Yemesi 3 - ALLALA KUMƐ

Dɛnkɛninya-Mɔgɛ Dɛ-Mara-Koe

¹ N na-kelen-nyɔgɛnu, wo siyaman kana ma karan-mɔgɛnu na bawo wo ya a lɔn ko male karan-mɔgɛnuta kiti si gbɛlɛya mɔgɔ-gbɛrɛnutɛ ko.

² Ma dama si sama tuma siyaman. Mɔgɛ min ti sama kumɛ rɔ hali doni, wo tigi kanbalinɛ le feu! A si ke a nyɛrɛ matankala le fanan. Fɛɛ ti taran a la ko-wo-ko rɔ.

³ Ma si karafɛ don soee dɛ ma alako a ni ma sako kɛ. Kan tinɛ min di ma ye, ma si ke ka a lata nyɔ.

⁴ Nba, wo ni wo miri yi-kuma-kulɔn ma. Hali a kolo, fɔn-belebele-wɛ si ta a la kɔnɔ mɔgɛ si a kunyɛ latelen lalɛ la kulɔn kolo min ko.

⁵ Ma dɛ fanan manɛ le iko lalɛ kɛ. A dɔgɔ kɔnɔ a si a nyɛrɛ matɔgɔ ko-wɛnu tɔ. Ta-nɛ si fira-belebele mintan.

⁶ Ma dɛ mani de iko ta-mɛlan. A dɔgɔ ma fɛrɛ rɔ kɔnɔ a si ta-belebele tugu. A lafanɛ ko-yogomɛ la. A si ko-yogomɛ nyɛnsɛn kan tinɛ bɛɛ rɔ! A si tɛ tugu mala nimayɛ kɛ la nya bɛɛ ma iko tɛ min bi nala ka bɔ nyahanama nyɛrɛ rɔ.

⁷ Mɔgɛ si ke ka dali-fen-su-bɛɛ kolo. A mara firarɔ-sogo la wo, a mara kona la wo, a mara sagan-fen na wo, hali yɛgɛ, mɔgɛnu bara wonu kolo.

⁸ Kɔnɔ mɔgɔ-wo-mɔgɔ ma ke wɛ a dɛ kolola ha bi. Fen-yogomɛ le, ado a ti ke marala. A lafanɛ munku-yogomɛ la!

⁹ Ma ye baraka birala ma Mari anubɛ ma Fa Alla ye ma dɛ min na, ma hadama-den-nyɔgɛ min nadannɛ Allala muninyɛ rɔ, ma ye wo dankala ma da kelen pe wo le la tun!

¹⁰ Baraka-bira-kumɛ anubɛ dankali-kumɛnu bi bɔla da kelan wo le tɔ. N na-kelen-nyɔgɛnu, wo ma bɛn hali,

¹¹ ado yi-diyamɛ anubɛ yi-kunayanɛ ti ke bɔla tenke kelen tɔ mumɛ!

¹² Toro-kuri ti ke gbɔla mankore la. Nɔnbɛ ti ke gbɔla tore la. Kɔgɔ-yi fanan ti ke yi-diyamɛ labɔla.

Hɛnkili min Bɔnɛ San Ma, wo Wara-Koe

¹³ Hɛnkilimɛ anubɛ ko-lɔnnɛ do ye wo tɛma, wa? A ni wo yira a tagama-nya anubɛ a kɛ-nya-nyimɛnu tɔ. A ni wonu kɛ famayigi anubɛ hɛnkilimayɛ rɔ.

¹⁴ Kɔnɔ ni keliya-yogomɛ ye i yisi rɔ, ado i ye koe bɛɛ bɛnna i nyɛrɛ le ma dɔrɔn, i kana i nyɛrɛ matɔgɔ ka a tɛgɛ ila hɛnkilimayɛ ma. I wara tonyɛ boloka worɔ ka foninya-yogoma-wɛ sa tele la.

¹⁵ Hɛnkili-su wo ma yigi ka bɔ Arinyɛni tɔ. Hadama-danta kɛ-nya-yogomɛ anubɛ duninyatɛ le wo la. Setanɛ bolo-gbɛ le wo la,

¹⁶ ado keliyɛ anubɛ min bi nyinina fan bɛɛsi ma a nyɛrɛ ye, ni wonu bi kan min, sɔnkɔ-sɔnkɛ anubɛ ko-yogoma-sufa-bɛɛ ye nyɔ le.

¹⁷ Kɔnɔ hɛnkili min bɔnɛ san ma, a fɔlɔtɛ ye min na, a sɛnima. A yisi-kimanɛ fanan. A dinyanɛ. A madiya-koe ma gbɛlɛ. A fanɛ kinikinɛ la. A ye kɛwɔli-nyimɛnu kɛla. A ti lafisayalɛ kɛ. A ti a nyɛrɛ kɔrɔta.

¹⁸ Nyimayɛ ye tɔnɛ min nabɔla, kɛlɛ-makimalɛnu denu ya wo ki. Tɔ-a-la, yisi-kimɛ si tɛgɛ nyɔ.