Yemesi 4 - ALLALA KUMƐ

Duninya-Diyanayɛ Wara-Koe

¹ Kɛlɛ anubɛ sɔsɔlɛ minnu bi wo tɛma, wonu bɔnɛ mi? Anu bɔnɛ wola natanu denu tɔ minnu bi kɛlɛla wo yisi rɔ.

² Fen-sɔgɛ ye wo birala kɔnɔ wo ti ke a sɔrɔnna min kɛ, woletɔ mɔgɔ-faga-sɔgɛ ye wo birala. Wo ye wola nata sala fannu kuma kɔnɔ wo ti ke anu sɔrɔnna min kɛ, wo ye kuma-gbondanɛnu fɔla ka wo nyɔgɔn kɛlɛ. Wo sa wonu sɔrɔnna bawo wo sa Alla tarala wonuna ko la,

³ ado wo wa Alla tara, wo ti a sɔrɔn bawo wo sɔndɔmɛ lafinnɛ. Wo ye fan tarala wo nyɛrɛ diyana-koenu kɛ-koe le la dɔrɔn.

⁴ Wole lanayabɛlɛnu, ka a fɔ ko ni duninya kɛ diyara mɔgɔ-wo-mɔgɔ ye, Alla yoge le wo tigi la, wo ma wo lɔn, wa? N ni a fɔ tun, mɔgɛ min bi mala duninya kɛ diyana-mɔgɛ la, wo si a nyɛrɛ ma Alla yoge la.

⁵ Allala kitabu wa a fɔ ko, “Allala Ni-Sɛnimɛ min siginɛ ma rɔ, a ye a fɛ, ma ni telen a kelen pe le ye,” wo kana wo miri ko a ara kuma-fuyi le fɔ wo la.

⁶ Alla ye keninteyɛ min yirala ma la, wo sɛnbɛ kolo kati, ado Allala kitabu ko, “Alla kɛlɛ-nyɔgɛ le mɔgɔ-wasinɛnu na kɔnɔ mɔgɛ min famayiginɛ, a si wonu kɔntɔ-diya.”

⁷ Woletɔ wo ni wo famayigi Alla ye ka wo kan-kɔ sɔ Setanɛ la. Setanɛ si a buri wo kɔrɔ.

⁸ Wo ni wo gbɛrɛn Alla ma. A si a gbɛrɛn wo ma. Hakɛ-tiginu, wo ni wo bole laku feu! Wole nafiginu, wo ni ko-yogomɛ bɔ wo sɔndɔmɛ rɔ feu!

⁹ Wo ni nimisa ka a tɛgɛ wo ara ko-yogomɛ minnu kɛ. Wo ni wola yɛlan yɛlɛma di-kɛ la ka wola sewɛ yɛlɛma yisi-tinya la!

¹⁰ Wo ni wo famayigi Alla ye. Ni min ya wo ma, a si wo mɔgɛ layɛlɛ.

Kawandili ka A Bɛn Nyɔgɔn-Kiti-Koe Ma

¹¹ N na-kelen-nyɔgɛnu, wo kana wo nyɔgɔn mapandin ha ka wo nyɔgɔn yiliki. Ni wo ya wo ma, wo ye Alla leta tɔn mapandinna ka a yiliki. Ka a fɔ i si ke a fɔla ko, “Tɔn kɛ bɛnta, tɔn kɛ ma bɛn,” wo kiti-tɛgɛla ma ile la, ado ita wɔlɛ ye min na, wo le, ka tɔn wonu bira wo bolo filɛ la.

¹² Ale Alla kelan le tɔn dila ka kiti tɛgɛ. A kelen pe le si ke ka kisili anubɛ halakili kɛ. Yon bi ile la min si i hadama-den-nyɔgɛ yiliki?

Kawandili ka A Bɛn Nyɛrɛ-Matɔgɔ-Koe Ma

¹³ Nba, wo ni wo tole masɔ n kan la. Wole min ko, “Bi, ni wo ma, sina, ma si ta soe do rɔ yilaya-kɛ-tinɛ san kelen ka tɔnɔ-wɛ sɔrɔn.”

¹⁴ Wo ma a lɔn defan, wo niyi si ma nya min sina! Wo mani de iko duri min si yigi ka wati-ni bɔ, wo kɔma, a ni tunu yen!

¹⁵ A fisa, wo ni a fɔ ko, “Ni Mari sɔnta, ma si kɛ ma, ni wo ma, ma si wo ma.”

¹⁶ Kɔnɔ kaka, wo wasinɛ. Wo ye wo nyɛrɛ matɔgɔla, ado nyɛrɛ-matɔgɔ-su wo yogo.

¹⁷ Wo ni wo hɛnkili to kɛ ko. Ni mɔgɛ ya ko-nyimɛ-kɛ nya-lɔn kɔnɔ a ma a kɛ, hakɛ le wo la.