbanu ya min kiri. Anu bɔɛ Iyipiti, anubɛ Alla nara to sarama-kan kirila anu nyɔgɔn tɛma. A ko Iyipiti manɛ wo ye iko sulubondɔn. A ya a fɔ Isirɛla mɔgɛnu ye ko ni anu ya a kan to a gbɛ rɔ, ale si ma anuta Alla la, anu denu fanan si ma ata mɔgɛnu na.

⁵ A ko wo si a ma, ale fanan ni a waralɛ latɔnbagaya min kirinɛ ma benbanu ye. A si nyamani-hakikɛ di anu ma, ki-fannu si nanfa kan min kubukubu, ado ma ye nyɔ le kɛ la kaka. Nde, Yɛrɛmaya ko, “Mari, ale le wo la.”

⁶ Mari ya a fɔ n ye ko n ni wɔlɔyiya-kumɛ kɛ fɔ Yerusalɛm soe burɔ anubɛ Yuda nyamanɛ bɛɛ rɔ. A ko anu ni anu tole masɔ sarama-kan-kumɛ kɛnu na ka anu bira anu bolo filɛ la gben!

⁷ A bɔɛ wo benbanu na Iyipiti, a ya anu makawandi ko anu ni a kan to a gbɛ rɔ. A ko a mɛra anu makawandi-siyaman kɛla ha bi!

⁸ A ko kɔn-gbalɛ kerinɛ wo benbanu tole rɔ. Anu tole gbɛlɛ gben! Min ba diya anu ye, anu bi wo le mala, ado sarama-kan wo ko ni min ma ata kumɛ bira, wo tigi si dankɛ sɔrɔn. Woletɔ a ko a ya a ma, anu ya dankɛ wo su bɛɛ sɔrɔn. A ya sarama-kan kɛ bira-koe fɔ anu ye kɔnɔ anu ma anu sɛbɛ don a ma hali!

⁹ Wo kɔma, Mari ya a fɔ nde, Yɛrɛmaya ye ko a ara a lɔn ko wole, Yerusalɛm so-burɔ-mɔgɛnu anubɛ Yuda nyamanita-mɔgɛ toenu ya yanfɛ don a ma.

¹⁰ Ado nfan, a ko wo benbanu ya hakɛ minnu kɛ, wole fanan bi wonu denu gbɛ latugunna. Wo benbanu ya anu ban anu tole masɔla a la. Anu bilara bɛsɛnu fɛ ka wonu kɔ. A ko Isirɛla mɔgɛnu anubɛ Yuda mɔgɛnu bara sarama-kan tinya wo benbanu anubɛ Alla ya min kiri anu nyɔgɔn tɛma.

¹¹ Mari ko a ti mɛ tun, a si kasarɛ lana wole, Yuda mɔgɛnu kuma, wo ti ke wo burila min kɔrɔ. A ko wo si to dila a dala wo dɛnbɛn-koe la kɔnɔ a ko a ti wo denkun.

¹² Yerusalɛm kɛnu anubɛ Yuda nyamanita-mɔgɛ toe bɛɛ si ta wola bɛsɛnu bara wo dɛnbɛn-koe rɔ. Wo si isɛnti mintan bɛsɛ wonu ye sarakayɛ la kɔnɔ kasarɛ wo wati wa ke, bɛsɛ wonu ti ke wo kunyɛ bɔla kasarɛ wo kɔrɔ.

¹³ Soe min nyɔgɔn ye Yuda nyamanɛ rɔ, wo le nyɔgɔn bɛsɛ ye wo bolo. Wo ara saraka-mintan-tina-siyaman nadan wola kisimiriya-bɛsɛ Beyali ye. Kila-kunyɛ min nyɔgɔn bi Yerusalɛm soe burɔ, wo le nyɔgɔn saraka-mintan-tinɛnu bi nyɔ.

¹⁴ Mari ko nde, Yɛrɛmaya kana madiyali kɛ wole ye. A ko n kana n dɛ sa-a-rɔ wola ko la, ni wo ma, ka tarali kɛ wo ye. Wo wa Mari rakele tɔrɔyɛla ko la, a ko a ti a wɔlɔ matɔlɔ wo la.

¹⁵ Mari ko wole, a diyana-mɔgɛnu bi nfen kun na a Bato-Bɔn la, wa? Wo ye ko-yogoma-siyaman tabɛnna. Wo lanɛ a la ko kolo-fen-sarakɛ si kasarɛ poro wo ma le, wa? Wo tenbi karagbɛlɛyɛ kɛ kun na, a manɛ iko wo ye a diya donna wo rɔ.

¹⁶ Mari le ya wole kele ko ɔlifi-kɔn-yigirikiri-wɛ min gbɔɛ tɔntɔnnɛ a la, ado a mafɛlɛn di. Kɔnɔ ni Mari ya tɛ sɔgɔ a la a mintan-kan si ta pon! A bolɔnnu si mintan gburr!

¹⁷ Mari Sɛnbɛ-Bɛɛ-Tigi le ya wo ki. Ale le nyɛrɛ ya a fɔ wo ye ko kasarɛ si na. Wo bɛɛ ye tɛgɛla min ma bawo Isirɛla mɔgɛnu anubɛ wole, Yuda mɔgɛnu bara yogoya ka a dan-natenbi. Wo ara sarakɛ di Beyali ma min kɛ, wo ara a ma, Mari fonde ara bɔ ka tenbi a dan kun na.

Yanfɛ Don-Koe Yɛrɛmaya Ma

¹⁸ Mari ara a yira n na ko n yogenu bara yanfɛ don nde, Yɛrɛmaya ma.

¹⁹ N mani de anu yala nun iko anu bi saga-den-makimanɛ min kan-natɛgɛ-koe rɔ. N ma a lɔn nun ko anu si yanfɛ don n ma. Anu bi a fɔla ko, “Ma ni kɔlɔma kɛ anubɛ a gbɔɛ kasara. Ma ni a faga. Wo si a ma, mɔgɛnu ni nyina a ko salon!”

²⁰ N ya Mari madiya ko, “Kɔnɔ Mari Sɛnbɛ-Bɛɛ-Tigi, i telenta. I kusan mɔgɔ-yisi anubɛ a miriya rasumanna. N si anu yasere-masa i ye. I tenbi n tayili sarala anu na, n si n yɛ sɔ i la.”

²¹ Woletɔ n faga-sɔgɛ ye Anatɔti kɛ minnu na, wonu bi a fɔla ko n kana wɔlɔyiya-kuma fɔ Marila ko rɔ tun. Anu ko ni n kirita wo ma, anu si n faga.

²² Mari Sɛnbɛ-Bɛɛ-Tigi ko a si Anatɔti mɔgɛnu tɔrɔ. A kemini-mɛsɛnu kunyɛ si to kɛlɛ rɔ. Kɔnkɛ si ban anuna dannu fagala.

²³ A ko mɔgɔ-wo-mɔgɔ ti to a niyi la Anatɔti soe burɔ. A ko a si kasarɛ lana anu kuma anu tɔrɔ-san wo nyɛrɛ ma.