Yɛrɛmaya 10 - ALLALA KUMƐ

Mari anubɛ Bɛsɛnu Bara-Koe

¹ Wole Isirɛla mɔgɛnu, wo ni wo tole masɔ Mari kan la.

² A ko wo kana wo sanka sibolo-gbɛrɛnu ma. Wo ye tamasere minnu yenna san-kole ma, wo ka kilan wonu na, hali sibolo-gbɛrɛnu bi kilanna anu na.

³ Fufafuyi le sibolo-gbɛrɛnuna namunyɛnu na. Anuna bɛsɛnu bɛnni ma fenfen ma fɔ gbɔngbɔn-kɔnnu, ado boloma-wɔli-kɛlɛnu bi wonu denu lɛsɛla tun.

⁴ Anu bi sɛnɛ anubɛ wodi-gbɛnu mala bɛsɛ wonu makiri-fan la. Anu bi kundunɛ anubɛ lɔntumɛnu bila ka bɛsɛ wonu balan anu sɔ-tinɛnu tɔ. Wo si a ma, bɛsɛ wonu ti bui.

⁵ Bɛsɛ wonu mani de dɔrɔn iko sogo-rakilan-fan. Anu ti kuma. Anu ti tagama, fɔ mɔgɛ wa wonu maduni. Wo kana kilan bɛsɛ wonu na. Anu ti mɔgɛ madumɛ, ado anu ti mɔgɛ madɛnbɛ.

⁶ Mari, i nyɔgɔn sa. I makawara. I tɔgɛ mankan kolo.

⁷ Ile min bi duninya mumɛ kun na, a bɛnta, mɔgɛ bɛɛ ni ile le gbiliya. A bɛnta, anu ni i gbiliya yati! Hɛnkilima-siyaman bi nyɔ kɔnɔ mɔgɔ-wo-mɔgɔ hɛnkili ma gbɛrɛn itɛ rɔ.

⁸ Hɛnkilimɛ wonu hɛnkili sa, ado kuntan le anu na. Anuna hɛnkilimayɛ wonu bɔnɛ anuna bɛsi-fuyi wonu denu tɔ.

⁹ Wodi-gbɛ min bɔra Tasisi soe burɔ, wo sanɛ anuna bɛsɛnu ma. Sɛnɛ-hakikɛ min bɔra Yufasi soe burɔ, wo sanɛ anuna bɛsɛnu ma. Siyakinu anubɛ nunakɛnu denu dɔrɔn bolo-gbɛ ye wonu ma. Anu bi fani-bilolamɛ anubɛ fani-finyɛnu mala bɛsɛ wonu makiri-fannu na. Yese-danna-kɛwuntenu denu bi wonu nadanna.

¹⁰ Kɔnɔ a tora ile Mari le kelen petɛ ma, ile Alla kelen pe le ye min bi mansayɛ la tolon! I wa diminya, duninya mumɛ ra si maga. Mɔgɔ-wo-mɔgɔ ti ke ila fondo-bɔɛ rakɔnɔna.

¹¹ Mari ko bɛsɛ wonu ma san-kole anubɛ dugu-kole ladan, ado anu si tinya ka tunu dugu-kole rɔ.

Alla Tanto Bɛti

¹² Alla ya duninya ladan ata fanka le la. A ya duninya ladan ata hɛnkilimayɛ le la. A ya san-kole rafulen ata ko nya-yen le la.

¹³ A nɛn-naban kumala, bandɛ si tugu. A si a ma, banda-yi la ni dɛn dagɛ rɔ ka bɔ duninya kan-tinɛ bɛɛ rɔ. A si san-sɛran anubɛ bandɛ lana. A si fɔnyɔ labɔ ala fɔn-barɛnu tɔ.

¹⁴ Hɛnkili sa bɛsi-ladannɛ do-wo-do la. Siyakinu bara miliya anuna bɛsɛ wonu na, anu denu ya minnu nadan, kɔni. Anuna bɛsi-fuyi wonu niyi sa anu tɔ.

¹⁵ Fufafuyi le anu na. Anu ti ko-wo-ko nyinya. Yɛlɛnma-fan le anu na. Kiti-tɛgɛ-lunyɛ wa ke, bɛsɛ wonu si kasara.

¹⁶ Kɔnɔ Yakobata Alla sa iko bɛsɛ kɛnu. Alla le ya fan bɛɛ ladan. A ya Isirɛla mɔgɛnu ma a halalɛ la. A tɔgɛ le Mari Sɛnbɛ-Bɛɛ-Tigi.

Halakiyila Nɛ Wara-Koe

¹⁷ Wole Yuda kɛ minnu nafoonɛ wo yogenu bolo, wa wola dunɛnu nakiri ka kilɛ bira.

¹⁸ Mari ya a fɔ ko a si wole, Yuda mɔgɛnu fɔrɔn nyamanɛ kɛ rɔ ka wo lakɛ a rɔ. A ko dumɛ anubɛ tɔrɔyɛ si taran wo kuma. Mari kan le kɛ la.

¹⁹ Wole Yuda kɛnu bi a fɔla ko, “Ka a tɛgɛ mala tanban ma, a gbɛlɛ ma kuma, ado dandanbɛlɛ le mala dumɛ wo la. Kɔnɔ hali wo, a fɛrɛ sa, fɔ ma wa ma muin dumɛ wo kɔrɔ.

²⁰ Mala fani-bɔnnu bara wuya. A balan-yili bɛɛ ra ara tɛgɛ. Mala dannu ta ara nyɛnsɛn. Fani-bɔn wo sɔla-wo-sɔla sa nyɔ tun. Hali a yorolan, a kirila sa tun.”

²¹ Nde, Yɛrɛmaya ya a fɔ wo ye ko mala kun-tiginu hɛnkili sa. Anu ti anu gbɛrɛn Mari ma anu dɛnbɛn-koe la. Woletɔ mala mɔgɛnu sa sabatila. Ma ara nyɛnsɛn mala mɔgɔ-banu ma.

²² Wole Yuda kɛnu, wo ni wo tole rabalan. Kɛlɛ-mankan ye nala. Kɛlɛ-sɔnkɔ-sɔnkɛ ye nala ka bɔ kantɔ-wara la. Wo yogenu si wola soenu ma tonbɔn la iko wula-da-rakolɔn. Nyɔ si ma fira-wulinu barɛ la.

Yɛrɛmayata Madiyalɛ

²³ Mari, n ya a lɔn ko hadama-dan-niyi kerifanɛ i la le. Mɔgɔ-wo-mɔgɔ sa a nyɛrɛ bolo.

²⁴ Mari, ila mɔgɛnu natelen ita telenbagayɛ la. Kɔnɔ i kana ma tɔrɔ ita fondo-bɔɛ la. Ni i ya wo ma, ma wara-koe si ka-a-la.

²⁵ Ita fondo-bɔɛ rawuya sibolo-gbɛrɛnu ma. Anu ma i lɔn. Anu ti ile matara. Sibolo-gbɛrɛ wonu denu ya male, Yakoba kegeyɛnu kasara ka ma lato dogbe! Wonu denu ya mala nyamanɛ fanan kasara.